យោងតាមសារព័ត៌មានអាល់ចាហ្ស៊ីរ៉ានៅថ្ងៃទី២៩ ឧសភានេះ មនុស្សជាង ២០នាក់ត្រូវបានសម្លាប់កាលពីថ្ងៃអង្គារ ខណៈដែលរដ្ឋាភិបាលអាសាដ បន្តបាញ់ផ្លោងដាក់មូលដ្ឋានក្រុមបះបោរនៅភាគនិរតីនៃប្រទេសនេះ។
ការវាយប្រហារចុងក្រោយនេះត្រូវបានធ្វើឡើង ខណៈដែលអង្គការសហប្រជាជាតិបានរិះគន់មហាអំណាចពិភពលោកដែលមិនបានធ្វើអ្វីសោះ ក្នុងបញ្ចប់ការបង្ហូរឈាម និងការបំផ្លិចបំផ្លាញក្នុងប្រទេសនេះ។
មួយខែនៃការបង្កើនការទម្លាក់គ្រាប់បែកទៅលើតំបន់នោះដោយស៊ីរី និងសម្ព័ន្ធមិត្តរុស្ស៊ី បានសម្លាប់ជនស៊ីវិល ២២៩នាក់ និង ៩២៧នាក់ផ្សេងទៀតរងរបួស។ នេះបើតាមអង្គការសប្បុរសធម៌ផ្នែកថែទាំសុខភាព និងសង្គ្រោះអង្គការសហប្រជាជាតិ។
ក្រុមឃ្លាំមើលសង្គ្រាមស៊ីរីដែលមានមូលដ្ឋាននៅចក្រភពអង់គ្លេសបាននិយាយថា កុមារ ៩នាក់ក្នុងចំណោម ២១នាក់ ត្រូវបានសម្លាប់នៅក្នុងការបាញ់ប្រហាររបស់រដ្ឋាភិបាលទៅលើទីប្រជុំជនជាច្រើនក្នុងខេត្តអ៊ីដលីប និងតំបន់ជនបទនៃខេត្តអាឡេប៉ូកាលពីថ្ងៃអង្គារ។
ក្រុមអ្នកជួយសង្គ្រោះការពារជនស៊ីវិល ដែលធ្វើការនៅក្នុងទឹកដីដែលគ្រប់គ្រងដោយបក្សប្រឆាំងបញ្ជាក់ថា អ្នកស្លាប់មានចំនួន ២៤នាក់។ ក្រុមអ្នកតាមដានបាននិយាយថា ការវាយប្រហារទៅលើផ្លូវមមាញឹកមួយនៅភូមិ Kafr Halab នៅភាគខាងលិចនៃខេត្តអាឡេប៉ូបានសម្លាប់ជនស៊ីវិលយ៉ាងហោចណាស់ ៩នាក់។
ខេត្តអ៊ីដលីប និងផ្នែកខ្លះនៃខេត្ត Aleppo, Hama និង Latakia គឺស្ថិតនៅក្រោមការគ្រប់គ្រងរបស់ ក្រុម Hay'et Tahrir al-Sham (HTS) ដែលជាអតីតសម្ព័ន្ធមិត្តរបស់ក្រុមអាល់កៃដាស៊ីរី ដែលរដ្ឋាភិបាលស៊ីរីបានប្តេជ្ញាកម្ទេចក្រុមនេះចោល។
ទន្ទឹមនឹងនេះដែរ សហរដ្ឋអាមេរិកបាននិយាយថា ខ្លួននៅតែបន្តព្រួយបារម្ភចំពោះការវាយប្រហាររបស់ស៊ីរី និងរុស្ស៊ី ដោយថា ពួកគេកំពុងបង្កឲ្យមានការកើនឡើងនៃអំពើហិង្សា។
រូបភាពផ្កាយរណបថ្មីដែលត្រូវបានផ្តល់ដោយ DigitalGlobe Inc បានបង្ហាញពីផ្សែងខ្មៅងងឹត ដីគ្របដណ្តប់ដោយភាពខ្មៅ រីឯអគាគ្របដោយភ្លើងដែលកំពុងលេបត្របាក់ចេញពីតំបន់ភូមិ al-Habeet នៃខេត្តអ៊ីដលីប និងទីប្រជុំជនតូច Kafr Nabuda ក្នុងខេត្តហាម៉ា។
អង្គការការពារជនស៊ីវិលនៅភាគពាយ័ព្យដែលជាសេវាកម្មជួយសង្គ្រោះនៅក្នុងទឹកដីនៃគណបក្សប្រឆាំងបាននិយាយកាលពីថ្ងៃចន្ទថា យន្តហោះចម្បាំងរបស់រដ្ឋាភិបាលបានវាយប្រហារទៅលើវាលស្រែនៃខេត្តអ៊ីដលីប ដែលគ្រប់ដោយផ្សែងភ្លើង។
ប្រព័ន្ធផ្សព្វផ្សាយស៊ីរីសាណាបាននិយាយកាលពីថ្ងៃអង្គារថា ក្រុមបះបោរបានបាញ់គ្រាប់ផ្លោងការណុងធំទៅលើភូមិនៅភាគខាងជើងនៃតំបន់ហាម៉ា ដោយបានបំផ្លាញផ្ទះសម្បែង និងបានដុតស្រែ៕