ព្រលានយន្តហោះអន្ដរជាតិសៀមរាបអង្គរថ្មី កំពុងជួបបញ្ហាខ្វះខាតអគ្គិសនី និងទឹកស្អាតប្រើប្រាស់ អំឡុងពេលកំពុងដំណើរការសាងសង់។ នេះជាការលើកឡើងរបស់ក្រុមហ៊ុន ដែលវិនិយោគសាងសង់ ប្រាប់រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរណ៍ស៉ីវិល។
លោក ស៉ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល បានថ្លែងថា នៅថ្ងៃទី១៧ ខែកុម្ភៈ ឆ្នាំ២០២១ បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋាន អាកាសចរណ៍ស៊ីវិល បានទទួលជួបជាមួយលោក លូ វេង ប្រធានក្រុមប្រឹក្សាក្រុមហ៊ុនសាងសង់ ព្រលានយន្តហោះអន្តរជាតិសៀមរាបអង្គរ ដើម្បីសុំកិច្ចជួយអន្តរាគមន៍។
លោកបានបញ្ជាក់ថា ដំណើរការសាងសង់ព្រលានយន្តហោះសៀមរាបអង្គរថ្មីនេះ គឺគ្រោងនឹងបញ្ចប់នៅចុងឆ្នាំ២០២៣តែម្ដង ប៉ុន្ដែក្រុមហ៊ុនសាងសង់ព្រលានយន្តហោះនេះ បាននិងកំពុងជួបឧបសគ្គ ដូចជាខ្វះទឹកសម្រាប់ប្រើប្រាស់ មិនមានបណ្ដាញតភ្ជាប់ទឹកស្អាត សម្រាប់ប្រើប្រាស់លើការសាងសង់ និងមិនមានបណ្ដាញសម្រាប់តភ្ជាប់អគ្គិសនីប្រើប្រាស់ និងការសាងសង់ព្រលានយន្តហោះជាដើម។
លោកលើកឡើងទៀតថា ប្រភពផ្គត់ផ្គង់ទឹកស្អាត និងអគ្គិសនី នៅព្រលានយន្តហោះ គឺមាន២ប្រភព ដោយទី១៖ អាចយកពីទីរួមខេត្តសៀមរាប និងទី២ អាចយកពីខេត្តបន្ទាយមានជ័យ ដែលមានចម្ងាយ១៨០គីឡូម៉ែត្រ។
លោកថា “ចំពោះបញ្ហាប្រឈមនេះ លោកបណ្ឌិត ម៉ៅ ហាវណ្ណាល់ ក៏បានទទួលយកសំណើរ ហើយបានសន្យាថានឹងជួយដោះស្រាយបញ្ហាទាំងនេះ ដើម្បីកុំឲ្យខកខានដល់ដំណើរការ សាងសង់ព្រលានយន្តហោះអន្តរជាតិសៀមរាបអង្គរថ្មី ហើយលោកក៏ដាក់សំណើទៅ ក្រសួងស្ថាប័នពាក់ព័ន្ធ ដើម្បីដោះស្រាយអគ្គិសនី ក្នុងការជួយពន្លឿនការសាងសង់ ព្រលានយន្តហោះអន្តរជាតិសៀមរាបអង្គរថ្មី ឲ្យទាន់ពេលវេលា។
គួរបញ្ជាក់ដែរថា ព្រលានយន្តហោះថ្មីដែលគ្រោងចំណាយប្រាក់ ៨៨០ លានដុល្លារនេះត្រូវបានសាងសង់លើផ្ទៃដី ៧៥០ ហិកតានៅស្រុកសូទ្រនិគម ជាយក្រុងសៀមរាប។ គម្រោងនេះនឹងត្រូវបានសាងសង់ ៣ ដំណាក់កាល។
ក្រុមហ៊ុននឹងវិនិយោគជាង ៥០០ លានដុល្លារ សម្រាប់ដំណាក់កាលទី ១ និង ២ ដែលនឹងអាចឲ្យយន្តហោះដឹកអ្នកដំណើរទំហំមធ្យម និងចម្ងាយឆ្ងាយដូចជាយន្តហោះ Boeing 737 និងយន្តហោះ Airbus A320 ចុះចតបាន។ ទឹកប្រាក់ ៣០០ លានដុល្លារផ្សេងទៀតនឹងត្រូវបម្រុងទុកសម្រាប់ដំណាក់កាលទី ៣។