រដ្ឋធានីសេអ៊ូល៖ ស្របពេលស្ថានការណ៍ កំពុងតែតានតឹងខ្លាំង នៅក្នុងតំបន់ និង ចំពេលអនុប្រធានាធិបតីសហរដ្ឋអាមេរិក បានធ្វើដំណើរមកកាន់ប្រទេសអាស៊ីបូព៌ានោះ ប្រទេសកូរ៉េខាងជើង បានបន្ដបាញ់សាកល្បងមីស៊ីលបាលិស្ទីក (Ballistic Missile) ចំនួន៤គ្រាប់ នៅក្នុងរយៈពេលត្រឹមតែ១សប្ដាហ៍ប៉ុណ្ណោះ។
សារព័ត៌មាន Al Jazeera បានចេញផ្សាយ កាលពីព្រឹក ថ្ងៃសៅរ៍ ទី១ ខែតុលា ថា មន្ដ្រីជប៉ុន បានរាយការណ៍ ថា គ្រាប់មីស៊ីលបាលិស្ទីក បានហោះ នៅក្នុងចម្ងាយ៤០០គីឡូម៉ែត្រ និង នៅក្នុងរយៈកម្ពស់អតិបរមា ប្រហែល៥០គីឡូម៉ែត្រ។
បើតាមក្រុមមន្ដ្រីជប៉ុន និង កូរ៉េខាងត្បូង បានអះអាងថា កូរ៉េខាងជើង បានបាញ់មីស៊ីលបាលិស្ទីក រយៈចម្ងាយខ្លី ចំនួន២គ្រាប់ ចេញពីតំបន់ទីក្រុងព្យុងយ៉ាង (Pyongyang) សំដៅទៅកាន់ឆ្នេរសមុទ្ររបស់ប្រទេសកុម្មុយនីស្ដមួយនេះ។ ប៉ុន្ដែបើគិតត្រឹមតែរយៈពេល១សប្ដាហ៍ប៉ុណ្ណោះ ក្រុងព្យុងយ៉ាង បានបាញ់មីស៊ីល រហូតដល់ចំនួន៤គ្រាប់។
បណ្ដាញទូរទស្សន៍ជាតិជប៉ុន NHK បានផ្សាយ ថា គ្រាប់មីស៊ីល ជាច្រើនគ្រាប់ បានបាញ់ចេញពីប្រទេសកូរ៉េខាងជើង កាលពីព្រឹក ថ្ងៃសៅរ៍។ បើតាមប្រភពពីរដ្ឋាភិបាល អះអាងថា កាំជ្រួចទាំងនោះ ហាក់ដូចជាបានធ្លាក់ នៅខាងក្រៅតំបន់សេដ្ឋកិច្ចផ្តាច់មុខរបស់ប្រទេសជប៉ុន។
ឆ្មាំសមុទ្រជប៉ុន បានបញ្ជាក់ នៅក្នុងសេចក្ដីថ្លែងការណ៍របស់ខ្លួន កាលពេលវេលាម៉ោង៦ និង៤៧នាទិព្រឹក ថ្ងៃសៅរ៍ ម៉ោង នៅក្នុងតំបន់ ថា «អ្វីដែលបានឃើញ ជាគ្រាប់មីស៊ីលបាលិស្ទីក ត្រូវបានបាញ់ ចេញពីប្រទេសកូរ៉េខាងជើង»។
ការិយាល័យរបស់លោក ហ្វូមីអូ គីស៊ីដា (Fumio Kishida) នាយករដ្ឋមន្ដ្រីជប៉ុន បានសរសេរ នៅលើបណ្ដាញសង្គមធ្វីធើរ ថា គ្រាប់ជ្រួចចុងក្រោយនេះ កំពុងតែវិភាគ និង ណែនាំ សម្រាប់សុវត្ថិភាពរបស់មនុស្ស យន្តហោះ និង នាវា។
កូរ៉េខាងជើង កាលពីថ្ងៃពុធ បានបាញ់មីស៊ីលបាលិស្ទីក រយៈចម្ងាយខ្លី សំដៅទៅកាន់សមុទ្រ ហើយកាលពីថ្ងៃព្រហស្បតិ៍ ក៏បានបន្ដបាញ់មីស៊ីលបន្ថែមទៀត ដោយត្រឹមតែរយៈពេលប៉ុន្មានម៉ោងមុន និង ក្រោយដំណើរបំពេញទស្សនកិច្ចរបស់លោកស្រី កាម៉ាឡា ហាររីស (Kamala Harris) អនុប្រធានាធិបតីសហរដ្ឋអាមេរិក មកដល់ប្រទេសកូរ៉េខាងត្បូង។ នៅក្នុងអំឡុងពេលមកដល់រដ្ឋធានីស៊េអូល ប្រទេសកូរ៉េខាងត្បូង នោះ លោកស្រី អនុប្រធានាធិបតី បានសង្កត់ធ្ងន់ អំពីការប្តេជ្ញាចិត្តរបស់សហរដ្ឋអាមេរិក ចំពោះសន្តិសុខរបស់សម្ពន្ធមិត្ត នៅអាស៊ីបូព៌ារបស់ក្រុងវ៉ាស៊ីនតោន។
ការបាញ់មីស៊ីលបាលិស្ទីកចុងក្រោយរបស់កូរ៉េខាងជើង បានកើតឡើង ក្រោយពេលកងទ័ពជើងទឹករបស់កូរ៉េខាងត្បូង សហរដ្ឋអាមេរិក និង ជប៉ុន បានធ្វើសមយុទ្ធយោធាត្រីភាគី ប្រឆាំងនឹងនាវាមុជទឹក ជាលើកដំបូង នៅក្នុងរយៈពេល៥ឆ្នាំកន្លងមកនេះ។
