សារព័ត៌មាន CNN បានចេញផ្សាយនៅថ្ងៃទី២៣ តុលា ២០១៨នេះថា កងទ័ពជើងទឹកមហាកំណាចរញ្ជួយពិភពគុនរបស់អាមេរិក បានបញ្ជូននាវាចម្បាំងចំនួន ២គ្រឿងទៅធ្វើនាវាចរណ៍ដោយសេរីនៅក្នុងតំបន់ច្រកសមុទ្រតៃវ៉ាន់ ដើម្បីបង្ហាញកម្លាំងសាច់ដុំយោធារបស់ខ្លួន ទៅកាន់ទីក្រុងប៉េកាំង ខណៈដែលភាពតានតឹងបានកើនឡើងដល់ចំណុចកំពូលរវាងចិន និងសហរដ្ឋអាមេរិក ដែលស្ទើរតែបង្កទៅជាសង្គ្រាមរវាងមហាអំណាចទាំងពីរ។
នាវាពិឃាតបំពាក់ដោយគ្រាប់មីស៊ីល USS Antietam និងនាវាពិឃាតបំពាក់ដោយគ្រាប់មីស៊ីល USS Curtis Wilbur បានធ្វើដំណើរឆ្លងកាត់ច្រកសមុទ្រតៃវ៉ាន់ចាប់ពីភាគខាងត្បូង រហូតទៅដល់ភាគខាងជើង។
អ្នកនាំពាក្យកងនាវាចម្បាំងរបស់អាមេរិកប្រចាំតំបន់ប៉ាស៊ីហ្វីកបានប្រាប់សារព័ត៌មាន CNN ថា «នាវាពិឃាត USS Curtis wilbur និងនាវាពិឃាត USS Antietam បានធ្វើដំណើរឆ្លងកាត់ច្រកសមុទ្រតៃវ៉ាន់ទៅតាមទម្លាប់ កាលពីថ្ងៃទី២២ តុលាម្សិលមិញនេះ ដោយអនុឡោមទៅតាមច្បាប់អន្តរជាតិតែប៉ុណ្ណោះ»។ លោកបន្តថា នាវាចម្បាំងទាំងពីរគ្រឿងដែលឆ្លងកាត់ច្រកសមុទ្រតៃវ៉ាន់ទាំងនេះ បង្ហាញពីការប្តេជ្ញាចិត្តរបស់អាមេរិក ក្នុងការធ្វើនាវាចរណ៍ដោយសេរី និងបើកចំហនៅក្នុងតំបន់ឥណ្ឌូប៉ាស៊ីហ្វីក។
ការបញ្ជូននាវាចម្បាំងមហាកំណាចទៅធ្វើនាវាចរណ៍ជាថ្មីម្តងទៀត នៅច្រកសមុទ្រតៃវ៉ាន់នេះ បានធ្វើឡើងបន្ទាប់ពី ចិនបានបញ្ជូននាវាចម្បាំងមួយគ្រឿងរបស់ខ្លួនដេញបុកនាវាចម្បាំងអាមេរិក ដែលកំពុងធ្វើនាវាចរណ៍ដោយសេរីនៅក្នុងតំបន់សមុទ្រចិនខាងត្បូង កាលពីពេលថ្មីៗកន្លងទៅនេះ។
ច្រកសមុទ្រតៃវ៉ាន់នេះ មានចម្ងាយស្ថិតនៅប្រមាណ ១៧៧គីឡូម៉ែត្រ ដែលញែកប្រទេសចិន និងតៃវ៉ាន់ចេញពីគ្នា ហើយតំបន់ច្រកសមុទ្រតៃវ៉ាន់នេះ គឺជាតំបន់ភូមិសាស្ត្រនយោបាយដ៏មានសក្កដានុពល ខណៈដែលចិនកំពុងសម្លឹងរកមើលឱកាស ក្នុងការក្រសោបយកកោះស្វយ័តតៃវ៉ាន់មកវិញ។
ទីក្រុងប៉េកាំងនៅតែបន្តអះអាងថា កោះតៃវ៉ាន់គឺជាខេត្តមួយរបស់ខ្លួន។ លោកប្រធានាធិបតីចិនស៊ីជិនពីងធ្លាប់បានប្រកាសហើយថា ការប្រកាសឯករាជ្យរបស់តៃវ៉ាន់អាចនឹងត្រូវជួបជាមួយនឹងកណ្តាប់ដៃដែករបស់ទីក្រុងប៉េកាំង។
