រហូតមកដល់វេលាម៉ោង៤ព្រឹក ថ្ងៃទី២៥ ខែមីនា ឆ្នាំ២០២០ (ម៉ោងនៅកម្ពុជា) ប្រទេសឡាវ និងមីយ៉ាន់ម៉ា ក្លាយជាប្រទេស នៅក្នុងតំបន់អាស៊ីភាគអាគ្នេយ៍ ឬហៅកាត់ អាស៊ាន ចុងក្រោយគេ រកឃើញ មានអ្នកឆ្លងវីរុសរលាកផ្លូវដង្ហើមប្រភេទថ្មី ឬវីរុសកូរ៉ូណា (កូវីដ-១៩)។
ក្នុងចំណោមបណ្ដាប្រជាជាតិអាស៊ាននោះ គឺប្រទេសម៉ាឡេស៊ីមានអ្នកឆ្លងរហូតដល់ ១៦២៤នាក់។ ក្នុងចំណោមអ្នកឆ្លងទាំងអស់ មានអ្នកឆ្លងថ្មីចំនួន១០៦នាក់ អ្នកព្យាបាលបានជាសះស្បើយចំនួន១៨៣នាក់ និងស្លាប់ចំនួន១៦នាក់។ រីឯប្រទេសថៃវិញ មានករណីឆ្លងថ្មី ចំនួន១០៦ ធ្វើឲ្យប្រទេសនេះមានចំនួនអ្នកឆ្លងកើនឡើងដល់៨២៧នាក់ ក្នុងនោះ មានអ្នកជាសះស្បើយចំនួន៥២នាក់ និងស្លាប់៤នាក់។
ដោយឡែកឥណ្ឌូនេស៊ីវិញ មានអ្នកឆ្លងវីរុសកូវីដ-១៩ កើនឡើងរហូតដល់៦៨៦នាក់ ក្នុងនោះអ្នកជាសះស្បើយចំនួន៣០នាក់។ ប៉ុន្ដែប្រទេសនេះ មានអ្នកស្លាប់ដោយសារវីរុសកូវីដ-១៩ច្រើនជាងគេបំផុត នៅក្នុងតំបន់អាស៊ាន ដោយមានអ្នកស្លាប់កើនឡើងរហូតដល់៥៥នាក់។
ប្រទេសសិង្ហបុរី មានអ្នកឆ្លងថ្មីចំនួន៥៤នាក់ ធ្វើឲ្យចំនួនអ្នកឆ្លងកើនឡើងដល់៥៥៨នាក់ ហើយក្នុងចំណោមអ្នកឆ្លងវីរុសកូវីដ-១៩ទាំងនោះ មាន១៥៦នាក់ព្យាបាលជាសះស្បើយ និង២នាក់បានស្លាប់។ រីឯប្រទេសហ្វីលីពីន មានអ្នកឆ្លងថ្មីចំនួន៩០នាក់ ធ្វើឲ្យចំនួនអ្នកឆ្លងកើនឡើង រហូតដល់៥៥២នាក់។ ប៉ុន្ដែក្នុងចំណោមអ្នកជំងឺទាំងនោះព្យាបាលបានជាសះស្បើយ ចំនួន២០នាក់ និងមានអ្នកស្លាប់កើនឡើង៣៥នាក់។
ដោយឡែក ប្រទេសវៀតណាមមានអ្នកឆ្លងកើនឡើងដល់១៣៤នាក់ និងព្យាបាលជាសះស្បើយចំនួន១៧នាក់។ ប្រទេសប៊្រុយណេ មានអ្នកឆ្លង១០៤នាក់ និងមានអ្នកព្យាបាលជាសះស្បើយចំនួន២នាក់។ កម្ពុជាមានអ្នកឆ្លងកើនឡើងដល់៨៧នាក់ និងមានអ្នកជាសះស្បើយ ចំនួន២នាក់។
ជាមួយគ្នានេះឡាវ និងមីយ៉ាន់ម៉ា ជាប្រទេសចុងក្រោយ នៅក្នុងតំបន់អាស៊ាន ទើបនឹងរកឃើញមានឆ្លងវីរុសកូវីដ-១៩ ក្នុងនោះឡាវមានអ្នកឆ្លង២នាក់ និងមីយ៉ាន់ម៉ា មានអ្នកឆ្លងចំនួន៣នាក់។
បើគិតត្រឹមវេលាខាងលើនេះ បណ្ដាប្រជាជាតិអាស៊ានទាំង១០ មានអ្នកឆ្លងវីរុសកូវីដ-១៩ បន្ដកើនឡើងរហូត ដល់៤៥៨១នាក់ ក្នុងចំណោមអ្នកជំងឺទាំងនោះ មានអ្នកស្លាប់ចំនួន១១២នាក់ និងអ្នកព្យាបាលបានជាសះស្បើយចំនួន៤៦៤នាក់៕
