រដ្ឋាភិបាលវ៉េណេស៊ុយអេឡាបាននិយាយកាលពីថ្ងៃចន្ទថា ខ្លួននឹងដាក់បន្ទុកក្នុងការទទួលខុសត្រូវជុំវិញអរិភាពថ្មីមួយប្រឆាំងនឹងទីក្រុងការ៉ាកាស់ ទៅលើរដ្ឋាភិបាលកូឡំប៊ី បន្ទាប់ពីការប៉ុនប៉ងធ្វើឃាតប្រធានាធិបតីវ៉េណេស៊ុយអេឡា លោក នីកូឡា ម៉ាឌូរ៉ូ បានទទួលបរាជ័យកាលពីម្សិលម្ង៉ៃនេះ។
អ្នកនាំពាក្យរដ្ឋាភិបាលបានឲ្យដឹងថាភេរវករ ៦ នាក់ និងឃាតករស៊ីឈ្នួលជាច្រើននាក់ ត្រូវបានចាប់ខ្លួននៅវ៉េណេស៊ុយអេឡាដែលត្រូវបានគេចោទប្រកាន់ពីបទធ្វើឃាតប្រធានាធិបតីនីកូឡាស ម៉ាឌូរ៉ូ តាមការចោទប្រកាន់វាយប្រហារ ដោយប្រើយន្តហោះដ្រូន។
រដ្ឋមន្ត្រីក្រសួងមហាផ្ទៃ និងជារដ្ឋមន្ត្រីយុត្តិធម៌លោក Nestor Reverol បាននិយាយថា មនុស្សជាច្រើននាក់ អាចនឹងត្រូវចាប់ខ្លួនជាបន្តទៀតនៅប៉ុន្មានម៉ោងខាងមុខនេះ។លោក Reverol បាននិយាយថា ទាហាន ៣ នាក់ស្ថិតក្នុងស្ថានភាពធ្ងន់ធ្ងរ និង ៤ នាក់ផ្សេងទៀតរងរបួសនៅក្នុងការវាយប្រហារដែលគេសង្ស័យថាមានការជាប់ទាក់ទិនទៅនឹងយន្តហ្រោះដូន ២ គ្រឿង។ លោកបានពិពណ៌នាពីការវាយប្រហារនោះថា ជាអំពើឧក្រិដ្ឋកម្ម និងការធ្វើឃាត និងបានថ្លែងថា សម្ភារ និងអ្នកបង្កើតនៅខាងក្នុង និងក្រៅប្រទេសនេះត្រូវបានកំណត់អត្តសញ្ញាណ។
ថ្លែងនៅក្នុងសេចក្តីថ្លែងការណ៍មួយ រដ្ឋាភិបាលវ៉េណេស៊ុយអេឡាបាននិយាយថា «យើងសូមប្រកាសថា យើងនឹងធ្វើការស្តីបន្ទោសទៅលើរដ្ឋាភិបាលកូឡំប៊ីសម្រាប់ការឈ្លានពាន ឬការប៉ុនប៉ង ដើម្បីគាំទ្រការញុះញង់ប្រឆាំងរដ្ឋាភិបាលសាធារណរដ្ឋបូលីវ៉ារី ពីសំណាក់តំបន់ព្រំដែនកូឡំប៊ី»។
ជុំវិញបញ្ហានេះប្រធានាធិបតីកូឡុំប៊ី លោក ហ័ន ម៉ានុយអែល សាន់តូស នៅថ្ងៃចន្ទនេះ បានទាត់ចោល ព្រមទាំងថ្កោលទោសយ៉ាងខ្លាំង ចំពោះការចោទប្រកាន់ថាលោកជាអ្នកនៅពីក្រោយការប៉ុនប៉ងធ្វើឃាតប្រធានាធិបតីវេណេស៊ុយអេឡា។ នេះបើតាមការចេញ ផ្សាយដោយទីភ្នាក់ងារសារព័ត៌មានបារាំង AFP នៅថ្ងៃចន្ទ ទី០៦ ខែសីហា ឆ្នាំ២០១៨។
ប្រតិកម្មរបស់ លោក សាន់តូស ធ្វើឡើងបន្ទាប់ពីលោក ម៉ាឌូរ៉ូ ផ្ទាល់បានចោទប្រកាន់រូបលោកថាជាអ្នកនៅពីក្រោយការប៉ុនប៉ងធ្វើ ឃាតប្រធានាធិបតីវេណេស៊ុយអេឡារូបនេះ ដោយយន្ដហោះដ្រូន ដែលបំពាក់ដោយគ្រឿងផ្ទុះ។ មួយវិញទៀត លោកសាន់តូស ក៏បានបរិហាផងដែរថា ការចោទប្រកាន់របស់លោក ម៉ាឌូរូ គឺគ្រាន់តែជាលេសដើម្បីពង្រឹងអំណាចរបស់ខ្លួន បង្ក្រាបនិងបំបិទ សំឡេងអ្នកប្រឆាំងតែប៉ុណ្ណោះ៕
Home ព្រឹត្តិការណ៍ថ្មីៗ ប្រធានាធិបតីកូឡុំប៊ី ប្រតិកម្មជុំវិញការចោទប្រកាន់ថាជាអ្នកនៅពីក្រោយនៃការប៉ុនប៉ងធ្វើឃាតប្រធានាធិបតីវ៉េណេស៊ុយអេឡា លោក នីកូឡា ម៉ាឌូរ៉ូ !