រដ្ឋធានីវ៉ាស៊ីនតោន៖ ក្រោយការដឹងពីអានុភាពដ៏ខ្លាំងក្លារបស់ប្រព័ន្ធបាញ់គ្រាប់រ៉ុក្កែតដ៏ទំនើបហាយម៉ាស (HIMAR) ផលិតនៅសហរដ្ឋអាមេរិក នោះ ក្រុងវ៉ាស៊ីនតោន បានបន្ដផ្ដល់ជំនួយយោធាថ្មី មានទំហំទឹកប្រាក់ ១,១ពាន់លានដុល្លារ ដោយក្នុងនោះមានទាំងប្រព័ន្ធកាំភ្លើងធំដ៏ ចំនួន១៨គ្រឿង ទៅដល់រដ្ឋាភិបាលក្រុងកៀវ ហើយកម្លាំងទាហានរុស្ស៊ី នឹងជួបគ្រោះអាសន្នធំ ខណៈប្រព័ន្ធ HIMARS កាន់តែច្រើន ធ្លាក់ទៅដល់ដៃរបស់អ៊ុយក្រែន។
សារព័ត៌មាន Al Jazeera បានចេញផ្សាយ កាលពីថ្ងៃព្រហស្បតិ៍ ទី២៩ ខែកញ្ញា ថា មន្ទីរបញ្ចកោណ នៃក្រសួងការពារជាតិសហរដ្ឋអាមេរិក បានបញ្ជាក់ កាលពីថ្ងៃពុធ ថា មន្ទីរបញ្ចកោណ បានចុះកិច្ចព្រមព្រៀង ជាមួយក្រុមហ៊ុនឧស្សាហកម្មផលិតគ្រឿងយុទ្ធោបករណ៍ មានតម្លៃ ១,១ពាន់លានដុល្លារ សម្រាប់ជាជំនួយយោធាថ្មី ផ្គត់ផ្គង់ដល់កងទ័ពអ៊ុយក្រែន។ នៅក្នុងកញ្ចប់ជំនួយយោធាថ្មីទាំងនេះ ក៏បូកបញ្ចូលទាំងប្រព័ន្ធបាញ់គ្រាប់រ៉ុក្កែតចល័ត HIMARS ចំនួន១៨គ្រឿង និង គ្រឿងសព្វាវុធទំនើបៗជាច្រើនទៀត សម្រាប់ជួយដល់កងទ័ពអ៊ុយក្រែន ទប់ទល់នឹងយន្តហោះគ្មានមនុស្ស បើក ឬដ្រូន ដែលរុស្ស៊ី បាន និង កំពុងតែប្រើប្រាស់ ដើម្បីប្រឆាំងនឹងកងទ័ពអ៊ុយក្រែន ផងដែរ។
កញ្ចប់ជំនួយគ្រឿងយុទ្ធោបករណ៍ និង សម្ភារយោធាថ្មីនេះ បានធ្វើឡើង ក្រោមគំនិតផ្តួចផ្តើមជំនួយសន្តិសុខអ៊ុយក្រែន ដោយមានគោលបំណងបំពេញតម្រូវការពាក់កណ្តាល និង រយៈពេលវែង សម្រាប់ជួយដល់រដ្ឋាភិបាលក្រុងកៀវ។ រដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានសន្យាផ្តល់ជំនួយ មានតម្លៃ១៧ពាន់លានដុល្លារ ជួយដល់អ៊ុយក្រែន ហើយ នឹងបញ្ជូនគ្រឿងសឹកទាំងនោះ ឲ្យបានលឿន តាមតែអាចធ្វើទៅបាន។
កញ្ចប់ជំនួយសន្ដិសុខរបស់សហរដ្ឋអាមេរិក ជួយដល់ប្រទេសអ៊ុយក្រែន បានកើនដល់ជិត១៧ពាន់លានដុល្លារ ចាប់តាំងពីលោក ចូ បៃដិន បានឡើងកាន់អំណាច កាលពីដើមឆ្នាំ២០២១។ ចំណែកកញ្ចប់ជំនួយថ្មី មានទំហំទឹកប្រាក់ ១,១ ពាន់លានដុល្លារនេះ ក៏រាប់បញ្ចូលទាំង ប្រព័ន្ធ HIMARS ចំនួន១៨គ្រឿងបន្ថែម និង ប្រព័ន្ធ Titan ចំនួន១២គ្រឿង សម្រាប់ប្រឆាំងនឹងយន្តហោះដ្រូន។ ក្រៅពីនេះ កញ្ចប់ជំនួយទាំងនេះ ក៏បានចំណាយលើយានយន្តប្រហែល៣០០គ្រឿង, រថយន្តធុនធំរាប់សិបគ្រឿង សម្រាប់ការដឹកជញ្ជូនសម្ភារយោធាធុនធ្ងន់ និង ប្រព័ន្ធរ៉ាដា ក៏ដូចជា ឧបករណ៍ទំនាក់ទំនង និង ឈ្លបការណ៍ចម្រុះប្រភេទ រួមជាមួយសម្ភារ សម្រាប់កងទ័ព ផងដែរ។
ក្រោយការវាយប្រយុទ្ធគ្នា អស់រយៈពេលជាង៧ខែកន្លងមកនេះ ហើយនៅតែរកទីបញ្ចប់គ្នានោះ សង្គ្រាននេះ នឹងឈានទៅរកដំណាក់កាលថ្មីមួយផ្សេងទៀត ក្រោយបរាជ័យរបស់កងទ័ពរុស្ស៉ី កាលពីពេលថ្មីៗនេះ បន្ទាប់ពីអ៊ុយក្រែន បានវាយបកយ៉ាងលឿន ខណៈក្រុងមូស្គូកំពុងប៉ុនប៉ងប្រើប្រាស់លទ្ធផលបោះឆ្នោតប្រជាមតិ នៅតំបន់ភាគខាងកើត និង ខាងត្បូង ប្រទេសអ៊ុយក្រែន ដើម្បីដាក់តំបន់ទាំង៤របស់អ៊ុយក្រែន ទៅជាទឹកដីរបស់រុស្ស៊ី ហើយពង្រីកនូវប្រតិបត្ដិការយោធារបស់ខ្លួន៕
