រដ្ឋធានីណៃពិដោរ៖ របបយោធាមីយ៉ាន់ម៉ា បានប្រកាស ថា ខ្លួនកំពុងតែដោះលែងអ្នកទោសរាប់ពាន់នាក់ ដោយរួមទាំងអ្នកសេដ្ឋកិច្ចជនជាតិអូស្ដ្រាលី អ្នកកាសែតជប៉ុន និង អតីតឯកអគ្គរាជទូតចក្រភពអង់គ្លេស ផងដែរ។
សារព័ត៌មាន CNN បានចេញផ្សាយ កាលពីថ្ងៃព្រហស្បតិ៍ ទី១៧ ខែវិច្ឆិកា ថា បើតាមបណ្ដាញទូរទស្សន៍ គ្រប់គ្រង ដោយរដ្ឋមីយ៉ាន់ម៉ា MRTV បានរាយការណ៍ នៅថ្ងៃព្រហស្បតិ៍ ថា លោក សៀន ធឺណែល (Sean Turnell) ជនជាតិអូស្ដ្រាលី ជាអតីតទីប្រឹក្សាសេដ្ឋកិច្ចរបស់លោកស្រី អ៊ោង សានស៊ូជី, លោកស្រី វិកគី បូវមែន (Vicky Bowman) អតីតឯកអគ្គរាជទូតចក្រអង់គ្លេស, លោក តូរុ គូបូតា (Toru Kubota) អ្នកកាសែតជប៉ុន និង លោក ក្យាវ ហាតៃ អ៊ូ (Kyaw Htay Oo) ជនជាតិអាមេរិក ក៏នឹងត្រូវបានដោះលែងឱ្យមានសេរីភាពឡើងវិញ នៅក្នុងចំណោមអ្នកទោស ៥ ៧៧៤នាក់។
មីយ៉ាន់ម៉ា បានធ្លាក់ចូលទៅក្នុងវិបត្ដិនយោបាយ កាន់តែធ្ងន់ធ្ងរឡើង ចាប់តាំងពីការធ្វើរដ្ឋប្រហារយោធា ក្រោយពេលពួកឧត្ដមសេនីយ៍ បានឆ្មក់ចូលទៅចាប់ខ្លួនមន្ដ្រីរដ្ឋាភិបាលស៊ីវិល រួមទាំង លោកស្រី អ៊ោង សានស៊ូជី (Aung San Suu Kyi) កាលពីព្រឹក ថ្ងៃទី១ ខែកុម្ភៈ ឆ្នាំ២០២១។ សកម្មភាពរបស់ពួកយោធា បាននាំឲ្យមានរលកតវ៉ាពាសពេញប្រទេស។ ចំណែកក្រុមសន្ដិសុខរបស់របបសឹកមួយនេះ ក៏បានប្រើប្រាស់កម្លាំងយ៉ាងឃោរឃៅ ប្រឆាំងនឹងក្រុមអ្នកតវ៉ា ដោយបានសម្លាប់មនុស្សយ៉ាងតិច ២ ៤៦៥នាក់ ហើយប្រជាជន ចំនួន ១៦ ៣២៣នាក់ផ្សេងទៀត ត្រូវចាប់ឃុំខ្លួន៕