ដោយឡែក លោក តូស៊ីរ៉ូ អ៊ីណូ (Toshiro Ino) អនុរដ្ឋមន្ដ្រី ក្រសួងការពារជាតិជប៉ុន បានបញ្ជាក់ ថា «ការបាញ់មីស៊ីលម្ដងហើយម្ដងទៀតរបស់កូរ៉េខាងជើង កំពុងតែបង្កើននូវការបង្កហេតុ ជាបន្តបន្ទាប់។ សកម្មភាពរបស់កូរ៉េខាងជើង ជាគំរាមកំហែងដល់សន្តិភាព និង សុវត្ថិភាព មិនត្រឹមតែ សម្រាប់ប្រទេសជប៉ុន ប៉ុណ្ណោះទេ ប៉ុន្ដែវាថែមទាំងបង្កនូវការគំរាមកំហែងដល់តំបន់ និង សហគមន៍អន្តរជាតិផងដែរ ព្រោះត្រឹមតែរយៈពេល១សប្តាហ៍ កូរ៉េខាងជើង បាញ់មីស៊ីល រហូតដល់៤គ្រាប់។
លោកអនុរដ្ឋមន្ដ្រី ក្រសួងការពារជាតិជប៉ុន បានបន្ថែមថា គ្រាប់មីស៊ីលទាំងនោះ បានហោះ នៅក្នុងរយៈកម្ពស់អតិបរមា ៥០គីឡូម៉ែត្រ និង ចម្ងាយ៤០០គីឡូម៉ែត្រ មុននឹងវាធ្លាក់ចុះទៅក្នុងសមុទ្ររបស់ជប៉ុន ស្ថិតនៅខាងក្រៅតំបន់សេដ្ឋកិច្ចផ្ដាច់មុខរបស់ជប៉ុន។
កូរ៉េខាងជើង បានបាញ់សាកល្បងមីស៊ីល ជាច្រើនគ្រាប់ នៅឆ្នាំ២០២២នេះ ហើយអ្នកវិភាគមើលឃើញថា ការបង្កើនល្បឿន នៃការសាកល្បងនេះ ក៏ជាកិច្ចខិតខំប្រឹងប្រែង ដើម្បីកសាងសមត្ថភាពកាំជ្រួចផ្លោងរបស់ក្រុងព្យុងយ៉ាង ក៏ដូចជា ការទាញយកផផប្រយោជន៍ ពីពិភពលោក ដែលកំពុងតែរំខាន ដោយជម្លោះ នៅក្នុងប្រទេសអ៊ុយក្រែន និង វិបត្តិផ្សេងៗទៀតផងដែរ។ ការធ្វើតេស្តនុយក្លេអ៊ែរ និង ការបាញ់មីស៊ីលផ្លោងរបស់កូរ៉េខាងជើង ត្រូវបានហាមឃាត់ ដោយក្រុមប្រឹក្សាសន្តិសុខអង្គការសហប្រជាជាតិ អស់រយៈពេលជាយូរមកហើយ។
លោក ឡេហ្វ-អេរិក អ៊ីស្លេ (Leif-Eric Easley) សាស្ត្រាចារ្យ នៃសាកលវិទ្យាល័យ អេហា (Ewha) ស្ថិតក្នុងរដ្ឋធានីក្រុងសេអ៊ូល ប្រទេសកូរ៉េខាងត្បូង បានបញ្ជាក់ ថា «បើទោះជាភាពទន់ខ្សោយផ្ទៃក្នុងរបស់កូរ៉េខាងជើង និង ភាពឯកោ ពីអន្តរជាតិ យ៉ាងណាក៏ដោយ ក៏ក្រុងព្យុងយ៉ាង កំពុងតែបន្ដធ្វើសព្វាវុធោបនីយកម្ម យ៉ាងឆាប់រហ័ស និង ទាញយកផលប្រយោជន៍ ពីពិភពលោក ដែលកំពុងតែបែងចែក ដោយគូប្រជែង រវាងសហរដ្ឋអាមេរិក និង ចិន ហើយការដាក់បញ្ចូលតំបន់ចំនួន៤វរបស់អ៊ុយក្រែន ដែលកាន់កាប់ដោយទាហានក្រុងមូស្គូ ទៅជាទឹកដីរបស់រុស្ស៊ី»។
កងទ័ពជើងទឹករបស់សហរដ្ឋអាមេរិក កាលពីប៉ុន្មានថ្ងៃមុននេះ បានបញ្ជូននាវាផ្ទុកយន្ដហោះ ដើរ ដោយថាមពលនុយក្លេអ៊ែរដ៏ទំនើបរបស់ខ្លួន USS Ronald Reagan ចូលមកដល់ដែនទឹករបស់កូរ៉េខាងត្បូង ដើម្បីធ្វើសមយុទ្ធយោធារួមជាគ្នាជាមួយសហរដ្ឋអាមេរិក។ ដំណើរមកដល់របស់នាវាផ្ទុកយន្ដហោះ USS Ronald Reagan របស់សហរដ្ឋអាមេរិក នៅក្នុងប្រទេសអាស៊ីបូព៌ា នេះ ក៏ជាការបង្ហាញ អំពីការប្ដេជ្ញាចិត្តរបស់ក្រុងវ៉ាស៊ីនតោន ដើម្បីការពារសម្ពន្ធមិត្ត នៅក្នុងតំបន់ សម្រាប់ការត្រៀមខ្លួនរួចជាស្រេច ដើម្បីទប់ទល់នឹងការគំរាមកំហែង មកពីប្រទេសកូរ៉េខាងជើង ផងដែរ៕