កាលពីពេលកន្លងទៅ កំពូលយន្តហោះប៊ូអ៊ីង 737 MAX របស់អាមេរិក ត្រូវបានហាមឃាត់មិនឲ្យហោះ ហើរនៅទូទាំងពិភពលោក ក្រោយហេតុការណ៍ធ្លាក់យន្តហោះនៅអេត្យូពី ដែលបានសម្លាប់ជីវិតមនុស្សចំនួន ១៥៧ នាក់ កាលពីដើមខែមីនា ឆ្នាំ២០១៩ ។
ថ្មីៗនេះ ក្រុមហ៊ុនយក្សអាមេរិក Boeing បានប្រកាសថា ខ្លួននឹងផ្អាកការផលិតយន្តហោះត្រកូល 737 MAX ចាប់ពីខែមករា ឆ្នាំ២០២០ ខាងមុខនេះតទៅហើយការសម្រេចចិត្តផ្អាកផលិតកម្មរបស់យន្តហោះ 737 MAX គឺត្រូវបានធ្វើឡើងដោយយោងលើកត្តាសំខាន់ៗមួយចំនួន ក្នុងនោះមានទាំងការពន្យារពេល ផ្តល់អាជ្ញាធរសុវត្ថិភាពពីសំណាក់ប្រតិបត្តិករអាកាសចរណ៍អាមេរិក រហូតដល់ឆ្នាំ២០២០ ក៏ដូចជាភាពមិនច្បាស់លាស់នៃការកំណត់ពេលវេលា ដើម្បីអនុញ្ញាតឲ្យយន្តហោះ Boeing 737 MAX នៅទូទាំងពិភពលោកអាចធ្វើប្រតិបត្តិការវិញជាដើម។
គួរបញ្ជាក់ដែរថា បន្ទាប់ពីគ្រោះថ្នាក់ធ្លាក់យន្តហោះនៅឥណ្ឌូណេស៊ី ដែលបាននាំយកជីវិតមនុស្សចំនួន ១៨៩ នាក់ នាខែតុលា ឆ្នាំ ២០១៨ នោះដែរ ក្រុមហ៊ុនប៊ូអ៊ីង បានឲ្យដឹងថា ប្រព័ន្ធសញ្ញាត្រូវបានដកលែងឲ្យដំណើរការ លុះត្រាណាតែក្នុងករណីបង់លុយបន្ថែម ទើបប្រព័ន្ធសញ្ញាមួយនេះអាចបើកឲ្យដំណើរការបាន។ ក្រុមអ្នកជំនាញរកឃើញថា ក្រុមហ៊ុនប៊ូអ៊ីង បានសម្រេចលុបចោលប្រព័ន្ធសញ្ញាជំនួយ នៅលើយន្តហោះ737 MAX ដោយមិនបានប្រាប់ព័ត៌មានលម្អិតទៅកាន់អតិថិជនរបស់ខ្លួន ហើយនេះជាមូលហេតុដែលគេសង្ស័យថាធ្វើឲ្យយន្តហោះធ្លាក់។