ចាប់តាំងពីទឹកដីអាមេរិកបានរងការរាតត្បាតដោយវីរុសកូវីដ-១៩ ហើយមានមនុស្សជាង៦៥ពាន់នាក់ បានឆ្លង វីរុសនេះ ក្នុងនោះមានអ្នកស្លាប់ជាង៩៣០នាក់នោះមកអាមេរិកបានមួម៉ៅ ហើយចោទប្រកាន់ចិនជាអ្នកលាក់បាំងព័ត៌មានជុំវិញរឿងវីរុសដ៏កាចសាហាវនេះ ដោយប្រធានាធិបតីអាមេរិក បានហៅកូវីដ-១៩ជា «វីរុសចិន» ថែមទៀតផង។
លោក ដូណាល់ ត្រាំ ប្រធានាធិបតីអាមេរិក កាលពីកន្លងទៅថ្មីៗនេះ បានចោទប្រកាន់ចិន ជាអ្នក បាំងនូវ ព័ត៌មានពិតស្ដីអំពីវីរុសរលាកផ្លូវដង្ហើមប្រភេទថ្មី ឬវីរុសកូរ៉ូណា (កូវីដ-១៩) ទើបបង្កឲ្យវីរុសដ៏កាចសាហាវ នេះបន្ដឆ្លងរាតត្បាតពាសពេញពិភពលោកបែបនេះ។ លោក ត្រាំ បាហៅវីរុសកូវីដ-១៩ ថា «វីរុសចិន»។ ប៉ុន្ដែការហៅរបស់លោកប្រធានាធិបតី ត្រូវបានបណ្ដាមេដឹកនាំពិភពលោកទាំងមូល ថ្កោលទោសលោក ត្រាំ ដោយរួមទាំងអង្គការសុខភាពពិភពលោក (WHO)) ផងដែរ។
ស្របគ្នានេះដែរ លោក ម៉ៃឃ៍ ប៉ូមប៉េវ (Mike Pompeo) រដ្ឋមន្រ្ដីការបរទេសអាមេរិក ក៏បានចោទប្រកាន់ចិន ពីការលាក់បាំងព័ត៌មាន ពាក់ព័ន្ធនឹងកូវីដ-១៩។ អ្វីដែលោករដ្ឋមន្រ្ដីថ្លែង គឺស្រដៀងគ្នាទៅនឹងលោកប្រធានាធិបតីអាមេរិក ដូណាល់ ត្រាំ បានលើកឡើង។ លោក ត្រាំ បានថ្លែងថា ប្រសិនបើចិនមិនបានលាក់បាំងព័ត៌មានស្ដីអំពីវីរុសនេះ គឺអាមេរិកនឹងស្កាត់បានតាំងពីដំបូងមកម៉្លេះ។
សារព័ត៌មានរ៉យទ័រ បានផ្សាយថា លោក Mike Pompeo បានរិះគន់ថា រដ្ឋាភិបាលទីក្រុងប៉េកាំង បានបដិសេធការចែករំលែកព័ត៌មាន ដែលពិភពលោកត្រូវការជាចាំបាច់ ដើម្បីស្វែងរកវិធានាការនានា សម្រាប់ទប់ស្កាត់ការឆ្លងរាលដាល នៃវីរុសកូវីដ-១៩។
លោករដ្ឋមន្ត្រីក្រសួងការបរទេសអាមេរិក បានរំឭកឡើងវិញថា ដោយសារតែចិនមិនបានចែករំលែកព័ត៌មាន ទើបបង្កឲ្យមានការឆ្លងរាលដាល នៅពាសពេញពិភពលោកបែបនេះ។
ចាប់តាំងពីផ្ទុះឡើង នៃវីរុសកូវីដ-១៩នោះមក អាមេរិកបានខឹងសម្បា រករឿង ហើយទម្លាក់កំហុសទៅលើចិន រហូត។ បើគិតត្រឹមវេលាម៉ោង៧ព្រឹក ថ្ងៃទី២៦ ខែមីនា ឆ្នាំ២០២០ (ម៉ោងនៅកម្ពុជា) នៅលើទឹកអាមេរិក មានអ្នកឆ្លងវីរុសកូវីដ-១៩ ៦៥៦៥២នាក់ (ឆ្លងថ្មី ចំនួន១០៧៩៦) ។ ក្នុងចំណោមអ្នកជំងឺទាំងនោះ មានអ្នកព្យាបាលបានជាសះស្បើយ ៣៩៤នាក់ និងស្លាប់៩៣១នាក់៕