បុរីញូវយ៉ក៖ ការវាយប្រហារយ៉ាងសាហាវ ទៅលើទឹកដីប៉ូឡូញ ដែលមានចម្ងាយត្រឹមតែប្រហែល៦គីឡូម៉ែត្រ ពីព្រំដែនអ៊ុយក្រែន បានធ្វើឲ្យមហាអំណាចបស្ចិមលោក កោះប្រជុំជាបន្ទាន់ និង បានស្ដីបន្ទោសយ៉ាងខ្លាំង ដល់រុស្ស៊ី។
សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី១៧ ខែវិច្ឆិកា ថា សហរដ្ឋអាមេរិក និង សម្ពន្ធមិត្តរបស់លោកខាងលិច បានរិះគន់យ៉ាងខ្លាំងដល់រុស្ស៊ី នៅក្នុងក្រុមប្រឹក្សាសន្ដិសុខ អង្គការសហប្រជាជាតិ ជុំវិញការវាយប្រហារ ដោយមីស៊ីល នេះ។ កិច្ចប្រជុំនេះ បានកោះហៅ ត្រឹមតែមួយថ្ងៃ ក្រោយពេលអង្គការណាតូ បានកំណត់ ថា មីស៊ីលនោះ បានបាញ់ចេញពីប្រព័ន្ធការពារដែនអាកាសរបស់អ៊ុយក្រែន ហើយវាបានធ្លាក់នៅក្នុងប្រទេសប៉ូឡូញ ដែលជាសមាជិកណាតូ ដោយបានសម្លាប់កម្មករនៅក្នុងកសិដ្ឋាន ចំនួន២នាក់។
លោក ជេនស៍ ស្ដូលថែនប៊ឺគ (Jens Stoltenberg) អគ្គលេខាធិការ អង្គការណាតូ បានបញ្ជាក់ កាលពីថ្ងៃពុធ ថា ការវាយប្រហារយ៉ាងសាហាវ មកលើទឹកដីប៉ូឡូញ ប្រហែលជាលទ្ធផល នៃការបាញ់ប្រឆាំងនឹងមីស៊ីលពីប្រព័ន្ធការពាររបស់អ៊ុយក្រែន។ ប៉ុន្តែបញ្ហានេះ អាចនិយាយបាន ថា រុស្ស៊ី ត្រូវតែទទួលខុសត្រូវខ្ពស់បំផុត ចាប់តាំងពីក្រុងមូស្គូ បានចូលលុកលុយ នៅក្នុងប្រទេសអ៊ុយក្រែន រហូតមក។
លោកប្រធានអង្គការណាតូ បានបញ្ជាក់ ក្រោយការធ្វើជាអធិបតី នៅក្នុងកិច្ចប្រជុំជាមួយនឹងឯកអគ្គរាជទូត និង រដ្ឋទូតរបស់អង្គការណាតូ ថា «ការស៊ើបអង្កេត នៅក្នុងឧបទ្ទហេតុនេះ កំពុងតែបន្ដ ហើយយើងត្រូវការរង់ចាំលទ្ធផលនេះ… ប៉ុន្ដែយើងមិនបានបង្ហាញ ថា សកម្មភាពនេះ ជាការវាយប្រហារ ដោយចេតនានោះឡើយ។
លោក ជេនស៍ ស្ដូលថែនប៊ឺគ បានបន្ថែម ថា «ការវិភាគបឋមរបស់យើង បង្ហាញ ថា ឧបទ្ទវហេតុនេះ ទំនងជាបណ្តាលមកពីមីស៊ីលការពារដែនអាកាសរបស់ក្រុងកៀវ បាញ់ការពារទឹកដីរបស់អ៊ុយក្រែន ប្រឆាំងនឹងការវាយប្រហារ ដោយមីស៊ីលរបស់រុស្ស៊ី។ ប៉ុន្តែខ្ញុំសូមបញ្ជាក់ឲ្យច្បាស់ ថា នេះមិនមែនជាកំហុសរបស់អ៊ុយក្រែន នោះដែរ។ រុស្ស៊ី ត្រូវតែទទួលខុសត្រូវខ្ពស់បំផុត ខណៈក្រុងមូស្គូ កំពុងតែបន្តសង្គ្រាម ដោយខុសច្បាប់ ប្រឆាំងនឹងអ៊ុយក្រែន»។
ជាមួយគ្នានេះដែរ លោកអគ្គលេខាធិការ អង្គការណាតូ ក៏បានអំពាវនាវ ឲ្យមានកិច្ចប្រជុំប្រេសិតរបស់អង្គការសម្ពន្ធមិត្តយោធាកំពូលរបស់ពិភពលោកមួយនេះ នៅក្នុងទីក្រុងប្រ៊ុចសែលស៍ ប្រទេសប៊ែលហ្ស៊ិក ផងដែរ៕