ការរុករករបស់បុរាណវិទូមិនចេះចប់មិនចេះហើយ ព្រោះតែវត្ថុបុរាណដែលបានបន្សល់ទុកពីសម័យមុនមានច្រើនសន្ធឹក ហើយបើគិតពីតម្លៃរបស់វត្ថុទាំងនោះវិញគឺមានតម្លៃខ្ពស់កប់ពពកតែម្តង ត្បិតអីវាជារបស់ដែលកម្រ និងមានអាយុកាលដល់ទៅរាប់ពាន់ឆ្នាំ។
ដោយឡែកកាលពីពេលកន្លងទៅនេះ អ្នកបុរាណវិទូ បានរកឃើញគ្រឿងអលង្ការលាក់ទុក មានអាយុកាល ២.៨០០ឆ្នាំ នៅកន្លែងកប់ខ្មោចមួយកន្លែង នៅតំបន់ភ្នំ Tarbagatai ក្នុងប្រទេសកាហ្សាក់ស្ថាន។ហើយគ្រឿងអលង្កការដែលរកឃើញទាំងនោះមានចំនួន ៣០០ដុំ ហើយវាត្រូវបានគេចាត់ទុកថាជា វត្ថុមានតម្លៃបំផុត និងជារបស់គ្រួសាររាជវង្ស ឬសមាជិកវរជននៃ ក្រុមមនុស្សសាកា ដែលត្រូវគេចាប់យកទៅអាស៊ីកណ្តាល សតវត្សទី ៨មុនគ្រឹស្តសករាជ។យ៉ាងណាមិញ វត្ថុដែលត្រូវបានរកឃើញទាំងនោះរួមមាន ក្រវិល កណ្តឹង បន្ទះមាស សន្លឹកលោហៈ ច្រវ៉ាក់ និងខ្សែកដែលមានបន្តោងមានតម្លៃខ្លាំង…ផងដែរ។
បើយោងតាមលោកសាស្ត្រាចារ្យ Zainolla Samashev ដែលទទួលបន្ទុកលើការរុករកនោះ បាននិយាយថា វត្ថុមានតម្លៃយ៉ាងច្រើនដែលរកឃើញនៅកន្លែងកប់ខ្មោច អាចធ្វើឲ្យពួកយើងជឿជាក់ថា បុរស និងស្ត្រី ត្រូវបានកប់នៅទីនោះ គឺជាម្ចាស់នៃវត្ថុមានតម្លៃមហាសាលទាំងនោះ៕
