រដ្ឋធានីវ៉ាស៊ីនតោន៖ នៅក្នុងការបោះឆ្នោតពាក់កណ្ដាលអាណត្ដិ នៅសហរដ្ឋអាមេរិក កាលពីដើមខែវិច្ឆិកា គណបក្សសាធារណរដ្ឋ ទទួលបានសំឡេងគាំទ្រភាគច្រើន ហើយត្រូវគ្រប់គ្រងសភាជាន់ទាប។
សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី១៧ ខែវិច្ឆិកា ថា ទីភ្នាក់ងារសារព័ត៌មាន AP បានប្រកាស ថា លោក មៃ ហ្កាសៀ (Mike Garcia) មកពីគណបក្សសាធារណរដ្ឋ កាលពីថ្ងៃពុធ បានទទួលជ័យជម្នះ នៅក្នុងការប្រកួតប្រជែង នៅរដ្ឋកាលីហ្វ័រញ៉ា។ ជាមួយនឹងលទ្ធផលនេះ បានធ្វើឱ្យអាសនៈរបស់គណបក្សសាធារណរដ្ឋ កើនដល់ ២១៨អាសនៈ ហើយក៏ជាសំឡេង ភាគច្រើន សម្រាប់គ្រប់គ្រងសភាតំណាងរាស្ត្រអាមេរិក ខណៈគណបក្សប្រជាធិបតេយ្យរបស់ប្រធានាធិបតី លោក ចូ បៃដិន ទទួលបាន២១០អាសនៈ។
លោក ខេវីន ម៉ាកខាធី (Kevin McCarthy) នឹងឡើងកាន់តំណែងជាប្រធានសភាតំណាងរាស្ត្រអាមេរិក ខណៈសភាថ្មីទាំង២ នឹងបើកសម័យប្រជុំ នៅដើមឆ្នាំក្រោយ ក្រោយពេលគណបក្សសាធារណរដ្ឋ បានតែងតាំងគាត់ ឱ្យកាន់មុខតំណែងកំពូលមួយនេះ។ ចំណែកគណបក្សប្រជាធិបតេយ្យ នៅតែរក្សាការគ្រប់គ្រងព្រឹទ្ធសភាអាមេរិកដដែល៕
