ទីក្រុងតៃប៉ិ៖ ក្រោយពេលកងទ័ពសហរដ្ឋអាមេរិក បានបាញ់ទម្លាក់បាឡុងរបស់ចិន សង្ស័យជាយានអវកាសចារកម្ម នៅលើដែនអាកាសរបស់ខ្លួន និង វត្ថុនៅលើដែនអាកាសរបស់កាណាដា នោះមក តៃវ៉ាន់ ក៏បានបង្ហាញ អំពីបាឡុងយោធារបស់ចិន តែងតែហោះហើរជាញឹកញាប់ នៅលើដែនអាកាសរបស់ខ្លួន។
សារព័ត៌មាន Financial Times បានចេញផ្សាយ កាលពីព្រឹក ថ្ងៃចន្ទ ទី១៣ ខែកុម្ភៈ ថា តៃវ៉ាន់តែងតែសង្កេតឃើញបាឡុងរបស់យោធាចិនរាប់សិបគ្រឿង បានហោះហើរ នៅលើដែនអាការបស់ខ្លួន នៅក្នុងរយៈពេលប៉ុន្មានឆ្នាំ កន្លងទៅថ្មីៗនេះ ដោយច្រើនលើសពីការដឹងកាលពីពេលមុនៗ។ បញ្ហានេះ ធ្វើឲ្យក្រុងតៃប៉ិ មានការព្រួយបារម្ភ ថា ក្រុងប៉េកាំង អាចកំពុងតែរៀបចំផែនការ វាយប្រហារមកលើដែនកោះរបស់ខ្លួន។
មន្ដ្រីជាន់ខ្ពស់តៃវ៉ាន់មួយរូប បានអះអាង ថា «បាឡុងរបស់ចិន តែងតែបណ្ដែតខ្លួន នៅលើដែនអាកាស កាលពីប៉ុន្មានសប្ដាហ៍កន្លងទៅនេះ។ អ្នកផ្សេងទៀត បានបំភ្លឺ អំពីបញ្ហានេះ ដោយបានអះអាង ថា ការបង្កហេតុបែបនេះ កំពុងតែកើតឡើងជាមធ្យម នៅក្នុងរយៈពេលមួយខែនេះ។
ក្រសួងការពារជាតិតៃវ៉ាន់ កាលពីពេលកន្លងទៅ បានបញ្ជាក់ អំពីឧបទ្ទវហេតុមួយ នៅក្នុងអំឡុងខែកុម្ភៈ ឆ្នាំ២០២២ ដោយសារមានបាឡុងរបស់ចិនជាច្រើនគ្រឿង នៅក្នុងចំណោមបាឡុងចំនួនបួនក្រុម បានហោះឡើង នៅភាគខាងជើង កោះតៃវ៉ាន់។ ចំណែកបណ្ដាប្រទេសផ្សេងៗទៀត នៅក្នុងតំបន់ រួមមាន ជប៉ុន និង ហ្វីលីពីន បានអង្កេតឃើញបាឡុង ហោះចូលទៅក្នុងដែនអាកាសរបស់ខ្លួន ប៉ុន្ដែរដ្ឋាភិបាលទាំងនេះ បានផ្ដល់ព័ត៌មានតិចតួចណាស់ អំពីបញ្ហានេះ។
ការហោះហើរបាឡុងជាញឹកញាប់ ទៅលើដែនអាកាសរបស់តៃវ៉ាន់ បានផ្ដល់នូវការយល់ដឹងថ្មីយ៉ាងទូលំទូលាយ អំពីកម្មវិធីបាឡុងយោធារបស់ចិន។ សកម្មភាពបែបនេះ បានទាក់ទាញនូវការចាប់អារម្មណ៍ នៅទូទាំងពិភពលោក ក្រោយពេលកងទ័ពសហរដ្ឋអាមេរិក បានប្រើប្រាស់យន្ដហោះចម្បាំងបំបាំងកាយដ៏ទំនើប ប្រភេទ F-22 បាញ់ទម្លាក់បាឡុងរបស់ចិន ដែលសង្ស័យជាបាឡុងចារកម្ម កាលពីដើមខែកុម្ភៈនេះ នៅឆ្នេរសមុទ្រ រដ្ឋ សៅការ៉ូលីណា (South Carolina)។
ការបាញ់ទម្លាក់បាឡុងរបស់ក្រុងប៉េកាំង នេះ បានកើតឡើង ស្របពេលកងទ័ពរំដោះប្រជាជនចិន បាន និង កំពុងតែពង្រឹងនូវសមត្ថភាព អាចវាយលុកទៅលើកោះតៃវ៉ាន់។ ក្រុងប៉េកាំង តែងតែអះអាង ថា កោះតៃវ៉ាន់ ជាផ្នែកមួយ នៃទឹកដីរបស់ចិន។ ប៉ុន្ដែរហូតមកដល់ពេលនេះ ក្រុងប៉េកាំង តែងតែគំរាមកំហែង អំពីការប្រើប្រាស់កម្លាំងយោធា ប្រសិនបើក្រុងតៃប៉ិ ហ៊ានប្រកាស អំពីឯករាជភាព កាត់ផ្ដាច់ចេញពីប្រទេសចិន។
