រដ្ឋធានីយេរេវ៉ាន់ (Yerevan) ៖ សហរដ្ឋអាមេរិក កំពុងតែបង្ហាញ អំពីក្ដីកង្វល់យ៉ាងខ្លាំង ក្រោយពេលប្រទេស ចំនួន២ ធ្លាប់រួមរស់នៅជាមួយគ្នា នៅក្នុងសហភាពសូវៀត បានប៉ះទង្គិចគ្នា ដោយប្រដាប់អាវុធ ពាក់ព័ន្ធនឹងជម្លោះព្រំដែន។
សារព័ត៌មាន US News បានចេញផ្សាយ កាលពីថ្ងៃអង្គារ ទី១៣ ខែកញ្ញា ថា រដ្ឋមន្ត្រីការបរទេសសហរដ្ឋអាមេរិក លោក អេនតូនី ប្លីនខែន (Antony Blinken) បានថ្លែង កាលពីថ្ងៃចន្ទថា ក្រុងវ៉ាស៊ីនតោន មានការព្រួយបារម្ភយ៉ាងខ្លាំង ជុំវិញសេចក្ដីរាយការណ៍ ពីការវាយប្រហារនៅតាមព្រំដែន រវាងប្រទេសអាមេនី-អាស៊ែបៃហ្សង់។ ជាមួយគ្នានេះដែរ សហរដ្ឋអាមេរិក សូមអំពាវនាវឱ្យបញ្ចប់នូវអរិភាពនេះជាបន្ទាន់។
កងទ័ពអាមេនី និង អាស៊ែបៃហ្សង់ បានបាញ់កាំភ្លើងធំ ផ្លោងដាក់គ្នាទៅវិញទៅមក នៅជិតព្រំដែន រវាងតំបន់ ណាហ្គ័រណូ ការ៉ាបាក់ (Nagorno-Karabakh)។ ជម្លោះព្រំដែននេះ បានបង្កឱ្យមានការភ័យខ្លាច ស្រដៀងគ្នាទៅនឹងសង្គ្រាម នាអំឡុងឆ្នាំ២០២០។ ភាគីទាំងពីរ បានស្តីបន្ទោសដាក់គ្នាទៅវិញទៅមក ពាក់ព័ន្ធនឹងការបង្កហេតុដំបូង។
ការបាញ់ផ្លោងដាក់គ្នា រវាងកងទ័ព នៃប្រទេសធ្លាប់ជារដ្ឋចំណុះឲ្យអតីតសហភាពសូវៀត ទាំង២នេះ បានផ្ទុះឡើង កាលពីរំលងអធ្រាត្រ ឈានចូល ថ្ងៃអង្គារ ។ សកម្មភាពយោធានេះ កំពុងតែបង្កឱ្យមានការព្រួយបារម្ភ កាន់តែខ្លាំងឡើង ជុំវិញការផ្ទុះសង្គ្រាម នៅតំបន់ជម្លោះព្រំដែន Nagorno-Karabakh។
អាស៊ែបៃហ្សង់ បានគ្រប់គ្រងទាំងស្រុងឡើងវិញ នៅតាមព្រំដែន ណាហ្គ័រណូ ការ៉ាបាក់ (Nagorno-Karabakh) នៅក្នុងសង្គ្រាម រយៈពេល ៦សប្ដាហ៍ កាលពីអំឡុងឆ្នាំ២០២០។ សង្គ្រាម នាពេលនោះ បានបណ្ដាលឲ្យកងទ័ព ទាំងសងខាង ស្លាប់ និង រងរបួស។ ការប្រយុទ្ធគ្នាបានកើតឡើង នៅជិតតំបន់ Nagorno-Karabakh ជាតំបន់មួយ ស្ថិតក្នុងប្រទេសអាស៊ែបៃហ្សង់ ជាកន្លែងដែលពួកបំបែកខ្លួនជនជាតិអាមេនី បានប្រកាស ជាសាធារណរដ្ឋបំបែក ក្រោយមកត្រូវបានស្គាល់ថា ជាអាតសាក់ (Artsakh) នៅក្នុងឆ្នាំ១៩៩១។
ថ្លែងនៅក្នុងសន្និសីទសារព័ត៌មានមួយ កាលពីព្រឹក ថ្ងៃអង្គារ លោក អារ៉ាម តូរូស្យ៉ាន់ (Aram Torosyan) អ្នកនាំពាក្យ ក្រសួងការពារជាតិអាមេនី បានបញ្ជាក់ ថា ស្ថានភាពនៅតែតានតឹងខ្លាំង ខណៈការប្រយុទ្ធគ្នាកំពុងតែបន្ត។
លោក នីកូល ប៉ាស៊ីនយ៉ាន់ (Nikol Pashinyan) នាយករដ្ឋមន្ដ្រីអាមេនី បានប្រាប់ដល់រដ្ឋសភា ថា «គិតត្រឹមវេលានេះ យើងមានទាហាន ចំនួន៤៩នាក់បានស្លាប់ ប៉ុន្ដែយើងនៅមិនទាន់ទទួលបានតួលេខចុងក្រោយនៅឡើយ»។
ទោះជាយ៉ាងណា រហូតមកដល់ពេលនេះ ប្រទេសទាំង២ នៅតែស្ដីបន្ទោសដាក់គ្នាទៅវិញទៅមក។ ចំណែកកងទ័ពទាំង២ប្រទេស បានអះអាង ពីការចាប់ផ្តើមការឆ្លើយតបដាក់គ្នាទៅវិញទៅមក ប្រឆាំងនឹងអ្វីដែលពួកគេមើលឃើញថា វាជាការបង្កហេតុ មកពីភាគីម្ខាងទៀត។
ក្រសួងការពារជាតិអាមេនី បានបញ្ជាក់ថា កងទ័ពអាសែបៃហ្សង់ កាលពីវេលាម៉ោង១២ និង៥នាទីរំលងអធ្រាត្រ ឈានចូលថ្ងៃអង្គារ បានបាញ់ផ្លោងយ៉ាងខ្លាំង ជាមួយនឹងកាំភ្លើងធំ ដាក់មកលើមូលដ្ឋានទាហានអាមេនី នៅតាមទីក្រុង ជាច្រើន រួមមាន ទីក្រុងហ្គោរី (Goris), ទីក្រុងសូល (Sotk) និតទីក្រុងជើរមូក (Jermuk)។
ដោយឡែក អាស៊ែបៃហ្សង់ វិញ ក៏បានចោទប្រកាន់ ទៅលើកម្លាំងទាហានអាមេនី អំពីការអនុវត្តសកម្មភាពវិទ្ធង្សនាទ្រង់ទ្រាយធំ កាលពីយប់ ថ្ងៃចន្ទ នៅជិតព្រំដែនស្រុកដាសកេសាន (Dashkesan), កែលបាចា (Kelbajar) និង ឡាជីន (Lachin) ដោយការដាក់គ្រាប់មីន និង ចល័តគ្រឿងសព្វាវុធ៕
