រដ្ឋធានីវ៉ាស៊ីនតោន៖ នៅក្នុងសកម្មភាពឈ្លានពានរបស់ក្រុងមូស្គូ មកលើប្រទេសអ៊ុយក្រែន នេះ មានកំពូលអ្នកមានរុស្ស៊ីជាច្រើននាក់ ត្រូវប្រឈមមុខនឹងទោសទណ្ឌ ពីបណ្ដាប្រទេសបស្ចិមលោក ហើយឥឡូវនេះ សហរដ្ឋអាមេរិក បានចោទប្រកាន់ទៅលើមហាសេដ្ឋីរុស្ស៊ី លោក អូឡែគ វ្ល៉ាឌីមៀរ៉ូវិច ដែរីប៉ាស្កា (Oleg Vladimirovich Deripaska) ពីបទរំលោភបំពានលើទណ្ឌកម្ម ប្រឆាំងនឹងក្រុងមូស្គូ បានចូលឈ្លានពាន នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ។
សារព័ត៌មាន Daily Kos បានចេញផ្សាយ កាលពីថ្ងៃសុក្រ ទី៣០ ខែកញ្ញា ថា មហាសេដ្ឋីរុស្ស៊ី លោក Oleg Vladimirovich Deripaska បានរងនូវការចោទប្រកាន់ ពីបទគេចវេះ ពីការដាក់ទណ្ឌកម្ម ដែលជាផ្នែកមួយ នៃកិច្ចខិតខំប្រឹងប្រែងបន្ត ដោយក្រសួងយុត្តិធម៌ ដើម្បីរក្សាប្រជាជនរុស្ស៊ី ដែលមានទ្រព្យសម្បត្តិច្រើន មានទំនាក់ទំនងជាមួយប្រធានាធិបតី លោក វ្ល៉ាឌីមៀរ ពូទីន (Vladimir Putin) ឲ្យទទួលខុសត្រូវ ចំពោះការបំពានច្បាប់របស់សហរដ្ឋអាមេរិក ខណៈសង្គ្រាមរបស់រុស្ស៊ី នៅអ៊ុយក្រែន កំពុងតែបន្ដផ្ទុះឡើង។
ក្រសួងយុត្តិធម៌សហរដ្ឋអាមេរិក កាលពីថ្ងៃព្រហស្បតិ៍ បានបិទការចោទប្រកាន់មួយ ដែលបានចោទប្រកាន់ ទៅលើមហាសេដ្ឋីរុស្ស៊ី លោក Deripaska និង អ្នកសហការចំនួន២នាក់ផ្សេងទៀត ជាពលរដ្ឋអាមេរិកម្នាក់ គឺអ្នកស្រី អូលហ្កា ស្រីគី (Olga Shriki) និង ជនជាតិរុស្ស៊ី ម្នាក់ គឺលោក ណាតាលៀ មីខាយឡូវណា បាដាកូវ៉ា (Natalia Mikhaylovna Bardakova) ពីបទឃុបឃិតរំលោភបំពាន លើការដាក់ទណ្ឌកម្មរបស់សហរដ្ឋអាមេរិក ដែលដាក់លើឧកញ៉ា និង ក្រុមហ៊ុនវិនិយោគឯកជនរបស់គាត់ ឈ្មោះ Basic Element ។ ជាមួយគ្នានេះដែរ អ្នកស្រី អេកាតែរីណា អូឡែហ្គោវណា វ៉ូរ៉ូនីណា (Ekaterina Olegovna Voronina) ជាស្រីស្នេហ៍របស់មហាសេដ្ឋីរុស្ស៊ី លោក Deripaska ក៏បានចោទប្រកាន់ ពីការបញ្ចេញសេចក្ដីថ្លែងការណ៍ក្លែងក្លាយ ផ្ញើទៅកាន់អាជ្ញាធរសហរដ្ឋអាមេរិក ដោយសារលោកស្រី មានគោលបំណង ចូលមកកាន់ទឹកដីសហរដ្ឋអាមេរិក ដើម្បីសម្រាលកូនដល់គូស្នេហ៍របស់ពួកគេ។
លោក មែររីក ហ្កាឡែនដ៍ (Merrick Garland) រដ្ឋមន្ដ្រីក្រសួងយុត្ដិធស់សហរដ្ឋអាមេរិក បានបញ្ជាក់ នៅក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ ថា «បន្ទាប់ពីមានការឈ្លានពាន ដោយអយុត្តិធម៌ និង គ្មានការញុះញង់របស់រុស្ស៊ី មកលើអ៊ុយក្រែន ខ្ញុំបានសន្យាជាមួយប្រជាជនអាមេរិក ថា ក្រសួងយុត្តិធម៌សហរដ្ឋអាមេរិក នឹងទទួលខុសត្រូវ ចំពោះអ្នកបំពានច្បាប់របស់យើង និង គំរាមកំហែងដល់សន្តិសុខជាតិរបស់យើង។ ចំណែកការចោទប្រកាន់ នៅថ្ងៃនេះ បង្ហាញថា យើងកំពុងតែរក្សានូវការសន្យាទាំងនេះ»។
