រដ្ឋធានីកៀវ៖ ការដកទ័ពរបស់រុស្ស៊ី ចេញពីតំបន់ខាគីវ (Kharkiv) នាភាគឦសាន ប្រទេសអ៊ុយក្រែន បានបង្ហាញ អំពីការចុះខ្សោយ ទាំងការផ្គត់ផ្គង់គឿងសឹក និង កម្លាំងទាហាន។
សារព័ត៌មាន BBC បានចេញផ្សាយ កាលពីថ្ងៃទី១៧ ខែកញ្ញា ថា ទាហានជើងចាស់របស់រុស្ស៊ី បានអះអាងថា ក្រុងមូស្គូ បានដកកងទ័ព ចេញពីតំបន់ខាគីវ ក្រោយពេលកម្លាំងការពារទឹកដីរបស់អ៊ុយក្រែន បានវាយលុកយ៉ាងសន្ធាប់។ សកម្មភាពបែបនេះ កំពុងតែបង្ហាញ អំពីការចុះខ្សោយខ្លាំង ទាំងការផ្គត់ផ្គង់គ្រឿងយុទ្ធោបករណ៍ និង កម្លាំងយោធារបស់ក្រុងមូស្គូ។
មន្ត្រីរុស្ស៊ីមួយរូប បម្រើការងារ ជាកងម៉ារីន នៅក្នុងប្រទេសអ៊ុយក្រែន បានរាយការណ៍ តាមទូរស័ព្ទ ទៅកាន់អតីតសហសេវិក ដែលគួរតែវិលត្រឡប់ ទៅប្រទេសកំណើតវិញ ហើយត្រូវបានបង្ហោះ នៅលើបណ្ដាញ Telegram របស់គាត់ ថា«អ្នកមិនគិតថា ខ្ញុំធុញទ្រាន់នឹងការនិយាយ ជម្រាបសួរដល់អ្នក នាពេលព្រឹក បន្ទាប់មកត្រូវកំណត់អត្តសញ្ញាណរបស់អ្នកនៅរស់ នៅថ្ងៃដដែលនោះ។ ចំណែកម្សិលមិញ ក្រុមបាញ់ស៊ីបរបស់ខ្ញុំ ចំនួន២ក្រុម ត្រូវបានរថក្រោះបាញ់ បណ្ដាលឲ្យបុរស៣នាក់ បាត់បង់ជីវិត និង ៤នាក់ផ្សេងទៀត រងរបួសធ្ងន់ ហើយត្រូវបញ្ជូនទៅកាន់មន្ទីរពេទ្យ។ យើងពិបាកទុកពួកគេចោលណាស់ ហើយយើងកំពុងតែស្ថិតក្នុងសមរភូមិ រាប់សិបគីឡូម៉ែត្រ»។
អ្នករាយការណ៍អំពីសង្គ្រាម អតីតយុទ្ធជន និង អ្នកសរសេរប្លុកគឺយោធា បានទទួលស្គាល់ អំពីបញ្ហាប្រឈមជាច្រើន នៅក្នុងបណ្តាញសង្គម ខណៈមន្ត្រីរុស្ស៊ី កំពុងតែព្យាយាមទប់ទល់នឹងការដកថយកម្លាំងទាហានក្រុងមូស្គូ ចេញពីទីក្រុង Kharkiv។
ដោយឡែក ក្រសួងការពារជាតិរុស្ស៊ី បានចាប់ផ្តើមផ្សាយ ពីការជ្រើសរើសកងទ័ព នៅលើគេហទំព័រការងារដ៏ពេញនិយម ចាប់តាំងពីដើមខែមីនា ជាអ្វីដែលកម្រធ្វើ នៅមុនពេលមានសង្គ្រាម។ នៅលើគេហទំព័រដដែលនោះ បានជ្រើសរើសកងទ័ព ចំនួន៧០០០នាក់ រួមមាន ខ្មាន់កាំភ្លើង បុគ្គលិកកាំភ្លើងត្បាល់ និង តួនាទីផ្តោតលើការប្រយុទ្ធផ្សេងៗទៀត។ ប៉ុន្ដែការផ្សព្វផ្សាយ នោះ មិនបាននិយាយ អំពី«ប្រតិបត្តិការយោធាពិសេស» នៅអ៊ុយក្រែន នោះឡើយ៕