ក្រុមអ្នកវិភាគជាច្រើន មានឯកទេស នៅក្នុងទំនាក់ទំនងឆ្លងច្រកសមុទ្រតៃវ៉ាន់ ជឿ ថា មេដឹកនាំចិន លោក ស៊ី ជិនពីង (Xi Jinping) មិនបានសម្រេចចិត្ត ធ្វើសង្គ្រាមនោះទេ។ ប៉ុន្តែការកសាងអាវុធមីស៊ីល យានអវអាកាស និង កងទ័ពជើងទឹករំដោះប្រជាជនចិន ក៏ដូចជា សមយុទ្ធផ្តោតទៅលើសេណារីយ៉ូលុកលុយ, សមយុទ្ធដែនអាកាស និង សមយុទ្ធយោធាកងទ័ពជើងទឹក កាន់តែធំ និង ស្មុគស្មាញ កាន់តែខិតទៅជិតកោះតៃវ៉ាន់។ សកម្មភាពយោធារបស់ចិន កំពុងតែជំរុញឲ្យក្រុមមន្ត្រីយោធាអាមេរិកមួយចំនួន គិត ថា លោក ស៊ី ជិនពីង ប្រធានាធិបតីចិន មានគោលដៅត្រៀមខ្លួន សម្រាប់ការប្រយុទ្ធ នៅក្នុងរយៈពេលប៉ុន្មានឆ្នាំខាងមុខនេះ។
ការបង្កើននូវភាពតានតឹង រវាងចិន និង អាមេរិក ក៏បានជំរុញឱ្យមានការព្រួយបារម្ភ ថា ក្រុងប៉េកាំង អាចងាកទៅរកការប្រើប្រាស់កម្លាំងផងដែរ។
ក្រុមមន្ដ្រីរដ្ឋាភិបាលតៃវ៉ាន់ បានបញ្ជាក់ ថា បាឡុងរបស់ចិន បានសង្កេតឃើញ នៅក្នុងដែនអាកាសរបស់តៃវ៉ាន់ ហើយតាមធម្មតា វាហោះហើរ នៅក្នុងកម្ពស់ ប្រហែល៦គីឡូម៉ែត្រ ទាបជាងបាឡុងហោះឆ្លងកាត់សហរដ្ឋអាមេរិក ហើយត្រូវបានផលិតចេញពីវត្ថុធាតុផ្សេង។ កងទ័ពសហរដ្ឋអាមេរិក បានបាញ់ទម្លាក់វត្ថុចំនួន៣បន្ថែមទៀត នៅលើដែនអាកាសអាមេរិកខាងជើង កាលពីចុងសប្តាហ៍កន្លងទៅ។
បើតាមក្រុមមន្ដ្រីជាច្រើន ធ្វើការពាក់ព័ន្ធនឹងបញ្ហាយោធា និង ចារកម្ម នៅក្នុងប្រទេសអាស៊ីចំនួន៣ បានឲ្យដឹង ថា បាឡុងជាច្រើន តែងតែសង្កេត ហោះនៅលើដែនកោះតៃវ៉ាន់។ បាឡុងទាំងនោះ ត្រូវបានបង្កើតឡើង ដោយនាយកដ្ឋានអភិវឌ្ឍន៍គ្រឿងបរិក្ខារ ដែលជាផ្នែកទទួលបន្ទុកប្រព័ន្ធគ្រឿងសព្វាវុធ ក្រោមការដឹកនាំរបស់គណៈកម្មាធិការយោធាកណ្តាលរបស់ចិន ជាស្ថាប័នយោធាកំពូល ដឹកនាំដោយប្រធានាធិបតីចិន លោក ស៊ី ជិនពីង។
ដោយឡែក លោក ម៉ៃ ធូណឺរ (Mike Turner) ប្រធានគណៈកម្មាធិការស៊ើបអង្កេតរបស់សហភាសហរដ្ឋអាមេរិក បានបញ្ជាក់ កាលពីថ្ងៃអាទិត្យ ថា គាត់ពេញចិត្ត អំពីរបៀបដែលកងទ័ពរបស់សហរដ្ឋអាមេរិក បាញ់ទម្លាក់វត្ថុ នៅលើដែនអាកាសអាមេរិកខាងជើង កាលពីប៉ុន្មានថ្ងៃមុនេះ៕
