ស្ត្រីជាម្តាយ និងកូន៣នាក់របស់នាងដែលបានបាត់ខ្លួននោះ ត្រូវបានគេសង្គ្រោះហើយក្រោយរយៈពេលជាង១ខែនៅក្នុងព្រៃអាម៉ាហ្សូន។មនុស្សមួយគ្រួសារនេះត្រូវបានជួយសង្គ្រោះដោយកុលសម្ព័ន្ធជនភាគតិច ទាំងរូបរាងកាយរបស់ពួកគេស្គមរីងរីដុចគ្រោងឆ្អឹងមនុស្សទោហើយ ពោលគឺពួកគេទាំង៤នាក់ ស្ថិតនៅក្នុងស្ថានភាពខ្វះអាហារូបត្ថម្ភធ្ងន់ធ្ងរ និងខ្វះជាតិទឹក។
ក្មេងៗដែលមានអាយុ១០ឆ្នាំ ១២ឆ្នាំ និង១៤ឆ្នាំ ត្រូវបានគេរកឃើញឆ្លងជំងឺបារ៉ាសិត ជាកន្លែងដែលសត្វដង្កូវចាប់ផ្តើមចោះលើស្បែករបស់ពួកគេផងដែរ។កាសែត El Tiempo បានរាយការណ៍ថា ក្រុមសាក្សី បាននិយាយថា ក្មេងម្នាក់ក្នុងចំណោមក្មេងទាំង៣នាក់ បានដង្កូវចោះលើស្បែកប៉ុនកាក់ ដោយដុះចេញពីក្បាលរបស់គេ។អ្នកស្រី María Pérez វ័យ៤០ឆ្នាំ និងស្វាមី Puerto Leguízamo មកពីប្រទេសកូឡុំប៊ី បានបំពេញវិស្សមកាលជាមួយកូនៗរបស់ពួកគេ នៅក្នុងតំបន់ដាច់ស្រយាល La Esperanza ជាប់ព្រំដែនប្រទេសប៉េរូ ។ គេគិតថា អ្នកស្រី María ហើយនិងកូនៗរបស់នាងវង្វេងផ្លូវនៅត្រង់ចំណុចណាមួយ អំឡុងដំណើរកម្សាន្តរបស់ពួកគេ ក្នុងនោះក៏មានសេចក្តីរាយការណ៍ថា ពួកគេអាចនឹងវិលត្រឡប់ទៅផ្ទះវិញ ក្រោយពីចាកចេញពីប្តីរបស់នាង ជាកន្លែងដែលនាងធ្វើការក្នុងកសិដ្ឋាន។គ្រួសារមួយនេះ បានបាត់ខ្លួន កាលពីថ្ងៃទី១៩ ខែធ្នូ ក្រោយអ្នកស្រី María បានលាប្តីរបស់នាង ។ បុរសជាប្តី ដែលមិនត្រូវបានបង្ហាញឈ្មោះ មិនបានទទួលដំណឹងពីការបាត់ខ្លួនគ្រួសាររបស់គាត់នោះឡើយ រហូតដល់លោកឃើញគេបង្ហោះព័ត៌មាននៅលើបណ្តាញព័ត៌មានសង្គម ចេញពីតំបន់សហគមន៍ជនជាតិភាគតិច Secoya នៅក្នុងប្រទេសប៉េរូ ថាមានមនុស្ស៤នាក់ ត្រូវបានគេរកឃើញនៅក្នុងដែនដីរបស់ពួកគេ។នៅលើរូបភាពដែលបានបង្ហោះជាមួយនឹងសារ ឃើញគ្រួសារមួយនេះដេកលើដី ក្នុងអក្ការៈអត់ឃ្លាន និងគ្របដណ្តប់ដោយស្នាមរយះពេញខ្លួន។ ពួកគេរស់រានក្នុងព្រៃដោយគ្មានអ្វីទទួលទានឡើយ ក្រៅពីផ្លែឈើព្រៃ អស់រយៈពេល៣៤ថ្ងៃ។
យោងតាមសេចក្តីរាយការណ៍ បានឲ្យដឹងថា កងទ័ពជើងទឹកជាតិកូឡុំប៊ី និងកងទ័ពជើងទឹកប៉េរូ បានចូលរួមប្រតិបត្តិការជួយសង្គ្រោះនេះ ជាមួយនឹងការដាក់ពង្រាយនាវាតាមដងទន្លេ Putumayo ដែលជាដៃទន្លេអាម៉ាហ្សូន តភ្ជាប់ទៅកាន់ប្រទេសអេក្វាឌ័រ កូឡុំប៊ី និងប៉េរូ។នៅទីបញ្ចប់ពួកគេក៏បានជិះទូកទៅតំបន់សហគមន៍កុលសម្ព័ន្ធ ស្ថិតនៅក្នុងប្រទេសប៉េរូ ជាកន្លែងដែលពួកគេ បានប្រទះឃើញស្ត្រីជាម្តាយ និងកូន៣នាក់របស់នាងតែពួកគេជិតស្លាប់ទៅហើយ៕
