នៅថ្ងៃសុក្រ ទី៣ ខែមករាកន្លងមកនេះ កងកម្លាំងសហរដ្ឋអាមេរិក ដោយមានការបង្គាប់បញ្ជាដោយផ្ទាល់ពីលោកប្រធានាធបិតីដូណាល់ ត្រាំ បានប្រើប្រាស់ដ្រូន បាញ់មីស៊ីល៤គ្រាប់មកលើក្បួនរថយន្ត២គ្រឿងរបស់លោកឧត្តមសេនីយ៍ កាសេម សូឡេម៉ានី គឺជាមេបញ្ជាការកងកម្លាំងសម្រាំងឃូដ នៃក្រុមឆ្មាំបដិវត្តន៍អ៊ីរ៉ង់ នៅក្បែរនឹងអាកាសយានដ្ឋានអន្តរជាតិក្រុងបាដាដ ប្រទេសអ៊ីរ៉ាក់ ធ្វើឲ្យរូបលោក និងមន្ត្រីយោធា៤នាក់ផ្សេងទៀត បាត់បង់ជីវិត ក្រោយពីរូបលោកធ្វើដំណើរមកពីប្រទេសស៊ីរី ដែលប្រតិកម្មបាញ់សម្លាប់មន្ត្រីយោធាកំពូលមួយរូបរបស់អ៊ីរ៉ង់នេះ សម្រេចបានជោគជ័យក្រោយពីមន្ត្រីយោធាសហរដ្ឋអាមេរិក ទទួលបានរបាយការណ៍ចារកិច្ចពីអ៊ីស្រាអែល និងអារ៉ាប៊ីសាអូឌីត ដែលជាប្រទេសបច្ចាមិត្តជាមួយទីក្រុងតេអេរ៉ង់។
ការស្លាប់របស់លោកកាសេម គឺជាជោគជ័យដ៏ធំមួយសម្រាប់រដ្ឋបាលរបស់លោកដូណាល់ ត្រាំ បើទោះបីជាមានការជំទាស់ពីក្រុមប្រជាធិបតេយ្យក៏ដោយ ដោយសារតែពួកគេខ្លាចក្រែងមានសង្គ្រាមជាមួយអ៊ីរ៉ង់។ មន្ទីរបច្ចកោណបានប្រកាសការស្លាប់របស់លោកកាសេម ថាជាជោគជ័យដ៏ធំមួយ ព្រោះនាយឧត្តមសេនីយ៍កំពូលមួយរូបនេះគឺជាអ្នកឈរនៅពីក្រោយការបាត់បង់អាយុជីវិតពលរដ្ឋអាមេរិករាប់រយនាក់នៅក្នុងតំបន់មជ្ឈិមបូព៌ា ជាពិសេសកាលវាយប្រហារកាលពីពេលថ្មីៗនេះ មកលើមូលដ្ឋានទ័ពអាមេរិកនៅក្នុងប្រទេសអ៊ីរ៉ាក់ ដែលបានសម្លាប់មន្ត្រីជាប់កិច្ចសន្យាអាមេរិកម្នាក់ និងការវាយប្រហារដោយក្រុមបាតុករមកលើស្ថានទូតអាមេរិកប្រចាំនៅទីក្រុងបាដាដ ស្ថិតនៅក្នុងតំបន់សុវត្ថិភាពបៃតង។ទោះបីជាយ៉ាងណាក៏ដោយ ការស្លាប់របស់លោកកាសេម បានក្លាយជាការបាត់បង់ដ៏ធំមួយសម្រាប់អ៊ីរ៉ង់ ពិសេសគឺមេដឹកនាំកំពូលអាមេរិកលោក អាប់តូឡា អាលី ខាមេណេ ដោយសារតែលោកកាសេម គឺជាសេនាដៃស្តាំមួយរូបរបស់លោក អាលី។ ទាំងលោកអាលី និងរដ្ឋមន្ត្រីការបរទេសអ៊ីរ៉ាង់ លោកចាវ៉ាដ ហ្សារីហ្វ បាននិយាយថា នឹងសងសឹកដល់ទីបញ្ចប់ចំពោះអ្នកឈរនៅពីក្រោយការស្លាប់របស់លោកកាសេម ដែលការព្រមានចំៗបែបនេះ បានធ្វើឲ្យមានការព្រួយដល់ការផ្ទុះសង្គ្រាមរវាងអ៊ីរ៉ង់ និងសហរដ្ឋអាមេរិក ដែលតាមភាសាការទូត ពួកគេកំពុងជាប់ជម្លោះ និងសង្គ្រាមដ៏រ៉ាំរ៉ៃទៅហើយ ក្រោយពីលោកត្រាំ ប្រកាសដកទីក្រុងវ៉ាស៊ីងតោនចេញពីកិច្ចព្រមព្រៀងនុយក្លេអ៊ែរអ៊ីរ៉ងឆ្នាំ២០១៥ កាលពីខែឧសភា ឆ្នាំ២០១៨កន្លងទៅ។លោកកាសេម បានកសាងស្នាដៃជាច្រើននៅក្នុងអាណត្តិជាមេបញ្ជាការកងកម្លាំងសម្រាំងឃូដ ចាប់តាំងពីលោកទទួលបានការតែងតាំងកាលពីឆ្នាំ១៩៩៨។ ស្នាដៃធំបំផុតរបស់លោក គឺលោកបានរួមចំណែកដ៏សំខាន់ក្នុងការផ្តួលរំលំក្រុម ISISនៅក្នុងប្រទេសអ៊ីរ៉ាក់ និងស៊ីរី តែផ្ទុយទៅវិញ រូបលោកត្រូវបានអាមេរិកចាត់ទុកថាជាអ្នកគាំទ្រក្រុមភេរវកម្ម ដោយហេតុថា កម្លាំងឃូដ គឺជាគាំទ្រក្រុមឧទ្ទាមហេសប៊ូឡា នៅប្រទេសលីបង់ និងអ៊ីរ៉ាក់ ហើយនិងក្រុមជីហាដនៅប៉ាឡេស្ទីន អាហ្វហ្កានីស្ថាន និងយេម៉ែនជាដើម ដោយពួកគេជាអ្នកផ្គត់ផ្គង់អាវុធ និងបង្វឹកក្រុមសកម្មប្រយុទ្ធទាំងអស់នោះ។តើសង្គ្រាមពិតជានឹងផ្ទុះឡើងរវាងអាមេរិក និងអ៊ីរ៉ង់ឬ ស្របពេលដែលទីក្រុងតេអេរ៉ង់ សន្យាថានឹងសងសឹកដល់ទីបញ្ចប់បែបនេះ? ហេតុ និងផល គឺរង់ចាំមើលថាតើអ្វីទៅជាគោលដៅនៃការសឹករបស់អ៊ីរ៉ង ឬមួយអ៊ីរ៉ង់ត្រូវប្រើប្រាស់កាំភ្លើងធំរបស់ខ្លួនដើម្បីសងសឹក?
ក្រុមអ្នកវិភាគបាននិយាយថា គោលដៅនៃការសងសឹករបស់អ៊ីរ៉ង់ អាចជាគោលដៅមកលើមូលដ្ឋានយោធាសហរដ្ឋអាមេរិក នៅក្នុងតំបន់មជ្ឈិមបូព៌ា ពិសេសគឺពេលរដ្ឋអាមេរិកនៅក្នុងប្រទេសអ៊ីរ៉ាក់តែម្តង ស្របពេលដែលក្រសួងការពារជាតិអាមេរិក បានបញ្ជាឲ្យពលរដ្ឋអាមេរិក ទាំងអស់ត្រូវជម្លៀសចេញពីប្រទេសអ៊ីរ៉ាក់ឲ្យបានឆាប់រហ័សបំផុតតាមដែលអាចធ្វើទៅបាន ដែលការអះអាងបែបនេះ គេអាចព្យាករណ៍បានថា សង្គ្រាមយូរមិនឆាប់ គឺមិនអាចគេចផុតនោះឡើយ ពីការផ្ទុះនៅក្នុងប្រទេសអ៊ីរ៉ាក់ ហើយភាគីដែលរងគ្រោះខ្លាំងជាងគេបំផុត ប្រហែលជាមិនមែនជាអាមេរិក និងអ៊ីរ៉ង់នោះទេ តែជាអ្នកដែលរស់នៅក្នុងប្រទេសអ៊ីរ៉ាក់នេះតែម្តង ខណៈពេលដែលប្រទេសមួយនេះ នៅកំពុងមានការបែងចែក និងភាពរំជើបរំជួលផ្នែកនយោបាយ និងសង្គ្រាមនោះ៕
