រដ្ឋធានីវ៉ាស៊ីនតោន៖ ជាមួយនឹងការគំរាមកំហែងខាងយោធា កាន់តែខ្លាំងពីប្រទេសចិន ចាប់តាំងពីប្រធានសភាដ៏មានឥទ្ធិពលរបស់សហរដ្ឋអាមេរិក មកកាន់ទីក្រុងតៃប៉ិ កាលពីថ្ងៃទី២ ខែសីហា នោះមក ប្រធានាធិបតី ចូ បៃដិន បានចេញមកអះអាងជាថ្មី ថា ក្រុងវ៉ាស៊ីនតោន នឹងត្រូវតែការពារតៃវ៉ាន់ ប្រសិនបើក្រុងប៉េកាំង លើកកងទ័ព វាយលុកទៅលើដែនកោះ គ្រប់គ្រងដោយខ្លួនឯង។
សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃចន្ទ ទី១៩ ខែកញ្ញា ថា ថ្លែងនៅក្នុងបទសម្ភាសន៍ ជាមួយនឹងបណ្ដាញទូរទស្សន៍ CBS នោះ លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានបញ្ជាក់ជាថ្មី ថា សហរដ្ឋអាមេរិក នឹងប្រើប្រាស់កងទ័ព ការពារតៃវ៉ាន់ ប្រសិនបើចិនវាយប្រហារ។ បទសម្ភាសន៍នេះ ត្រូវបានចាក់ផ្សាយ កាលពីថ្ងៃអាទិត្យ ខណៈសេតវិមាន បានបញ្ជាក់ជាដដែលៗ ពីគោលនយោបាយរបស់សហរដ្ឋអាមេរិក មិនមានការប្រែប្រួលនោះឡើយ។
គោលនយោបាយរបស់ក្រុងវ៉ាស៊ីនតោន តែងតែមាន«ភាពមិនច្បាស់លាស់ ជាយុទ្ធសាស្ត្រ» ពោលគឺមិនប្តេជ្ញា ការពារតៃវ៉ាន់ ប៉ុន្តែក៏មិនបដិសេធការពារដល់ដែនកោះមួយនេះដែរ។
តៃវ៉ាន់ ជាកោះគ្រប់គ្រងដោយខ្លួនឯង ស្ថិតនៅឆ្នេរសមុទ្រ នាភាគខាងកើត ប្រទេសចិន ហើយក្រុងប៉េកាំង តែងតែទាមទារ ជាផ្នែកមួយ នៃទឹកដីរបស់ខ្លួន។ ក្រុងវ៉ាស៊ីនតោន បានដើរយ៉ាងតឹងរ៉ឹងខាងការទូត លើបញ្ហានេះ។ ម្យ៉ាងវិញទៀត សហរដ្ឋអាមេរិក ក៏ប្រកាន់ខ្ជាប់នូវគោលនយោបាយចិនតែមួយ ដែលជាមូលដ្ឋានគ្រឹះ នៃទំនាក់ទំនងរបស់ខ្លួន ជាមួយនឹងក្រុងប៉េកាំង។
ក្រោមគោលនយោបាយនេះ តៃវ៉ាន់ គឺជាផ្នែកមួយរបស់ប្រទេសចិន ហើយគោលជំហរនេះ មិនត្រូវបានជំទាស់នោះដែរ។ ដូច្នេះ សហរដ្ឋអាមេរិក មិនបានទទួលស្គាល់តៃវ៉ាន់ ថា ជារដ្ឋដាច់ដោយឡែក និង ក៏គ្មានទំនាក់ទំនងការទូត ជាមួយកោះនេះឡើយ។ ប៉ុន្តែសហរដ្ឋអាមេរិក នៅតែរក្សាទំនាក់ទំនងយ៉ាងជិតស្និទ្ធ និង លក់អាវុធទៅឱ្យតៃវ៉ាន់ មានតម្លៃរាប់ពាន់លានដុល្លារ ក្រោមច្បាប់ទំនាក់ទំនងតៃវ៉ាន់ ដែលចែងថា សហរដ្ឋអាមេរិក ត្រូវតែផ្តល់មធ្យោបាយការពារ ដល់កោះតៃវ៉ាន់។
ប្រធានាធិបតីសហរដ្ឋអាមេរិក បានថ្លែងជាដដែល នៅក្នុងបទសម្ភាសន៍ រយៈពេល៦០នាទី ជាមួយបណ្ដាញទូរទស្សន៍ CBS កាលពីថ្ងៃអាទិត្យ ថា «គោលនយោបាយចិនតែមួយ និង តៃវ៉ាន់ វិនិច្ឆ័យ ដោយខ្លួនឯង លើឯករាជភាពរបស់ពួកគេ។ យើងមិនផ្លាស់ប្តូរ មិនលើកទឹកចិត្តពួកគេ ឱ្យទទួលឯករាជ្យនោះដែរ ព្រោះវាជាការសម្រេចចិត្តរបស់ពួកគេ»៕
