[wai id="8"]
[wai id="7"]
ស្ថានការណ៍នៃមេរោគកូវីដ១៩ បានធ្វើឲ្យពិភពលោករងគ្រោះអស់រយ:ពេលជាង ១០ខែហើយជាមួយគ្នានោះ សេដ្ឋកិច្ចអឺរ៉ុប និងសហរដ្ឋអាមេរិក ធ្លាក់ចុះខ្លាំងមិនធ្លាប់មាន នាប៉ុន្មានខែចុងក្រោយនេះ គឺដោយសារតែរងផលវិបត្តិនៃមេរោគកូរ៉ូណាថ្មី។ មេរោគកូរ៉ូណាថ្មី នៅពេលនេះ បានចម្លងដល់មនុស្ស ជាង ១៧លាននាក់ ហើយសម្លាប់អាយុជីវិតមនុស្ស ជាង៦៧ ម៉ឺននាក់ នៅលើពិភពលោក។
ពាណិជ្ជកម្ម
សេដ្ឋកិច្ចនៃតំបន់ Eurozone អឺរ៉ុបដែលមាន១៩ប្រទេសបានថយចុះរហូតដល់ជាង១២% ក្នុងត្រីមាសទី២ពីខែមេសា ដល់ខែមិថុនា ដែលជាការធ្លាក់ចុះសេដ្ឋកិច្ចខ្លាំងបំផុតមិនធ្លាប់មាន ខណៈដែលវិធានការបិទសកម្មភាពសង្គមនិងអាជីវកម្មនានាបានធ្វើឲ្យប៉ះពាល់យ៉ាងខ្លាំងដល់ការចាយវាយរបស់អ្នកប្រើប្រាស់។
ប្រទេសអេស្ប៉ាញ ដែលធ្លាប់ជាកន្លែងមានការផ្ទុះរាតត្បាតកូវីដ១៩ខ្លាំងជាងដំបូងនៅអឺរ៉ុប ជាមួយប្រទេសអ៊ីតាលី បានទទួលផលប៉ះពាល់សេដ្ឋកិច្ចធ្ងន់ធ្ងរជាងគេ ដោយមានការធ្លាក់ចុះរហូត១៨,៥%។ ប្រទេសបារាំង អ៊ីតាលី និងព័រទុយហ្គាល់ក៏បានរងការធ្លាក់ចុះសេដ្ឋកិច្ចខ្លាំងដែរ។
សហរដ្ឋអាមេរិកវិញ វិធានការបិទខ្ទប់បង្ខាំងពលរដ្ឋឱ្យដេកនៅផ្ទះ បានបណ្តាលឱ្យធ្លាក់ចុះផលិតផលក្នុងស្រុកសរុប ប្រមាណជិត៣៣ភាគរយ បើធៀបនឹងរយៈពេលដូចគ្នា តាមចរន្តប្រចាំឆ្នាំ។ កាដាណា ត្រឹមថ្ងៃសុក្រ ក៏ទទួលស្គាល់ដែរថា កំណើនសេដ្ឋកិច្ចរបស់ខ្លួនធ្លាក់ចុះ ៤,៥% នៅខែឧសភា បើធៀបនឹងខែមេសា។
គួរម្លឹកដែរថា ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៨,២២០,៩៨៨នាក់ហើយ។ ក្នុងនោះអ្នកស្លាប់មានចំនួន ៦៩២,៣៦៥នាក់ និងជាសះស្បើយឡើងវិញ ១១,៤៣៦,៧២៤នាក់។
សហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ៤,៨១៣,៦៤០នាក់ ស្លាប់ចំនួន ១៥៨,៣៤៧នាក់ និងជាសះស្បើយចំនួន ២,៣៧៧,៨៦១នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ២,៧៣៣,៦៧៧នាក់ ស្លាប់ចំនួន ៩៤,១៣០នាក់ និងជាសះស្បើយ ១,៨៨៤,០៥១នាក់។
[wai id="5"]
