កាលពីពេលកន្លងទៅនេះ ប្រទេសជប៉ុនបានប្រារព្ធខួបឆ្នាំទី ៧៣ នៃការទម្លាក់គ្រាប់បែកនុយក្លេអ៊ែរពីសំណាក់កងទ័ពអាមេរិកលើទីក្រុងហ៊ីរូស៊ីម៉ា (Hiroshima) ជាមួយការព្រមានរបស់អភិបាលក្រុងមួយនេះ ពីការកើនឡើងគំនិតជាតិនិយម ដែលអាចនឹងបំផ្លាញដល់សន្តិភាពពិភពលោក។
ពិធីនេះធ្វើឡើងនៅសួន Peace Memorial ដោយមានអ្នកចូលរួមប្រហែល ៥ម៉ឺននាក់ ក្នុងនោះគឺមានអ្នកតំណាងមកពីប្រទេសចំនួន ៨៥ ព្រមទាំងអ្នកនៅរស់រានពីការទម្លាក់គ្រាប់បែកនេះផងដែរ។អ្នកចូលរួម បានស្ងៀមស្ងាត់នៅអំឡុងម៉ោង ៨:១៥នាទីព្រឹក ដើម្បីរំលឹកដល់ម៉ោងជាក់លាក់ដែលគ្រាប់បែកបរិមាណឈ្មោះ "Little Boy" ត្រូវបានទម្លាក់ចេញពីយន្តហោះអាមេរិក មកលើក្រុងនេះ។នេះបើយោងតាមការចេញផ្សាយដោយសារព័ត៌មាន Channel News Asia ។
អភិបាលក្រុងហីរ៉ូស៊ីម៉ា លោក Kazumi Matsui បានអំពាវនាវ កសាងពិភពលោក គ្មានបរមាណូ តាមរយៈកិច្ចពិភាក្សា ហើយ ជំរុញឲ្យ ជប៉ុនចូលរួមចុះហត្ថលេខាលើ សន្ធិសញ្ញាមិនរីកសាយភាយអាមេរិក បរមាណូ ដែលអង្គការសហប្រជាជាតិបានអនុម័តកាលពីខែកក្កដាឆ្នាំ២០១៧។
លោក Kazumi Matsuiបន្តទៀតថា ជប៉ុនចាំបាច់ត្រូវតែដឹកនាំពិភពលោក ពិភាក្សា និងសហការគ្នា ធ្វើឲ្យពិភពលោកទាំងមូលគ្មានអាវុធប្រល័យលោក។ លោក ក៏បានព្រមាន ពីការប្រឈមមុខតានតឹង ដាក់គ្នាពាក់ព័ន្ធនិងអាវុធបរមាណូ ហើយ បើយើងមិនបញ្ចប់បរមាណូនោះទេ អនាគតមនុស្សជាតិនឹងជួបរឿងអាក្រក់ជាងជប៉ុនរាប់សិបដង។
សូមបញ្ជាក់ផងដែរថា« គ្រាប់បែក បរមាណូ នាពេលបច្ចុប្បន្នគឺមានកម្លាំង បំផ្លាញ ខ្លាំងជាង បរមាណូដែលទម្លាក់នៅជប៉ុនរាប់សិបដង ហើយប្រសិនបើរងការវាយប្រហារនោះ នឹងមានអ្នកស្លាប់រាប់ លាននាក់ មិនមែនជាង ១សែននាក់ដូចនៅ ជប៉ុននោះឡើយ។
ចំណែកលោកនាយករដ្ឋមន្ត្រីជប៉ុន ស៊ិនហ្ស៊ូ អាបេ បានថ្លែងក្នុងពិធីនេះដែរថា «ដើម្បីសម្រេចនូវពិភពលោកមួយគ្មានអាវុធនុយក្លេអ៊ែរ គឺយើងត្រូវការយល់ដឹងពីគ្រាប់បែកនុយក្លេអ៊ែរ ដែលអាចបង្កសោកនាដកម្មប៉ុណ្ណានោះ។ ចាប់ពីចំណុចនេះ យើងត្រូវការទទួលកិច្ចសហប្រតិបត្តិការពីបណ្តាប្រទេសដែលមាន និងប្រទេសដែលគ្មានអាវុធនុយក្លេអ៊ែរ»។
គួររំលឹកជូនថា ជប៉ុន បានទទួលរងការឈឺចាប់ ដោយសារតែការវាយប្រហារដោយអាវុធនុយក្លេអ៊ែរ របស់សហរដ្ឋអាមេរិកចំនួន ២ លើក នៅចុងបញ្ចប់នៃសង្គ្រាមលោកលើកទី ២។ លើកទីមួយគឺនៅថ្ងៃទី០៦ ខែសីហា ខែឆ្នាំ១៩៤៥ សហរដ្ឋអាមេរិកបានទម្លាក់គ្រាប់បែកនុយក្លេអ៊ែរលើក្រុងហ៊ីរ៉ូស៊ីម៉ា ដោយសម្លាប់ប្រជាជនជប៉ុនជាង ១៤០,០០០នាក់ ហើយបីថ្ងៃមកទៀតគ្រាប់បែកនុយក្លេ អ៊ែរទី ២ ត្រូវកងទ័ពអាមេរិកសំពងលើទីក្រុងណាហ្កាសាគី (Nagasaki) ផ្ដាច់ជីវិតមនុស្ស ៧៤,០០០នាក់៕
Home ព្រឹត្តិការណ៍ថ្មីៗ ប្រទេសជប៉ុនបានប្រារព្ធខួបឆ្នាំទី ៧៣ នៃការទម្លាក់គ្រាប់បែកនុយក្លេអ៊ែរពីសំណាក់កងទ័ពអាមេរិកលើទីក្រុងហ៊ីរូស៊ីម៉ា ដែលគ្មានថ្ងៃអាចបំភ្លេចបាន !