យោងតាមការសិក្សាស្រាវជ្រាវថ្មីបានបង្ហាញថា ផ្កាយព្រះគ្រោះដ៏ធំមួយ ទំនងជាបានហោះបុកផែនដីកាលពីរយៈពេល១២.៨០០ឆ្នាំមុន បង្កឲ្យមានបម្រែបម្រួលអាកាសធាតុ និងការផុតពូជរបស់សត្វលោកនៅលើផែនដី។
ភស្តុតាងបានគាំទ្រទ្រឹស្តីមួយដែលថាផ្កាយព្រះគ្រោះមួយ ឬច្រើន បានធ្វើឲ្យចុះត្រជាក់ផែនដី និងបានធ្វើផុតពូជសត្វធំៗ ដែលត្រូវបានគេរកឃើញនៅប្រទេសអាហ្វ្រិកខាងត្បូង។
ក្រុមអ្នកវិទ្យាសាស្ត្រ បានរកឃើញសញ្ញានៃដែកប្លាទីន ដែលបង្ហាញថា ផ្កាយព្រះគ្រោះ បានហោះបុក គឺជាផ្កាយព្រះគ្រោះដែលសម្បូរប្លាទីន នៅតំបន់ Wonderkrater ស្ថិតក្នុងខេត្ត Limpopo ភាគខាងជើងនៃរដ្ឋធានី Pretoria ប្រទេសអាហ្វ្រិកខាងត្បូង។
មកទល់នឹងពេលនេះ ភស្តុតាងបង្ហាញថា ផ្កាយព្រះគ្រោះ បានបង្កឲ្យមានផលប៉ះពាល់ដែលនាំឲ្យមានយុគសម័យទឹកកកនៅអឌ្ឍគោលខាងជើង។ តំបន់សរុប២៨កន្លែងដែលមានកម្រិតផ្លាទីនខ្ពស់ ត្រូវបានរកឃើញ។
ប៉ុន្តែភស្តុតាងបច្ចុប្បន្នដែលបានបង្ហាញពីទីតាំងស្រដៀងគ្នានៅអឌ្ឍគោលខាងត្បូង ត្រូវបានរកឃើញផងដែរ។
ការរកឃើញដោយក្រុមអ្នកស្រាវជ្រាវនៅឯសាកលវិទ្យាល័យ Witwatersrand ស្ថិតក្នុងទីក្រុង Johannesburg ប្រទេសអាហ្វ្រិកខាងត្បូង បានគាំទ្រទ្រឹស្តី ដែលថា ផ្កាយព្រះគ្រោះ បានហោះបុកផែនដី ដែលនាំឲ្យមានផលវិបាកដល់ផែនដី ហើយទីតាំងដែលរងការបុកពីផ្កាយព្រះគ្រោះ ត្រូវបានរកឃើញផងដែរនៅប្រទេសឈីលី។
ក្រោយពីការវាយប្រហារដោយផ្កាយព្រះគ្រោះ ការផុតពូជសត្វច្រើនប្រភេទ ពិសេសគឺជាសត្វធំៗ បានកើតមានឡើងកាលពីរយៈពេល១២.៨០០ឆ្នាំមុន។
ខណៈពេលដែលទ្រឹស្តីមួយ ធ្លាប់បានលើកឡើងកាលពីមុនថា យុគសម័យទឹកកក បានកើតឡើងដោយសារតែបម្រែបម្រួលនៅក្នុងប្រព័ន្ធចរន្តមហាសមុទ្រនោះ ទ្រឹស្តីមួយទៀត ដែលផ្តល់ជូនដោយក្រុមអ្នកវិទ្យាសាស្ត្រអាមេរិកកាលពីឆ្នាំ២០០៧ បានអះអាងថា យុគសម័យរលាយទឹកកក អាចបង្កឡើងដោយសារតែការធ្លាក់ចុះនូវធូលី ដែលសល់ពីការបុករបស់ផ្កាយព្រះគ្រោះ៕
Home ព័ត៌មានអន្តរជាតិ ភស្តុតាងថ្មី៖ ផ្កាយព្រះគ្រោះហោះបុកផែនដីកាលពី១២.៨០០ឆ្នាំមុន បង្កឲ្យមានយុគសម័យទឹកកក