ដោយសារកន្លងមក មានគ្រូពេទ្យនៅតាមបណ្ដាប្រទេសជាច្រើន នៅជុំវិញពិភពលោកបានឆ្លងកូវីដ-១៩ ទើបគ្រូពេទ្យថៃបានសម្រេចចិត្តប្រើប្រាស់មនុស្សយន្ត «រ៉ូបូត» សម្រាប់ជួយតាមដាន និងព្យាបាលអ្នកជំងឺ នៃកូវីដ-១៩។
បណ្ដាផ្សព្វផ្សាយថៃ បានឲ្យដឹងថា មនុស្សយន្ដរ៉ូបូតនិនចានេះអាចជួយសម្រួលការងារជាច្រើនជំនួសក្រុមគ្រូពេទ្យ ដូចជា វាស់កម្ដៅឲ្យអ្នកជំងឺ និងព្យាបាលអ្នកជំងឺជាដើម។ ក្រៅពីនេះនៅលើរ៉ូបូតនិនចានេះមានអេក្រង់សម្រាប់ឲ្យក្រុមគ្រូពេទ្យអាចសន្ទនា ឬសាកសួរអំពីអាការផ្សេងរបស់អ្នកជំងឺបានថែមទៀតផង។
ប្រភព័ត៌មានដដែល បានបន្ដថា មុនពេលដំបូង មនុស្សយន្ដនេះ គឺប្រើប្រាស់សម្រាប់តែមើល និងថែទាំអ្នកជំងឺតែប៉ុណ្ដោះ។ ប៉ុន្ដែដោយសារតែក្រុមគ្រូពេទ្យមានការខ្លាចឆ្លងវីរុសដ៏កាចសាហាវនេះ ទើបក្រុមនិស្សិតជំនាញ មកពីសាកលវិទ្យាល័យចូឡាឡុងកន នៅទីក្រុងបាងកក បានសម្រេចបន្ថែមមុខងាររបស់មនុស្សយន្ត សម្រាប់បម្រើ និងព្យាបាលអ្នកជំងឺកូវីដ-១៩។
ទោះជាយ៉ាងណា រហូតមកដល់ពេលនេះ នៅក្នុងប្រទេសថៃ មានមន្ទីរពេទ្យចំនួន៤កន្លែង បានប្រើប្រាស់មនុស្សយន្ដនេះ ហើយទៅថ្ងៃខាងមុខ ថៃនឹងដាក់មនុស្សយន្ដដ៏ទំនើបនេះ នៅតាមមន្ទីរពេទ្យចំនួន១០ទៀត។
បើគិតត្រឹមវេលាម៉ោង៥ព្រឹក ថ្ងៃទី២៦ ខែមីនា ឆ្នាំ២០២០ ថៃមានអ្នកឆ្លងកូវីដ-១៩ សរុបកើនឡើងដល់៩៥០នាក់ ឈរលំដាប់ទីពីរ នៃអ្នកឆ្លងកូវីដ-១៩ នៅតំបន់អាស៊ាន បន្ទាបពីប្រទេសម៉ាឡេស៊ី ។
ក្រសួងសុខាភិបាលថៃ បានប្រកាសថា គិតត្រឹមថ្ងៃត្រង់ ថ្ងៃទី២៥ ខែមីនា មានអ្នកឆ្លងកូវីដ-១៩ ថ្មីចំនួន១០៧នាក់បន្ថែមទៀត។ ប៉ុន្ដែបើនិយាយពីតំបន់អាស៊ានទាំង១០ប្រទេស មានអ្នកឆ្លងកូវីដ-១៩ សរុប ៤៨៦២ ក្នុងនោះមានស្លាប់១១៣នាក់ និងជាសះស្បើយ៤៨២នាក់៕