នាង Sulli ដែលជាតារាចម្រៀង និងសម្តែងដ៏មានប្រជាប្រិយភាពម្នាក់ របស់កូរ៉េខាងត្បូង បានប្រទះឃើញដេកស្លាប់នៅក្នុងផ្ទះរបស់នាង ស្ថិតនៅទីក្រុង Seongnam កាលពីថ្ងៃចន្ទ។ នាងបានស្លាប់នៅវ័យ២៥ឆ្នាំ។
ក្រុមនគរបាល បានជូនដំណឹងដល់ទីភ្នាក់ងារព័ត៌មាន Yonap របស់កូរ៉េខាងត្បូងថា តារាស្រីម្នាក់នេះ ត្រូវបានប្រទះឃើញដេកស្លាប់នៅក្នុងផ្ទះរបស់នាង ក្នុងទីក្រុង Seongnam ស្ថិតនៅភាគខាងត្បូងទីក្រុងសេអ៊ូល កាលពីថ្ងៃចន្ទ។
នាង Sulli ដែលមានឈ្មោះពិត Choi Jin-ri ត្រូវបានប្រទះឃើញដេកស្លាប់ដោយភ្នាក់ងាររបស់នាង នៅវេលាម៉ោង ៣ និង២១នាទីរសៀល នៅក្នុងផ្ទះ២ជាន់ ស្ថិតនៅទីក្រុង Seongnam ខេត្ត Gyeonggi ។
នាង Sulli ទទួលបានប្រជាប្រិយភាពយ៉ាងខ្លាំង ពេលដែលនាងបង្ហាញខ្លួននៅក្នុងក្រុមតារាចម្រៀងស្រីកូរ៉េ f(x)ប៉ុន្តែនាងបានចាកចេញពីក្រុមមួយនេះវិញ កាលពីឆ្នាំ២០១៤ ។
ដោយឡែក មូលហេតុដែលបណ្តាលឲ្យនាងស្លាប់ Sulli មិនត្រូវបានគេទម្លាយឲ្យដឹងភ្លាមៗនោះទេ។
ក្រោយពីការចាកចេញពីក្រុម f(x) នាង Sulli បានវិលត្រឡប់មករកការសម្តែងវិញ គឺជាអាជីពដែលនាងធ្លាប់បានបង្ហាញខ្លួននៅក្នុងខ្សែភាពយន្តជាច្រើន អំឡុងកាលនៅវ័យកុមាររបស់នាង។
នៅវ័យ១១ឆ្នាំ នាង Sulli ទទួលបានការចាប់អារម្មណ៍យ៉ាងខ្លាំងជាតារាសម្តែងកូនក្មេង ដោយបានដើរតួជាម្ចាស់ក្សត្រី Seonhwa នៃវិមាន Sillaនៅក្នុងរឿង “Ballad of Seodong”របស់ទូរទស្សន៍ SBS ក្នុងឆ្នាំ២០០៥។
បន្ទាប់ពីភាពលេចធ្លោ នាង Sulli បន្តសម្តែងនៅក្នុងរឿងភាគទូរទស្សន៍ និងខ្សែភាពយន្តជាច្រើនទៀត ដែលរួមទាំងរឿងVacation, Punch Lady ឆ្នាំ២០០៦ និងរឿង The Flower Girl is Here ឆ្នាំ២០០៧ និងរឿង BABO ឆ្នាំ២០០៨។
នៅខែសីហា ឆ្នាំ២០១២ នាង Sulli បានសម្តែងជាតួឯកនៅក្នុងរឿង “To the Beautiful You”ដោយនាងដើរតួអង្គនាង Gu Jae-hee ៕
Home ព័ត៌មានអន្តរជាតិ តារាសម្តែងស្រីកូរ៉េ Sulli ប្រទះឃើញដេកស្លាប់ក្នុងផ្ទះដោយគ្មានមូលហេតុច្បាស់លាស់