កាលពេលថ្មីៗនេះ សម្តេចតជោ បានដាក់បទបញ្ជាឲ្យអាជ្ញាធរពាក់ព័ន្ធ កែសម្រួលព្រំប្រទល់ទន្លេសាប ដោយកាត់ឆ្វៀលដីខ្លះចេញពីតំបន់បឹងទន្លេសាបប្រគល់ជូនពលរដ្ឋដែលកាន់កាប់យូរមកហើយតាមរយៈយុទ្ធសាស្ត្រស្បែកខ្លា។
ក្នុងសារពិសេសនៅថ្ងៃទី២៧ឧសភានេះ សម្តេចតេជោ បានគូសបញ្ជាក់ថា ចំពោះដីដែលទើបចូលកាន់កាប់ថ្មីៗ ឬ២ទៅ៣ឆ្នាំចុងក្រោយនេះ គឺត្រូវតែដកហូតដើម្បីដាំដើមឈើឡើងវិញ។ ជាមួយគ្នានេះលោកប្រមុខរដ្ឋាភិបាល បានព្រមានកុំមានមន្ត្រីមានអំណាច ឈ្មួញ ឬមនុស្សមកពីតំបន់ផ្សេង ឆ្លៀតឱកាសដណ្តើមកាន់កាប់ព្រៃលិចទឹក ជ្រកក្រោមស្លាកពលរដ្ឋដែលធ្លាប់រស់នៅយូរមកហើយ។
បើតាមលោកប្រមុខរដ្ឋាភិបាល គឺគ្មានឡើយការបណ្តេញចេញពលរដ្ឋដែលកំពុងរស់នៅតំបន់បឹងទន្លេសាប។ ផ្ទុយទៅវិញ លោកបញ្ជាឲ្យអាជ្ញាធរកាត់ឆ្វៀលដីដែលប្រជនធ្លាប់កាន់ កាប់អាស្រ័យកន្លង មកយូរមកហើយ ប្រគល់ជូនពលរដ្ឋ តាមរយៈយុទ្ធសាស្ត្រស្បែកខ្លា។
សម្តេចតេជោ ហ៊ុន សែន បានមានប្រសាសន៍ថា បឹងទន្លេសាបជាបឹងដ៏ធំមួយ ហើយជាបឹងដែល មានប្រភពត្រីច្រើន ដែលទាមទារឱ្យមានការយកចិត្តទុកដាក់ថែរក្សា និងអភិរក្ស។ តំបន់បឹងទន្លេសាបចែកចេញជា៤តំបន់ ហើយតំបន់ទី៤ ជាតំបន់ដែលទាមទារឱ្យមានការអភិរក្សជាដាច់ខាត។
ចំពោះការអនុវត្ត សម្តេចតេជោ បានមានប្រសាសន៍ថា តំបន់បឹងទន្លេសាបនេះ ចែកជាពីរកត្តាចាំបាច់ ដែលកត្តាទី១ គឺការអភិរក្ស និងកត្តាទី២ គឺត្រូវតែគិតដល់ផលប្រយោជន៍ប្រជាពលរដ្ឋដែល រស់នៅ ជុំវិញបឹងទន្លេសាបនោះ។ បញ្ហានេះ ត្រូវគិតលើគោលការណ៍សំខាន់៣ទៀត ហើយគោលការណ៍ដែល ត្រូវយកចិត្តទុកដាក់នោះ គឺគោលការណ៍ថ្លឹងថ្លែងជាមួយការអភិរក្ស និងគោលការណ៍រស់នៅរបស់ ប្រជាពលរដ្ឋជាក់ស្តែង។
ដូច្នេះហើយ សម្តេចតេជោ បានណែនាំទៅដល់ខេត្តទាំង៦ដែលស្ថិតនៅជាប់នឹងបឹងទន្លេសាប ត្រូវយកចិត្តទុក ដាក់ទៅលើប្រជាពលរដ្ឋដែលរស់នៅជុំវិញបឹងទន្លេសាប។ សម្តេចតេជោក៏បានណែនាំឱ្យពិនិត្យពិចារណា ស្ថានភាពជាក់ស្តែង ដោយកាត់ឆ្វៀលដីពីតំបន់២ និងតំបន់៣ ជូនទៅប្រជាពលរដ្ឋដែលរស់នៅជាក់ស្តែងថែមទៀតផង។
ជាមួយគ្នា សម្តេចក៏បានណែនាំឱ្យកែសម្រួលព្រំប្រទល់តំបន់២ និងតំបន់៣ឡើងវិញ ទៅតាមស្ថានភាពជាក់ ស្តែងនៃការអាស្រ័យផលរបស់ប្រជាពលរដ្ឋ ក្នុងនោះ សម្តេច ក៏បានណែនាំអោយឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ដឹកនាំអាជ្ញាធរពាក់ព័ន្ធក្នុងការកែសម្រួលព្រំប្រទល់ តំបន់២ និងតំបន់៣នេះជាពិសេសបានណែនាំឱ្យរៀបចំជាបង្គោលធំៗនៅតាមព្រំប្រទល់ដែលត្រូវបែងចែក តំបន់បឹងទន្លេសាបនេះ៕