លោកមហាសេដ្ឋី Deripaska និង ក្រុមឧកញ៉ា មានទ្រព្យធនកំពូលៗរបស់រុស្ស៊ី ចំនួន២៣នាក់ និង ក្រុមមន្ដ្រីជាន់ខ្ពស់របស់រដ្ឋាភិបាលក្រុងមូស្គូ កាលពីខែមេសា ឆ្នាំ២០១៨ បានប្រឈមមុខនឹងវិធានការដ៏លំបាកបំផុត ចេញដោយសហរដ្ឋអាមេរិក នៅក្នុងការឆ្លើយតបទៅនឹងវិមានក្រឹមឡាំង ជុំវិញការរឹបអូសឧបទ្វីបគ្រីមៀ (Crimea) របស់ប្រទេសអ៊ុយក្រែន ដាក់ជាទឹកដីរុស្ស៊ី នៅក្នុងឆ្នាំ២០១៤ ហើយបានចោទប្រកាន់ ពីការជ្រៀតជ្រែក ចូលក្នុងកិច្ចការបោះឆ្នោតរបស់សហរដ្ឋអាមេរិក នៅក្នុងឆ្នាំ២០១៦។
ដោយឡែក មហាសេដ្ឋីរុស្ស៊ី បានឆ្លើយតប នៅពេលនោះ ថា ការចោទប្រកាន់នេះ គា្មនមូលដ្ឋានច្បាស់លាស់ ហើយក៏បានប្តឹង ទៅកាន់ការិយាល័យគ្រប់គ្រងទ្រព្យសម្បត្តិបរទេស នៃក្រសួងសេដ្ឋកិច្ចសហរដ្ឋអាមេរិក ដែលត្រួតពិនិត្យ លើគោលនយោបាយ ដាក់ទណ្ឌកម្មរបស់សហរដ្ឋអាមេរិក។ ប៉ុន្ដែចៅក្រមរបស់តុលាការប្រចាំស្រុករបស់អាមេរិក បានច្រានចោលបណ្តឹងនោះ កាលពីឆ្នាំមុន។
ក្រសួងយុត្ដិធម៌សហរដ្ឋអាមេរិក បានបញ្ជាក់ថា អាជ្ញាធរអាមេរិក បានចោទប្រកាន់ ថា ក្រោយការដាក់ទណ្ឌកម្ម នៅឆ្នាំ២០១៨ នោះមក មហាសេដ្ឋីរុស្ស៊ី លោក Deripaska បានប្រើប្រាស់ប្រព័ន្ធហិរញ្ញវត្ថុរបស់ប្រទេស ដោយខុសច្បាប់ ដើម្បីរក្សាអចលនទ្រព្យដ៏ប្រណីតចំនួន៣ នៅលើទឹកដីសហរដ្ឋអាមេរិក។ លុះមកដល់ឆ្នាំ២០១៩ អ្នកស្រី Shriki ជាបក្ខពួករបស់មហាសេដ្ឋីរុស្ស៊ី លោក Deripaska បានជួយរៀបចំការលក់ស្ទូឌីយោតន្ត្រីកាលីហ្វ័រញ៉ា ជាកម្មសិទ្ធិរបស់មហាសេដ្ឋីរូបនេះ តាមរយៈក្រុមហ៊ុន Shell ជាច្រើន ដែលប្រមូលបានលុយជាង៣លានដុល្លារ។ ក្រោយមក អ្នកស្រីបានព្យាយាមផ្ទេរ ទៅក្នុងគណនីជាកម្មសិទ្ធិរបស់ក្រុមហ៊ុនមួយ ក្នុងចំណោមក្រុមហ៊ុនរបស់មហាសេដ្ឋីរុស្ស៊ី។
លោកស្រី លីសា ម៉ូណាកូ (Lisa Monaco) អនុរដ្ឋមន្ដ្រីក្រសួងយុត្ដិធម៌សហរដ្ឋអាមេរិក បានបញ្ជាក់ នៅក្នុងសេចក្ដីថ្លែងការណ៍ ថា ស្របពេលកំពុងតែបម្រើការងារដល់វិស័យរដ្ឋ និង វិស័យថាមពលរបស់រុស្ស៊ី នោះ មហាសេដ្ឋី លោក Oleg Deripaska បានព្យាយាម គេចចេញពីការដាក់ទណ្ឌកម្មរបស់សហរដ្ឋអាមេរិក តាមរយៈការភូតកុហក និង ការបោកបញ្ឆោត ដើម្បីរកប្រាក់ និង ទទួលបានអត្ថប្រយោជន៍ ពីវិធីសាស្ដ្ររស់នៅរបស់អាមេរិក៕