[wai id="8"]
[wai id="7"]
កាលពីពេលថ្មីៗនេះក្រសួងទេសចរណ៍បានអះអាងថា អាជីវកម្មសេវាទេសចរណ៍ជាង៣០ ភាគរយបានបើកដំណើរការ ឡើងវិញបន្ទាប់ពីផ្អាកមួយរយៈ ខណៈដែលចលនាភ្ញៀវទេសចរផ្ទៃក្នុងមានការកើនឡើង ។
ថ្លែងក្នុងសន្និសីទសារព័ត៌មាន ស្តីពីស្ថានភាពវិស័យទេសចរណ៍ក្នុងអំឡុងពេលនៃការរីករាលដាលនៃជំងឺកូវីដ-១៩ នៅថ្ងៃទី៣ ខែកញ្ញានាទីស្តីការគណៈរដ្ឋមន្ត្រី ឯកឧត្តម ទិត ចន្ថា រដ្ឋលេខាធិការប្រចាំការនៃក្រសួងទេសចរណ៍ បានមានប្រសាសន៍ថា នៅក្នុងឱកាសឈប់សម្រាកសងបុណ្យចូលឆ្នាំនាពេលកន្លងមកនេះចលនាភ្ញៀវទេសចរផ្ទៃក្នុងមានការកើនឡើងជាង១លាន៤សែននាក់ បានធ្វើឱ្យអាជីវកម្មទេសចរណ៍នៅក្នុងប្រទេសកម្ពុជាជាង ៣០ ភាគរយ ត្រូវបានបើកដំណើរការឡើងវិញ ដោយបានជួយសម្រួលដល់ជីវភាព និងការលំបាកនិយោជិត និងបុគ្គលិកកំពុងបម្រើការងារនៅក្នុងវិស័យនេះ។
ពាណិជ្ជកម្ម
លោក ទិត ចន្ថា បានឱ្យដឹងទៀតថា នាកំលុងពេលដែលកម្ពុជាជួបវិបត្តិជំងឺកូវីដ១៩ សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន ក៏ដូចជាមូលដ្ឋានអាជីវកម្មសេវាកម្មទេសចរណ៍ដទៃទៀតស្ទើរតែ ៩០% ត្រូវបានផ្អាកសកម្មភាពអាជីវកម្មរបស់ខ្លួនជាបណ្ដោះអាសន្ន ដោយសារការទប់ស្កាត់ការរីករាលដាលជំងឺកូវីដផង និងដោយសារពុំមានភ្ញៀវទេសចរមកទទួលសេវាកម្មផង។
លោកបានបន្តថា នាពេលបច្ចុប្បន្ននេះ ទោះបីសកម្មភាពទេសចរអន្តរជាតិត្រូវបានផ្អាកសកម្មភាពស្ទើរតែទាំងស្រុង ក៏ចលនាទេសចរផ្ទៃកំពុមានសកម្មភាពល្អប្រសើរឡើងវិញដែរ ក្នុងនោះមូលដ្ឋានអាជីវកម្មសេវាកម្មទេសចរណ៍សរុបប្រមាណ ៣០% នៅទូទាំងប្រទេសបានបើកដំណើរការឡើងវិញ។
លោកបញ្ជាក់ថា នៅក្នុងឱកាសឈប់សម្រាកសងបុណ្យចូលឆ្នាំនាពលកន្លងមកនេះ ក្រសួងបានវាយតម្លៃបឋមជុំវិញថ្ងៃឈប់ សម្រាកចំណូលចូលទៅក្នុងវិស័យទេសចរណ៍ប្រមាណ ១០០ លានដុល្លារអាមេរិក ហើយរំពឹងថា នាពេលខាងមុខនេះ វិស័យទេសចរណ៍នឹងទទួលបានចំណូលរហូតដល់ ៥០០ លានដុល្លារអាមេរិក បន្ទាប់ពីមានចលនាទេសចរណ៍ផ្ទៃក្នុងច្រើន ដើរលេងកម្សាន្តនៅតាមគោលដៅទេសចរណ៍នៅទូទាំងប្រទេសកម្ពុជា។
យោងតាមរបាយការណ៍បឋមរបស់មន្ទីរទេសចរណ៍រាជធានីខេត្ត បានបង្ហាញថា ភ្ញៀវទេសចរដែលបានធ្វើដំណើរកម្សាន្ត នៅតាមគោលដៅទេសចរណ៍នានាទូទាំងប្រទេសចាប់ពី ថ្ងៃទី១៧-២១ ខែសីហា ឆ្នាំ២០២០ មានចំនួនប្រមាណ ១.៤៥៩.៣៨៦ នាក់ ក្នុងនោះ ភ្ញៀវជាតិមានចំនួនប្រមាណ ១.៤៤៥.២៣៨ នាក់ និង ភ្ញៀវអន្តរជាតិមានចំនួនប្រមាណ ១៤.១៤៨ នាក់៕