នាយករដ្ឋមន្រ្ដីស៊ូដង់បានរងការវាយប្រហារ ដោយការបំផ្ទុះគ្រាប់លើក្បួនរថយន្ដរបស់លោក កាលពីថ្ងៃទី៩ ខែមីនា នៅទីក្រុង Khartoum ប៉ុន្ដែមិនបានបង្កឲ្យមានគ្រោះថ្នាក់ដល់មនុស្សណាម្នាក់នោះឡើយ។
មន្រ្ដីការិយាល័យរបស់លោកនាយករដ្ឋមន្រ្ដីស៊ូដង់ បានថ្លែងថា នាយករដ្ឋមន្រ្ដី Hamdok មានសុវត្ថិភាព។ ប៉ុន្ដែនៅក្នុងហេតុការណ៍បំផ្ទុះគ្រាប់នោះ មិនមានអ្នកណាម្នាក់រងរបួស ឬស្លាប់នោះឡើយ។
លោក Abdalla Hamdok នាយករដ្ឋមន្រ្ដីស៊ូដង់ កាលពីថ្ងៃទី៩ ខែមីនា បានថ្លែងថា រូបលោកបានរងការបំផ្ទុះគ្រាប់ ប៉ុនប៉ងមកលើអាយុជីវិតរបស់លោក។ ប៉ុន្ដែសកម្មភាពនេះមិនអាចបញ្ឈប់ក្បួនរថយន្ដរបស់លោក នៅក្នុងខេត្ត Khartoum នោះឡើយ។ 
លោកនាយករដ្ឋមន្រ្ដី បានសរសេរនៅលើបណ្ដាញសង្គម Twitter ថា ក្រោយការបំផ្ទុះគ្រាប់នោះ លោកនៅមានសុវត្ថិភាព និងលោកមានសុខភាពល្អ ជាធម្មតា។ អ្វីដែលបានកើតឡើងនឹងមិនអាចបញ្ឈប់ការដើរក្បួន សម្រាប់ការផ្លាស់ប្តូរបានទេ ហើយវានឹងផ្តល់នូវការជំរុញបន្ថែមដល់រលកបដិវត្តន៍ដ៏ខ្លាំងក្លានេះ។
បណ្ដាញផ្សព្វផ្សាយ ក្នុងតំបន់ បានឲ្យដឹងថា ការវាយប្រហារនោះ បានកើតឡើង នៅចុងខាងជើង នៃស្ពាន Kober ដែលតភ្ជាប់ទៅភាគខាងជើង នៃទីក្រុង Khartoum ។ នៅក្នុងហេតុការណ៍នោះ បានបណ្ដាលឲ្យរថយន្ដរបស់លោកនាយករដ្ឋមន្រ្ដីរងការខូចខាតយ៉ាងដំណំ។ 
ទោះជាយ៉ាងណា ការវាយប្រហារទៅលើក្បួនរថយន្ដរបស់លោកនាយករដ្ឋមន្រ្ដីខាងលើនេះ មិនទាន់មានក្រុមណាមួយចេញមុខ មកទទួលខុសត្រូវនោះឡើយ៕
