[wai id="8"]
[wai id="7"]
សហរដ្ឋអាមេរិកបានទុកពេលឱ្យចិន ៧២ម៉ោង ដើម្បីបិទស្ថានកុងស៊ុលរបស់ខ្លួននៅក្នុងទីក្រុង ហូស្តុន (Houston) នៃរដ្ឋតិចសាស់ ខណៈប្រធានាធិបតីអាមេរិកបង្ហើបថា ស្ថានកុងស៊ុលចិនដទៃទៀត ក៏ប្រឈមមុខនឹងការបិទទ្វារផងដែរ។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters នៅព្រឹកថ្ងៃព្រហស្បតិ៍ ទី២៣ ខែកក្កដា ឆ្នាំ២០២០។
ក្រសួងការបរទេសអាមេរិកនៅថ្ងៃពុធសប្ដាហ៍នេះ (ពេលវេលានៅវ៉ាស៊ីនតោន) បាននិយាយថា ការសម្រេចចិត្តបិទស្ថានកុង ស៊ុលចិននៅក្នុងទីក្រុង Houston គឺដើម្បីការពារកម្មសិទ្ធិបញ្ញា និងព័ត៌មានឯកជនរបស់ប្រជាជនអាមេរិក ពីការស៊ើបការណ៍ ឬលួចពីសំណាក់ទីក្រុងប៉េកាំង។ បន្ថែមពីលើនេះ ក្នុងថ្ងៃដដែលនោះដែរ ប្រធានាធិបតីអាមេរិកលោក ដូណាល់ ត្រាំ បានឆ្លើយតបទៅនឹងសំនួរអ្នកសារព័ត៌មានថា ស្ថានកុងស៊ុលចិនជាច្រើនទៀត នៅក្នុងសហរដ្ឋអាមេរិក ក៏កំពុងប្រឈមមុខនឹងការ បិទទ្វារផងដែរ បន្ទាប់ពីមន្ត្រី អាមេរិកពីររូបបានអះអាងថា មន្ត្រីចិនក្នុងស្ថានកុងស៊ុលនៃទីក្រុង Houston បានដុតបំផ្លាញ ចោលឯកសារ។
បន្ថែមពីនេះក្រុមរដ្ឋអាជ្ញាសហរដ្ឋអាមេរិកនិយាយថា ស្ថានកុងស៊ុលប្រទេសចិននៅក្នុងទីក្រុងសាន់ហ្វ្រាន់ស៊ីស្កូ រដ្ឋកាលីហ្វ័រញ៉ា កំពុងឲ្យអ្នកវិទ្យាសាស្ត្រចិនម្នាក់ដែលបានលាក់ពីទំនាក់ទំនងខ្លួនជាមួយយោធាចិន លាក់ខ្លួននៅក្នុងបរិវេណស្ថានកុងស៊ុលរបស់ខ្លួន។
ក្រុមរដ្ឋអាជ្ញាបានចោទប្រកាន់អ្នកស្រី Tang Juan អ្នកស្រាវជ្រាវម្នាក់នៅសាកលវិទ្យាល័យកាលីហ្វ័រញ៉ានៅ Davis អំពីការក្លែងបន្លំទិដ្ឋាការកាលពីថ្ងៃទី២៦ ខែមិថុនា។ យោងតាមឯកសារតុលាការ នៅក្នុងពាក្យដាក់សុំទិដ្ឋាការ អ្នកស្រី Tang អះអាងថា អ្នកស្រីមិនមានទំនាក់ទំនងជាមួយកងទ័ពរំដោះប្រជាជនចិនទេ។ ប៉ុន្តែភ្នាក់ងារនៃការិយាល័យស៊ើបអង្កេតសហព័ន្ធFBI ក្រោយមកបានរកឃើញរូបថតអ្នកស្រីក្នុងសម្លៀកបំពាក់យោធាពេលឆែកឆេរផ្ទះរបស់អ្នកស្រី ហើយបានរកឃើញព័ត៌មានថាអ្នកស្រីធ្លាប់បានធ្វើការជាអ្នកស្រាវជ្រាវនៅសាកលវិទ្យាល័យវេជ្ជសាស្ត្រយោធារបស់កងទ័ពអាកាសចិន។
នៅក្នុងឯកសារតុលាការនេះ អ្នកស្រី Tang បានបដិសេធការចោទទាំងនេះនៅពេលអ្នកស្រីត្រូវភ្នាក់ងារFBI សាកសួរកាលពីថ្ងៃទី២០ ខែមិថុនា ហើយក្រោយពីនោះអ្នកស្រីបានស្វះស្វែងរកការជ្រកកោណនៅស្ថានកុងស៊ុលចិននៅក្រុងសាន់ហ្រាន់ស៊ីនស្កូ។
ពាណិជ្ជកម្ម
ឆ្លើយតបទៅនឹងការប្រតិកម្មនេះ ក្រសួងការបរទេសចិន បានចេញប្រតិកម្ម ចាត់ទុកការបញ្ជាឲ្យបិទស្ថានកុងស៊ុលនេះ ថាជាការបង្កជម្លោះ រករឿងចិនដោយគ្មានហេតុផល។ ក្រសួងការបរទេសចិន បានធានាថា នឹងចាត់វិធានការតបវិញឲ្យសមស្រប។ ដោយឡែកនៅថ្ងៃដដែល ក្រសួងការបរទេសចិន ក៏បានចេញលិខិតប្រកាសមួយ ជូនដំណឹងទៅនិស្សិតចិន នៅសហរដ្ឋអាមេរិក ឲ្យមានការប្រុងប្រយ័ត្ន ព្រោះអាជ្ញាធរអាមេរិក កំពុងធ្វើសកម្មភាព ចាប់មនុស្សសួរចម្លើយ និងរឹបអូសឯកសារ ទ្រព្យសម្បត្តិ៕
[wai id="5"]
