រដ្ឋធានីណៃពិដោរ៖ កម្លាំងចលនាស៊ូរបស់រដ្ឋាភិបាលស្រមោល បានវាយប្រយុទ្ធគ្នាជាមួយនឹងកងទ័ពរបស់រដ្ឋាភិបាលសឹកមីយ៉ាន់ម៉ា នៅក្នុងទីក្រុងមីយ៉ាវ៉ាដឌី (Myawaddy) រដ្ឋការ៉ែន និង នៅតាមរដ្ឋផ្សេងៗទៀត បានបណ្ដាលឲ្យបាត់បង់ជីវិត និង រងរបួសជាច្រើននាក់។
សារព័ត៌មានភូមា Irrawaddy បានចេញផ្សាយ កាលពីថ្ងៃព្រហស្បតិ៍ ទី១៧ ខែវិច្ឆិកា ថា កម្លាំងការពារប្រជាជន (PDF) របស់រដ្ឋាភិបាលរួបរួមជាតិ (NUG) ឬ រដ្ឋាភិបាលស្រមោល ដែលត្រូវបានបង្កើតឡើង ក្រោយរដ្ឋប្រហារយោធា បានអះអាង ថា កម្លាំងរបស់ខ្លួន បានសម្លាប់ទាហានរបស់របបសឹកមីយ៉ាន់ម៉ា យ៉ាងតិច ៤៥នាក់ នៅក្នុងវាយប្រយុទ្ធគ្នា នៅទូទាំងប្រទេស ក្នុងរយៈពេល២ថ្ងៃចុងក្រោយនេះ។ ជាមួយគ្នានេះដែរ ជនស៊ីវិលយ៉ាងតិច១៥នាក់ រួមទាំងកុមារផងដែរ បានស្លាប់ និង រងរបួស ដោយសារតែរបបសឹក បានទម្លាក់គ្រាប់បែក ទៅលើគោលដៅស៊ីវិល។
ស្របគ្នានេះ ទ័ពរំដោះជាតិការ៉ែន (KNLA) ដែលជាចលនាតស៊ូដ៏ចំណាស់ជាងគេ នៅមីយ៉ាន់ម៉ា ក៏បានអះអាង ថា ការប៉ះទង្គិចគ្នា បានធ្វើឲ្យកងទ័ព នៃរបបសឹកមីយ៉ាន់ម៉ា ចំនួន៦នាក់បាត់បង់ជីវិត និង ១៤នាក់ផ្សេងទៀត ដោយរួមទាំងមេបញ្ជាការផងដែរ បានរងរបួស។
ប្រទេសមីយ៉ាន់ម៉ា បានធ្លាក់ចូលទៅក្នុងវិបត្ដិនយោបាយ កាន់តែធ្ងន់ធ្ងរ ចាប់តាំងពីលោកឧត្ដមសេនីយ៍ មិន អ៊ោងហ្លាង (Min Aung Hlaing) បានដឹកនាំកងទ័ព ធ្វើរដ្ឋប្រហារ ផ្ដួលរំលំរដ្ឋាភិបាលស៊ីវិលជាប់ឆ្នោតតាមលទ្ធិប្រជាធិបតេយ្យរបស់លោកស្រី អ៊ោង សានស៊ូជី (Aung San Suu Kyi) កាលពីថ្ងៃទី១ ខែកុម្ភៈ ឆ្នាំ២០២១។
ដោយឡែក ក្រុមមន្ដ្រីរដ្ឋាភិបាលរបស់លោកស្រី មួយចំនួន បាននាំគ្នា បង្កើតរដ្ឋាភិបាលរួមរួមជាតិ (NUG) ឬ រដ្ឋាភិបាលស្រមោល ដើម្បីរួមកម្លាំងគ្នា ជាមួយនឹងក្រុមឧទ្ទាមផ្សេងៗទៀត ប្រឆាំងនឹងរដ្ឋាភិបាលសឹក នៅក្នុងប្រទេសអាស៊ានមួយនេះ។
បើតាមសមាគមជំនួយការអ្នកទោសនយោបាយ (AAPP) បានរាយការណ៍ ថា អំពើរដ្ឋប្រហារយោធានេះ បាននាំឲ្យមានរលកតវ៉ាពាសពេញប្រទេស។ ចំណែកក្រុមសន្ដិសុខរបស់របបសឹក ក៏បានប្រើប្រាស់កម្លាំងយ៉ាងឃោរឃៅ ប្រឆាំងនឹងក្រុមអ្នកតវ៉ា ដោយបានសម្លាប់មនុស្សយ៉ាងតិច ២ ៤៦៥នាក់ ហើយប្រជាជន ចំនួន ១៦ ៣២៣នាក់ផ្សេងទៀត ត្រូវចាប់ឃុំខ្លួន៕