វីដេអូនៃសត្វចម្លែកដូចមនុស្សពិភពផ្កាយ ថតបានដោយម្ចាស់ផ្ទះម្នាក់ គឺលោក Hari Toae ពេលវាកំពុងតោងពិដានផ្ទះរបស់លោកនៅកោះបាលី ប្រទេសឥណ្ឌូនេស៊ី កាលពីខែមុន។
នៅក្នុងវីដេអូគ្លីបនេះ គេឃើញរាងកាយដ៏ចម្លែករបស់សត្វមួយក្បាលនេះ ដូចជាមានស្លាប២ ជើង៤ ហើយនិងម្រាមដៃច្រើន។
វាធ្វើចលនាខុសទិសតំបន់ ដោយជើងរបស់វាតោងជាប់នឹងពិដានផ្ទះ។
ម្យ៉ាងវិញទៀត សត្វចម្លែកមួយក្បាលនេះ ដែលមើលដូចជាពាក់កណ្តាលដង្កូវ ពាក់កណ្តាលមនុស្សពិភពផ្កាយនោះ ថែមទាំងមានសក់ដុះរ៉ុយៗថែមទៀតផង។
ជាងនេះទៅទៀត ដៃដ៏ចម្លែករបស់វា ត្រូវបានគេថតឃើញម្តងលៀនចេញ ម្តងលៀនចូលផងដែរ។
លោក Hari បាននិយាយថា សត្វចម្លែកមួយក្បាលនេះ កំពុងតែស្វែងរកទីសុវត្ថិភាព ស្នាក់នៅ ដោយសារតែមានមេឃភ្លៀងខាងក្រៅ។
លោកបាននិយាយថា លោកទុកវាឲ្យនៅក្នុងផ្ទះរបស់លោកតែមួយយប់ប៉ុណ្ណោះ ពីព្រោះថា លោកមិនចង់ឲ្យភ្ញៀវរបស់លោករត់ចេញដោយសារតែខ្លាចវានោះទេ។
លោកបន្តថា វាគឺជាសត្វមួយប្រភេទដែលលោកមិនធ្លាប់ដែលបានឃើញពីមុនមកនោះទេ ហើយលោកគិតថា វាមកពីតំបន់ក្បែរនេះ៕