រដ្ឋធានីតាសខែន(Tashkent)៖ នាយករដ្ឋមន្ដ្រីឥណ្ឌា និង ប្រធានាធិបតីចិន បានចាកចេញពីប្រទេសរៀងៗខ្លួន ទៅកាន់អាស៊ីកណ្ដាល ដើម្បីជួបគ្នា ជាលើកដំបូង ចាប់តាំងពីការផ្ទុះជម្លោះព្រំដែនយ៉ាងបង្ហូរឈាម កាលពីឆ្នាំ២០២០ រហូតមក។
សារព័ត៌មានអារ៉ាប់អន្ដរជាតិ Alarabiya បានចេញផ្សាយ កាលពីថ្ងៃសុក្រ ទី១៥ ខែកញ្ញា ថា លោក ណារ៉ែនដ្រា មូឌី (Narendra Modi) នាយករដ្ឋមន្ដ្រីឥណ្ឌា និង លោក ស៊ី ជិនពីង (Xi Jinping) ប្រធានាធិបតីចិន កាលពីថ្ងៃសុក្រ បានជួបទល់មុខគ្នា ជាលើកដំបូង ចាប់តាំងពីការផ្ទុះជម្លោះព្រំដែន វាយប្រយុទ្ធគ្នា បណ្ដាលឲ្យទាហានទាំងសងខាង ស្លាប់ និង របួស កាលពីអំឡុងឆ្នាំ២០២០ រហូតមក។ ជម្លោះព្រំដែនដ៏ស្រួចស្រាវនេះ បានបណ្ដាលឲ្យចំណងទំនាក់ទំនងគ្នា រវាងប្រទេសជាគូប្រជែងគ្នាទាំង២ នៅអាស៊ី បែកបាក់។
លោកនាយករដ្ឋមន្ដ្រីឥណ្ឌា កាលពីថ្ងៃព្រហស្បតិ៍ បានធ្វើដំណើរ តាមយន្ដហោះ ទៅកាន់ទីក្រុងសាម៉ាកានដ៍ (Samarkand) ប្រទេសអ៊ូសប៊ែគីស្ថាន (Uzbekistan) ដែលធ្លាប់ជារដ្ឋចំណុះឲ្យសហភាពសូវៀត ដើម្បីចូលរួម នៅក្នុងកិច្ចប្រជុំកំពូល នៃក្រុមសន្ដិសុខក្នុងតំបន់ ដែលគេស្គាល់ថាជា អង្គការសហប្រតិបត្ដិការសៀងហៃ (Shanghai) ហៅកាត់ SCO ។ នៅក្នុងព្រឹត្ដិការណ៍នេះ ក៏មានការអញ្ជើញចូលរួម ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) ផងដែរ។
កិច្ចប្រជុំកំពូល នៅសប្ដាហ៍ បានកើតឡើង ក្រោយពេលទាហានឥណ្ឌា និង ចិន បានកាត់ផ្តាច់ទំនាក់ទំនងគ្នា នៅក្នុងតំបន់ជម្លោះមួយ តាមបណ្តោយព្រំដែនដាច់ស្រយាល នាភាគខាងលិចភ្នំហិមពាន (Himalaya) បន្ទាប់ពីមានការប្រឈមមុខដាក់គ្នា អស់រយៈពេលជាងពីរឆ្នាំកន្លងមក។ ចាប់តាំងពីកងទ័ព នៃប្រទេសមហាយក្សអាស៊ីទាំង២នេះ បានប្រឈមមុខដាក់គ្នានោះមក លោក មូឌី និង លោក ស៊ី ក៏លែងនិយាយរកគ្នាផងដែរ។
លោក វីណាយ ខ្វាត្រា (Vinay Kwatra) រដ្ឋមន្ដ្រីក្រសួងការបរទេសឥណ្ឌា បានថ្លែងប្រាប់ដល់សន្និសីទសារព័ត៌មានមួយ កាលពីថ្ងៃព្រហស្បតិ៍ ថា នាយករដ្ឋមន្ដ្រីឥណ្ឌា លោក មូឌី នឹងជួបចរចាទ្វេភាគី នៅខាងក្រៅកិច្ចប្រជុំកំពូលសន្ដិសុខក្នុងតំបន់ នាថ្ងៃសុក្រ។ ប៉ុន្ដែលោករដ្ឋមន្ដ្រី មិនបានបញ្ជាក់ អំពីជំនួប មួយទល់មួយ ជាមួយនឹងលោក ស៊ី ជិនពីង ប្រធានានាធិបតីចិន នោះឡើយ។ ដោយឡែក ភាគីចិន វិញ ក៏មិនបានបញ្ជាក់ អំពីជំនួប រវាងមេដឹកនាំ នៃប្រទេស២នេះដែរ។
សមាជិកអចិន្ដ្រៃយ៍ នៃអង្គការសហប្រតិបត្ដិការសៀងហៃ នេះ រួមមាន ចិន ឥណ្ឌា រុស្ស៊ី កាហ្សាក់ស្ថាន គីជីស្ថាន តាជីគីស្ថាន អ៊ូសប៊ែគីស្ថាន និង ប៉ាគីស្ថាន។ រុស្ស៊ី បានអះអាងរួចមកហើយ អំពីជំនួប រវាងលោក ពូទីន និង លោក មូឌី។ នៅក្នុងជំនួបនេះ គេរំពឹងថា មេដឹកនាំទាំង២ប្រទេសនេះ នឹងចរចាគ្នា ស្ដីអំពីពាណិជ្ជកម្ម ក៏ដូចជា ការលក់ជីរបស់រុស្ស៊ី និង ការផ្គត់ផ្គង់ស្បៀងអាហារ ផងដែរ។
លោក រដ្ឋមន្ដ្រីក្រសួងការបរទេសឥណ្ឌា បានបញ្ជាក់ថា កិច្ចពិភាក្សារបស់អង្គការសន្ដិសុខក្នុងតំបន់នេះ កាន់តែពង្រីកយ៉ាងទូលំទូលាយ ផ្ដើមចេញពីការធ្វើពាណិជ្ជកម្ម សន្ដិសុខក្នុងតំបន់ រហូតដល់វិស័យទេសចរណ៍ និង ការប្រឆាំងនឹងអំពើភេរវកម្ម៕
