កាលពីពេលកន្លងទៅនេះ សារព័ត៌មានរដ្ឋកូរ៉េខាងជើង បានបញ្ចេញរូបថតឃើញមេដឹកនាំកូរ៉េខាងជើង លោកគីម ជុងអ៊ុន ជិះសេះ.ស ឡើងភ្នំពិសិដ្ឋ ប៉េកទូ របស់ប្រទេសមួយនេះ។
លោកគីម តែងតែទៅលេងភ្នំមួយនេះ ដែលជាភ្នំខ្ពស់ជាងគេបំផុតនៅតំបន់ឧបទ្វីប មុនពេលធ្វើការសម្រេចចិត្តធំៗ ដែលរួមទាំងការប្រហារជីវិតឪពុកមាដ៏មានអំណាចរបស់លោកកាលពីឆ្នាំ២០១៣ ហើយនិងការបើកច្រកការទូតជាមួយទីក្រុងសេអ៊ូល និងទីក្រុងវ៉ាស៊ីងតោន កាលពីឆ្នាំ២០១៨។
ឯកសារកូរ៉េខាងជើង បានកត់ត្រាថា ជីតារបស់លោកគីម និងជាស្ថាបនិកបង្កើតកូរ៉េខាងជើងលោកគីម អ៊ីលស៊ុង មាននូវមូលដ្ឋានទ័ពព្រៃប្រឆាំងនឹងជ៉ប៉ុន នៅលើជម្រាលភ្នំប៉េកទូ អំឡុងការគ្រប់គ្រងរបស់អាណានិគមន៍ជប៉ុនឆ្នាំ១៩១០-៤៥ នៅតំបន់ឧបទ្វីបកូរ៉េ។
ជីវប្រវត្តិរូបផ្លូវការរបស់ឪពុកលោកគីម គឺលោកគីម ជុងអ៊ីល បានកត់ត្រាថា មេដឹកនាំជំនាន់ទី២រូបនេះ បានកើតនៅលើភ្នំប៉េកទូ ពេលដែលមានឥន្ធនូ។
ដោយឡែក សេះ.ស ក៏ជានិមិត្តរូបឃោសនាសម្រាប់គ្រួសារគីម ផងដែរ ដែលបានគ្រប់គ្រងកូរ៉េខាងជើងអស់រយៈពេល៧ទសវត្សរ៍មកហើយ។
សារព័ត៌មានរដ្ឋកូរ៉េខាងជើងតែងតែបង្ហាញរូបលោកគីម ប្អូនស្រីរបស់គាត់ និងឪពុករបស់គាត់ជិះសេះ.ស ។
ទីភ្នាក់ងារព័ត៌មានរដ្ឋកូរ៉េខាងជើង KCNA បានរាយការណ៍ផងដែរថា លោកគីម បានទៅលេងសំណង់អគារស្ថិតនៅក្នុងស្រុកសាមជីយ៉ុន និងបានតវ៉ានឹងទណ្ឌកម្មអង្គការសហប្រជាជាតិ ដែលដឹកនាំដោយសហរដ្ឋអាមេរិក មកលើប្រទេសរបស់លោក ដោយសារតែកម្មវិធីមីស៊ីល និងនុយក្លេអ៊ែររបស់ពួកគេនោះ៕
Home ព័ត៌មានអន្តរជាតិ លោកគីម ជុងអ៊ុន ជិះសេះ.សឡើងភ្នំពិសិដ្ឋប៉េកទូ ជាប្រផ្នូលអាក្រក់ ឫ ល្អ សម្រាប់ពិភពលោក ?