អនុប្រធានាធិបតីអ៊ីរ៉ង់ បានធ្វើតេស្ដរកឃើញមានផ្ទុកវីរុសកូរ៉ណា ឬកូវីដ-១៩ កាលពីថ្ងៃទី២៧ ខែកុម្ភ: ឆ្នាំ២០២០ ខណៈប្រទេសនេះ កំពុងតែប្រយុទ្ធប្រឆាំងនឹងការរីករាលដល់ នៃជំងឺរលាកផ្លូវដង្ហើម ប្រភេទថ្មី ហើយទាំងមន្រ្ដីរដ្ឋាភិបាល និងប្រជាពលរដ្ឋកំពុងតែភ័យខ្លាច ហើយព្រួយបារម្ភកាន់តែខ្លាំងឡើង។
លោកស្រី ម៉ាស៊ូមេហ៍ អេបតាការ ( Masoumeh Ebtakar) អនុ ប្រធានាធិបតីអ៊ីរ៉ង់ ទទួលបន្ទុកការងារស្រ្ដី និងគ្រួសារ ត្រូវបាន ធ្វើតេស្ដរកឃើញ មានផ្ទុកនូវវីរុសកូរ៉ូណា។ លោកស្រីក្លាយជាមន្រ្ដីជាន់ខ្ពស់របស់អ៊ីរ៉ង់លើកដំបូងបង្អស់ ផ្ទុកនូវវីរុសរលាកផ្លូវដង្ហើមប្រភេទថ្មី។ លោកស្រី ធ្លាប់ចូលរួមប្រជុំជាមួយលោកប្រធានាធិបតីអ៊ីរ៉ង់ ហាស្សាន់ រ៉ូហានី និងគណៈរដ្ឋមន្រ្ដី ហើយមន្រ្ដីជាច្រើនរូបផ្សេងទៀត កាលពីថ្ងៃទី២៦ ខែកុម្ភ:។
បណ្ដាញផ្សព្វផ្សាយក្នុងតំបន់ បានឲ្យដឹងថា ក្រោយពេលធ្វើតេស្ដរកឃើញវីរុសកូរ៉ូណារួចមក លោកស្រីអនុប្រធានាធិបតី បានសម្រាកព្យាបាលជំងឺ នៅក្នុងភូមិគ្រឹះរបស់លោកស្រី។ ដោយឡែកអ្នកដែលធ្លាប់នៅក្បែរ ឬមានទំនាក់ទំនងការងារជាមួយលោកស្រី ក៏កំពុងស្វះស្វែងទៅធ្វើតេស្ដផងដែរ។
ទោះជាយ៉ាងណាការពិនិត្យឃើញមានវីរុសនៅលើមន្រ្ដីជាន់ខ្ពស់របស់រដ្ឋាភិបាលអ៊ីរ៉ង់បែបនេះ ធ្វើឲ្យគេគិតថា ក្រៅពីលោកស្រីអនុប្រធានាធិបតី គឺមានលោកប្រធានាធិបតីអ៊ីរ៉ង់ និងមន្រ្ដីជាន់ខ្ពស់ដទៃទៀត ក៏អាចនឹងឆ្លងវីរុសដ៏កាចសាហាវនេះផងដែរ ព្រោះមន្រ្ដីជាន់ខ្ពស់ទាំងអស់នោះ មានទំនាក់ទំនងគ្នាជាមួយនឹងលោកស្រីអនុប្រធានាធិបតី។ កាលពីថ្ងៃទី២៥ ខែកុម្ភ:កន្លងទៅថ្មីៗនេះ លោក អ៊ីរ៉ាច ហារីឈី (Irah Harirchi) អនុរដ្ឋមន្រ្ដីក្រសួងសុខាភិបាលអ៊ីរ៉ង់ ក៏ធ្វើតេស្ដរកឃើញមានផ្ទុកវីរុសកូរ៉ូណាផងដែរ។
បើគិតត្រឹមថ្ងៃទី២៨ ខែកុម្ភ: ឆ្នាំ២០២០ នៅក្នុងប្រទេសអ៊ីរ៉ង់ មានអ្នកឆ្លងវីរុសកូរ៉ូណា ចំនួន២៤៥នាក់ និងមានអ្នកស្លាប់ដោយសារជំងឺដ៏កាចសាហាវនេះ ចំនួន២៦នាក់៕