រដ្ឋធានីមូស្គូ៖ ក្រោយទទួលបានប្រព័ន្ធបាញ់គ្រាប់រ៉ុក្កែតចម្រុះ បាញ់ចម្ងាយឆ្ងាយ ប្រភេទហាយម៉ាស់ ពីសហរដ្ឋអាមេរិក នោះមក កងទ័ពអ៊ុយក្រែន មានសមត្ថភាពគ្រប់គ្រាន់ នៅក្នុងវាយប្រហារតបតទៅលើកម្លាំងសត្រូវ រហូតរំដោះទឹកដី៨ ០០០គីឡូម៉ែត្រការ៉េ យកមកគ្រប់គ្រងវិញ ទើបរដ្ឋាភិបាលក្រុងមូស្គូ ខឹងសម្បាយ៉ាងខ្លាំង ហើយព្រមានដល់សហរដ្ឋអាមេរិក មិនឲ្យផ្ដល់មីស៊ីលបាញ់ចម្ងាយឆ្ងាយ មកដល់ក្រុងកៀវ។
សារព័ត៌មាន The Kyiv Post បានចេញផ្សាយ កាលពីថ្ងៃព្រហស្បតិ៍ ទី១៥ ខែកញ្ញា ឆ្នាំ២០២២ ថា សេវាសារព័ត៌មាន នៃសេតវិមានរបស់ប្រធានាធិបតីសហរដ្ឋអាមេរិក រាយការណ៍ ថា សហរដ្ឋអាមេរិក មានគោលបំណងផ្គត់ផ្គង់គ្រឿងសព្វាវុធ ទៅដល់រដ្ឋាភិបាលក្រុងកៀវ (Kyiv) សម្រាប់ជួយដល់កងទ័ពអ៊ុយក្រែន បើកប្រតិបត្តិការប្រយុទ្ធ នៅក្នុងសមរភូមិភាគខាងត្បូង និង ខាងកើត ប្រទេស នាពេលអនាគត រួមទាំងប្រព័ន្ធកាំជ្រួចទំនើបៗផងដែរ។
ជាការឆ្លើយតបនឹងមន្ដ្រីសេតវិមានវិញនោះ លោកស្រី អ្នកនាំពាក្យ ក្រសួងការពារជាតិរុស្ស៊ី បានថ្លែង ថា ប្រសិនបើ សហរដ្ឋអាមេរិក បានសម្រេចចិត្ត ផ្គត់ផ្គង់មីស៊ីល បាញ់ចម្ងាយឆ្ងាយ ជួយដល់រដ្ឋាភិបាលក្រុងកៀវ។ សកម្មភាពទាំងនេះ មានន័យយ៉ាងច្បាស់ ថា ក្រុងវ៉ាស៊ីនតោន នឹងដើរឆ្លងហួសបន្ទាត់ក្រហម ហើយសហរដ្ឋអាមេរិក ក៏ក្លាយជាភាគីជម្លោះជាមួយនឹងរុស្ស៊ី នៅក្នុងប្រទេសអ៊ុយក្រែន។
លោកស្រី ម៉ារៀ ហ្សាខារ៉ូវ៉ា (Maria Zhakarova) បានថ្លែង នៅក្នុងសន្និសីទសារព័ត៌មានដ៏ខ្លីមួយ កាលពីថ្ងៃព្រហស្បតិ៍ ថា «រុស្ស៊ី មានសិទ្ធិការពារទឹកដីរបស់ខ្លួន»។ ប៉ុន្ដែប្រសិនបើក្រុងវ៉ាស៊ីនតោន សម្រេចផ្គត់ផ្គង់មីស៊ីល បាញ់ចម្ងាយឆ្ងាយ ទៅជួយដល់រដ្ឋាភិបាលក្រុងកៀវ នោះមានន័យថា ក្រុងវ៉ាស៊ីនតោន កំពុងតែដើរឆ្លងហួសខ្សែបន្ទាត់ក្រហម ហើយសហរដ្ឋអាមេរិក នឹងក្លាយជាភាគីជម្លោះដោយផ្ទាល់ នៅក្នុងប្រទេសអ៊ុយក្រែន។
ចាប់តាំងពីដើមខែកញ្ញា នេះមក កងទ័ពអ៊ុយក្រែន ចាប់ផ្ដើមវាយបកទៅលើកម្លាំងទាហានរុស្ស៊ី យ៉ាងសន្សឹមៗ នៅតំបន់ភាគខាងត្បូង ខណៈវាយសន្ទាប់យ៉ាងលឿនបំផុត នៅភាគខាងជើង និង ភាគខាងកើត។ ចំណែកតំបន់ខាគីវ (Kharkiv) និង ទីក្រុងអ៊ីហ្ស៊ូម (Izium) ត្រូវបានកងទ័ពអ៊ុយក្រែន រំដោះបាន។ នេះជាជ័យជម្នះមួយយ៉ាងធំធេងរបស់អ៊ុយក្រែន នៅក្នុងប្រយុទ្ធជាមួយនឹងកម្លាំងទាហានដ៏ខ្លាំងក្លារបស់រុស្ស៊ី។
ក្រុងវ៉ាស៊ីនតោន បានផ្គត់ផ្គង់គ្រឿងសព្វាវុធ ជាចំហជួយដល់ប្រទេសអ៊ុយក្រែន ជាមួយនឹងប្រព័ន្ធរ៉ុក្កែតចម្រុះនាំផ្លូវដ៏ទំនើប ហៅ រ៉ុក្កែត GMLRS ។ គ្រាប់មីស៊ីល ប្រភេទនេះ នឹងអាចបាញ់ជាមួយនឹងឧបករណ៍បាញ់គ្រាប់រ៉ុក្កែហាយម៉ាស់ (HIMARS) ផងដែរ ហើយវាអាចបាញ់ ទៅដល់គោលដៅរបស់សត្រូវយ៉ាងមានប្រសិទ្ធភាព នៅក្នុងចម្ងាយដី រហូតដល់៨០គីឡូម៉ែត្រ។
ក្រុមមន្ដ្រីសហរដ្ឋអាមេរិក ក៏បាននិយាយអ្វីច្រើន ជុំវិញការព្រមាន ពីរុស្ស៊ី នោះដែរ ប៉ុន្ដែពួកគេ គ្រាន់តែនិយាយថា អ៊ុយក្រែន បានសន្យា មិនប្រើប្រាស់រ៉ុក្កែត ផ្គត់ផ្គង់ដោយសាររដ្ឋអាមេរិក បាញ់ប្រហារ ទៅលើទឹកដីរបស់រុស្ស៊ី នោះឡើយ។
ប្រព័ន្ធបាញ់គ្រាប់រ៉ុក្កែត HIMARS អាចបាញ់មីស៊ីលយុទ្ធសាស្ដ្រ ATACMS ទៅដល់គោលដៅរបស់សត្រូវ នៅក្នុងចម្ងាយរហូតដល់លើសពី ៣០០គីឡូម៉ែត្រ។ មន្ដ្រីជាន់ខ្ពស់ អ៊ុយក្រែន កាលពីថ្ងៃទី១៩ ខែសីហា បានបដិសេធនូវការបញ្ជាក់ណាមួយ ថាតើក្រុងកៀវ ឥឡូវ មានគ្រាប់មីស៊ីល ប្រភេទ ATACMS នេះ ឬយ៉ាងណានោះដែរ៕