រដ្ឋធានីវ៉ាស៊ីនតោន៖ លោកស្រី ប្រធានសភាដ៏មានឥទ្ធិពលរបស់សហរដ្ឋអាមេរិក ធ្លាប់ធ្វើឲ្យចិន ផ្ទុះកំហឹង រហូតលើកកងទ័ព នាវាចម្បាំង និង យន្ដហោះរាប់សិបគ្រឿង ទៅធ្វើសមយុទ្ធយោធា ឡោមព័ទ្ធតៃវ៉ាន់ ប៉ុន្ដែឥឡូវនេះ បានប្រកាសលាលែងពីតំណែងហើយ។
សារព័ត៌មាន Al Jazeera បានចេញផ្សាយ កាលពីថ្ងៃព្រហស្បតិ៍ ទី១៧ ខែវិច្ឆិកា ថា លោកស្រី ណានស៊ី ផេឡូស៊ី (Nancy Pelosi) ប្រធានសភាសហរដ្ឋអាមេរិក បានប្រកាស ថា លោកស្រី នឹងស្វែងរកការបោះឆ្នោត ធ្វើជាមេដឹកនាំសភារបស់គណបក្សប្រជាធិបតេយ្យ ជាថ្មីទៀត ក្រោយពេលគណបក្សសាធារណរដ្ឋ បានដណ្តើមការគ្រប់គ្រងសភាឡើងវិញ។
អ្នកនយោបាយដ៏លេចធ្លោរបស់សហរដ្ឋអាមេរិក វ័យ៨២ឆ្នាំ រូបនេះ បានក្លាយជាប្រធានសភាតំណាងរាស្ត្ររបស់សហរដ្ឋអាមេរិក នៅក្នុងនាមជាស្ត្រីដំបូងគេបំផុត បានកាន់កាប់តំណែងជាមេដឹកនាំសភាតំណាងរាស្ត្ររបស់គណបក្សប្រជាធិតេយ្យ អស់រយៈពេលជាង២០ឆ្នាំកន្លងមកហើយ។ លោកស្រី ផេឡូស៊ី បានះអាង ថា លោកស្រីនឹងបន្តធ្វើជាសមាជិកសភាតំណាងរាស្ត្រម្នាក់ នៅក្នុងរដ្ឋកាលីហ្វ័រញ៉ា។ ប៉ុន្ដែលោកស្រីនឹងផ្ទេរតំណែង ជាមេដឹកនាំនេះ ទៅឱ្យអ្នកជំនាន់ក្រោយ នៅក្នុងជួរគណបក្សប្រជាធិបតេយ្យរបស់លោកស្រី។
លោកស្រី ប្រធានសភាដ៏មានឥទ្ធិពលរូបនេះ បានទៅបំពេញទស្សនកិច្ច នៅតៃវ៉ាន់ ចន្លោះពីថ្ងៃទី២-៣ ខែសីហា ឆ្នាំ២០២២។ ដំណើរទស្សនកិច្ចរបស់លោកស្រី ទៅកាន់ទីក្រុងតៃប៉ិ បានធ្វើឲ្យក្រុងប៉េកាំង ខឹងច្រឡោតតោតតូង បញ្ជូនកងទ័ព នាវាចម្បាំង និង យន្ដហោះយោធារាប់សិបគ្រឿង ទៅធ្វើសមយុទ្ធ បាញ់គ្រាប់ឡោមព័ទ្ធដែនកោះ គ្រប់គ្រងដោយខ្លួនឯង តាមបែបប្រជាធិបតេយ្យ រហូតធ្វើឲ្យច្រកសមុទ្រតៃវ៉ាន់ ឡើងកម្ដៅខ្លាំង។
ដោយឡែក ការប្រកាសលាលែងពីតំណែងរបស់លោកស្រី ផេឡូស៊ី បានកើតឡើង ក្រោយពេលគណបក្សប្រជាធិបតេយ្យរបស់លោកស្រី បានចាញ់ឆ្នោតទាំងប្រកិតប្រកើយជាមួយនឹងគណបក្សសាធារណរដ្ឋ។
ទីភ្នាក់ងារសារព័ត៌មាន AP បានប្រកាស ថា លោក មៃ ហ្កាសៀ (Mike Garcia) មកពីគណបក្សសាធារណរដ្ឋ កាលពីថ្ងៃពុធ បានទទួលជ័យជម្នះ នៅក្នុងការប្រកួតប្រជែង នៅរដ្ឋកាលីហ្វ័រញ៉ា។ ជាមួយនឹងលទ្ធផលនេះ បានធ្វើឱ្យអាសនៈរបស់គណបក្សសាធារណរដ្ឋ កើនដល់ ២១៨អាសនៈ ដែលជាសំឡេង ភាគច្រើន សម្រាប់គ្រប់គ្រងសភាតំណាងរាស្ត្រអាមេរិក ខណៈគណបក្សប្រជាធិបតេយ្យរបស់ប្រធានាធិបតី លោក ចូ បៃដិន ទទួលបាន២១០អាសនៈ។
លោក ខេវីន ម៉ាកខាធី (Kevin McCarthy) នឹងឡើងកាន់តំណែងជាប្រធានសភាតំណាងរាស្ត្រអាមេរិក ខណៈសភាថ្មីទាំង២ នឹងបើកសម័យប្រជុំ នៅដើមឆ្នាំក្រោយ ក្រោយពេលគណបក្សសាធារណរដ្ឋ បានតែងតាំងគាត់ ឱ្យកាន់មុខតំណែងកំពូលមួយនេះ។ ចំណែកគណបក្សប្រជាធិបតេយ្យ នៅតែរក្សាការគ្រប់គ្រងព្រឹទ្ធសភាអាមេរិកដដែល៕