ការបញ្ជូននាវាចម្បាំងចំនួន ២គ្រឿងរបស់អាមេរិកទៅកាន់ច្រកសមុទ្រតៃវ៉ាន់នាពេលនេះ ក៏បានធ្វើឡើងចំពេលដែលមានភាពតានតឹងកាន់តែខ្លាំងរវាងចិន និងតៃវ៉ាន់ ខណៈដែលអាមេរិកគិតថា ចិនអាចនឹងប្រកាសសង្គ្រាមទៅលើតៃវ៉ាន់ភ្លាម ក្នុងករណីមានការប្រកាសឯករាជ្យ។ កាលពីថ្ងៃសៅរ៍សប្តាហ៍មុន ក្រុមអ្នកជាតិនិយមតៃវ៉ាន់បានងើបឈរតវ៉ាឲ្យទាមទារឲ្យលោកស្រី Tsai Ing-wen ប្រកាសឯករាជ្យផ្តាច់ខ្លួនពីប្រទេសចិន។ យ៉ាងណាក៏ដោយ មិនទាន់មានចម្លើយណាមួយពីលោកស្រីសៃនោះទេ។ អ្នកវិភាគមើលឃើញថា លោកស្រីសៃកំពុងមានសម្ពាធពីចិនផង និងពលរដ្ឋរបស់ខ្លួនផង។ អ្នកវិភាគមើលឃើញថា បើសិនជាតៃវ៉ាន់បន្រកាសឯករាជ្យនាពេលនេះ សង្គ្រាមនឹងផ្ទុះឡើងរវាងចិន និងតៃវ៉ាន់។ ប៉ុន្តែនាពេលនេះ អ្វីដែលតៃវ៉ាន់ចង់បានគឺការឈរនៅពីក្រោយខ្នងកាន់តែស្និទរបស់អាមេរិក ដែលតៃវ៉ាន់អាចកាន់តែទុកចិត្តបាន នោះតៃវ៉ាន់នឹងប្រកាសឯករាជ្យតែម្តង
ចិនគិតថា វត្តមានកងទ័ពអាមេរិកនៅក្នុងតំបន់ច្រកសមុទ្រតៃវ៉ាន់ គឺជាចំណុចរសើប ហើយប៉ុន្មានឆ្នាំចុងក្រោយនេះ អាមេរិកបានត្រឹមតែបានធ្វើនាវាចរណ៍ដោយប្រើនាវាពិឃាតប៉ុណ្ណោះ ដោយមិនបានប្រើនាវាផ្ទុកយន្តហោះទម្លាក់គ្រាប់បែកនោះទេ។ នាវាផ្ទុកយន្តហោះខកខានក្នុងការធ្វើនាវាចរណ៍ឆ្លងកាត់តំបន់ច្រកសមុទ្រតៃវ៉ាន់ចាប់តាំងពីឆ្នាំ ២០០៧មកម្ល៉េះ។
អ្វីដែលគួរឲ្យកត់សម្គាល់ មន្ត្រីសហរដ្ឋអាមេរិកលើកឡើងថា ខ្លួនកំពុងតែធ្វើឲ្យកងទ័ពរបស់ខ្លួនមានទម្ងន់កាន់តែខ្លាំង ក្នុងការបង្ហាញកម្លាំងទ័ពមហាសម្បើមរបស់ខ្លួន ដើម្បីបង្ហាញថា សហរដ្ឋអាមេរិកបានត្រៀមខ្លួនរួចរាល់ហើយ ដើម្បីប្រឆាំងនឹងកងទ័ពរំដោះប្រជាជនចិន។
កាលពីដើមខែនេះ កងទ័ពជើងទឹកសហរដ្ឋអាមេរិកបានស្នើឲ្យមន្ទីរប៉ង់តាហ្គោនបើកភ្លើងខៀវដលខ្លួន ក្នុងការបង្ហាញកម្លាំងមហាសម្បើមរបស់ខ្លួន បញ្ជូនសារទៅកាន់ទីក្រុងប៉េកាំង ដោយនឹងលើកកងទ័ពទៅធ្វើសមយុទ្ធ នៅជិតមូលដ្ឋានទ័ពចិន ដែលកំពុងតែវ៉ាងទីទាំងខុសច្បាប់នៅក្នុងតំបន់សមុទ្រចិនខាងត្បូងតែម្តង។ ចាំមើលថា បើអាមេរិកលើកកងទ័ពទាំងហ្វូងទៅធ្វើសមយុទ្ធទ្រង់ទ្រាយធំ នៅក្នុងតំបន់សមុទ្រចិនខាងត្បូង តើចិននឹងហ៊ានក្អកជាមួយអាមេរិកដែរឬទេ?
Home ព្រឹត្តិការណ៍ថ្មីៗ សង្គ្រាមចិន និងអាមេរិកទំនងជាអាចត្រូវផ្ទុះឡើងក្នុងពេលឆាប់ៗខាងមុខនេះៗ! អាមេរិកបញ្ជូនក្រុមនាវាធ្វើដំណើរទៅកាន់ច្រកសមុទ្រតៃវ៉ាន់ ដើម្បីបង្ហាញពីសេរីភាពក្នុងការធ្វើនាវាចរណ៍