រដ្ឋធានីមូស្គូ៖ ដោយសារតែ រុស្ស៊ី កំពុងលង់ខ្លួន នៅក្នុងសង្គ្រាម នៅក្នុងប្រទេសអ៊ុយក្រែន ទើបអតីតមន្ដ្រីការទូតប្រទេសមហាអំណាចយោធាលេខ២របស់ពិភពលោក បានអះអាង ថា អនាគតរបស់រុស្ស៊ី កំពុងតែស្ថិតក្នុងភាពមិនច្បាស់លាស់ ចាប់តាំងពីការឈ្លានពាន ទៅលើប្រទេសជិតខាងរបស់ខ្លួនមួយនេះ។
ទីភ្នាក់ងារសារព័ត៌មាន Reuters បានចេញផ្សាយ កាលពីថ្ងៃចន្ទ ទី១៧ ខែតុលា ថា អតីតមន្ដ្រីការទូតរុស្ស៊ី ម្នាក់ ដែលប្រកាសលាលែងពីតំណែង ដោយសារការប្រឆាំងនឹងសង្គ្រាម បានថ្លែង ថា សង្គ្រាមឈ្លានពានរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ទៅលើអ៊ុយក្រែន បានកំណត់ផ្លូវ ឆ្ពោះទៅរកភាពចលាចល ដែលអាចធ្វើឲ្យប្រមុខវិមានក្រឹមឡាំង ធ្វើឱ្យសង្គ្រាមស៊ីវិល ឬការបែកប្រទេស។
លោក បូរីស បូនដារ៉ែវ (Boris Bondarev) អតីតមន្ដ្រីការទូតរុស្ស៊ី បម្រើការងារ សម្រាប់បេសកកម្មអចិន្ត្រៃយ៍របស់រុស្ស៊ី ប្រចាំនៅការិយាល័យរបស់អង្គការសហប្រជាជាតិ នៅទីក្រុងហ្ស៊ឺណែវ បានប្រកាសលាលែង ពីតំណែងរបស់គាត់ នៅក្នុងខែឧសភា ឆ្នាំ២០២២ ជុំវិញការតវ៉ាប្រឆាំងនឹងការឈ្លានពានរបស់ក្រុងមូស្គូ ទៅលើប្រទេសអ៊ុយក្រែន។
លោក Boris Bondarev បានបញ្ជាក់ ថា សង្គ្រាមបានបង្ហាញ ពីរបៀបគាបសង្កត់ និង ធ្វើឲ្យរុស្ស៊ី ខូចមុខមាត់។ ប្រទេសរុស្ស៊ី ត្រូវបានគ្រប់គ្រង ដោយ«ក្រុមមនុស្សចាំឆ្លើយតែយល់ព្រម» ទើបអនុញ្ញាតឲ្យប្រធានាធិបតី លោក វ្ល៉ាឌីមៀ ពូទីន (Vladimir Putin) អាចសម្រេចចិត្តលើកិច្ចការធំៗ នៅក្នុងក្រុមបន្ទរ សម្រាប់ការឃោសនាដោយផ្ទាល់ខ្លួនរបស់គាត់។
អតីតមន្ដ្រីការទូតរុស្ស៊ី រូបនេះ បញ្ជាក់ នៅក្នុងអត្ថបទកិច្ចការបរទេសមួយ ថា «ប្រសិនបើលោក ពូទីន ត្រូវបានបណ្ដេញចេញពីតំណែង អនាគតរបស់រុស្ស៊ី នឹងធ្លាក់ទៅក្នុងស្ថានភាពមិនច្បាស់លាស់ កាន់តែធ្ងន់ធ្ងរឡើង។ រីឯអ្នកស្នងតំណែងរបស់គាត់ អាចប្រាកដណាស់ នឹងព្យាយាមបន្តសង្គ្រាម ជាពិសេស ដោយសារតែទីប្រឹក្សាសំខាន់ៗរបស់ពូទីន ទទួលបានការកោតសរសើរ ពីទីភ្នាក់ងារសន្ដិសុខ។ ប៉ុន្តែគ្មាននរណាម្នាក់ នៅក្នុងប្រទេសរុស្ស៊ី បញ្ជាលើឋានៈរបស់គាត់ទេ។ ដូច្នេះប្រទេសនេះ ទំនងជានឹងចូលដល់ដំណាក់កាល មានភាពចលាចលខាងនយោបាយ ហើយវាថែមទាំងអាចធ្លាក់ចូលទៅក្នុងភាពវឹកវរថែមទៀតផង»៕