អង្គការ​ចំនួន​១៤០ ជំរុញ​ឲ្យ IMF បញ្ចេញ​ទុនបម្រុង​សង្គ្រោះបន្ទាន់​៦៥០​ពាន់​លាន​ដុល្លារ ជួយ​ប្រទេស​ជួប​វិបត្ដិ​

ព័ត៌មានអន្តរជាតិ
0
171


​រដ្ឋធានី​វ៉ាស៊ីនតោន​៖ ឥទ្ធិពល​សង្គ្រាម​របស់​រុស្ស៊ី នៅក្នុង​ប្រទេស​អ៊ុយ​ក្រែ​ន កំពុងតែ​បង្ក​ផលប៉ះពាល់​យ៉ាងខ្លាំង​ដល់​ពិភពលោក រហូត​នាំ​ឲ្យ​មាន​វិបត្ដិ​សុខភាព ស្បៀងអាហារ ថាមពល និង អតិផរណា ហើយ​នៅពេលនេះ មានការ​អំពាវនាវ ដល់​មូលនិធិ​រូបិយវត្ថុ​អន្ដរជាតិ (IMF) បញ្ចេញ​កញ្ចប់​ទុនបម្រុង​សង្គ្រោះបន្ទាន់ ទៅ​ជួយ​ដល់​បណ្ដា​ប្រទេស​ជា​សមាជិក​។​

​សារព័ត៌មាន Anews បានចេញ​ផ្សាយ កាលពី​ថ្ងៃ​សុក្រ ទី​៧ ខែតុលា ថា ក្រុម​អង្គការ​សង្គម​ស៊ីវិល ចំនួន​១៤០ បាន​សរសេរ នៅក្នុង​លិខិត​មួយច្បាប់ ផ្ញើជូន​ក្រុមប្រឹក្សាភិបាល​របស់​មូល​និ​ធិ​រូបិយវត្ថុ​អន្ដរជាតិ (IMF) កាលពី​ថ្ងៃ​ព្រហស្បតិ៍ ដោយបាន​រៀបរាប់ ថា មូលនិធិ​រូបិយវត្ថុ​អន្តរជាតិ គួរតែ​បញ្ចេញ​ទុនបម្រុង​គ្រាអាសន្ន​ថ្មី មាន​ទឹកប្រាក់​ទំហំ ៦៥០​ពាន់​លាន​ដុល្លារ​សហរដ្ឋអាមេរិក សម្រាប់​ជួយ​ដល់​បណ្ដា​ប្រទេស​សមាជិក​របស់ខ្លួន ដើម្បី​ដោះស្រាយ​វិបត្តិ​សុខភាព ស្បៀងអាហារ ថាមពល និង អតិផរណា​។​

​ក្រុមមន្ដ្រី IMF ធ្លាប់​បញ្ជាក់ កាលពី​ខែកក្កដា ថា ការបញ្ចេញ​ទុនបម្រុង​សិទ្ធិ​ពិសេស​ថ្មី (SDR) ជា​ជម្រើស​តែមួយគត់ សម្រាប់​ផ្ដល់ជំនួយ ដល់​ប្រទេស​ដែល​កំពុង​តស៊ូ​ជាមួយនឹង​ការរីក​រាលដាល ពី​សង្គ្រាម​របស់​រុស្ស៊ី នៅ​អ៊ុយ​ក្រែ​ន ប៉ុន្តែ​មិនមាន​ការពិភាក្សា​យ៉ាងសកម្ម លើ​បញ្ហា​នេះ​ទេ​។​

​ធនាគារពិភពលោក កាលពី​ខែ​មុន បាន​ព្រមាន អំពី​ហានិភ័យ​របស់​ពិភពលោក កំពុងតែ​កើនឡើង ដោ​សារ​ឥទ្ធិពល​សង្គ្រាម​។ ធនាគារពិភពលោក កាលពី​ថ្ងៃ​ពុធ បានបញ្ជាក់ ថា មនុស្ស​ជិត​៦០០​លាន​នាក់ នឹង​នៅតែ​រស់នៅក្នុង​ភាពក្រីក្រ​បំផុត ជាមួយនឹង​ប្រាក់ចំណូល​ប្រចាំថ្ងៃ ត្រឹមតែ​២,១៥​ដុល្លារ​សហរដ្ឋអាមេរិក រហូតដល់​ឆ្នាំ​២០៣០​។​

​ការ​អង្វរករ​របស់​ក្រុម​អង្គការ​សង្គម​ស៊ី​ល ទាំង​១៤០ សម្រាប់​ការបែងចែក​ទុនបម្រុង​សិទ្ធិ​ពិសេស (SDR) រយៈពេល​ជាង​១​ឆ្នាំនេះ បានកើត​ឡើង ដោយសារ​ក្រុមមន្ដ្រី​ហិរញ្ញវត្ថុ​របស់​ពិភពលោក រៀបចំ​ជួបគ្នា នៅ​រដ្ឋធានី​វ៉ាស៊ីនតោន សហរដ្ឋអាមេរិក សម្រាប់​កិច្ចប្រជុំ​ប្រចាំឆ្នាំ​របស់ IMF និង ធនាគារពិភពលោក​។​

​ការអំពាវនាវ​ស្រដៀង​គ្នា​នេះ បាន​លេចចេញ ពី​ក្រុមតំណាងរាស្ដ្រ និង ក្រុម​ធុរកិច្ច ក្នុង​រយៈពេល​ប៉ុន្មាន​ខែ​កន្លងទៅ​ថ្មីៗ​នេះ បើទោះជា​អ្នក​រិះគន់ បាន​អះអាង ថា ការបញ្ចេញ​ទុនបម្រុង​ថ្មី​នេះ ក៏​នឹង​ផ្តល់​ទ្រព្យសម្បត្តិ​ថ្មី ទៅដល់​ប្រទេស​រុស្ស៊ី ដែល​នៅតែ​ជា​សមាជិក IMF ។​

​ក្រុម​អ្នកគាំទ្រ បាន​អះអាង ថា នៅ​ក្នុងការ​អនុវត្ដ​ជាក់ស្តែង ប្រទេស​រុស្ស៊ី នឹង​ពិបាក​ស្វែងរក​ប្រទេស​ណាមួយ សម្រាប់​ប្តូរ SDR របស់ខ្លួន ទៅជា​រូបិយប័ណ្ណ​សុទ្ធ​។​

​លោក ម៉ាក ផ្លែ​ន (Mark Plant) អតីតមន្ត្រី IMF មកពី​មជ្ឈមណ្ឌល​អភិវឌ្ឍ​ន៍ស​កល​លោក បានបញ្ជាក់ ថា វា​នឹង​ពិបាក នៅក្នុង​ការ​ឈ្នះ​តម្រូវការ​អនុម័ត ៨៥​ភាគរយ សម្រាប់​ការបែងចែក​មួយ​ផ្សេងទៀត ដើម្បី​បំពេញ​នូវ​ការខកចិត្ត​យ៉ាងខ្លាំង ដែល​ក្រុម​ប្រទេស​មាន​សេដ្ឋកិច្ច​រីកចម្រើន G-20 មិនបាន​បំពេញ​តាម​ការប្តេជ្ញាចិត្ត​របស់​ពួកគេ នៅក្នុង​ការកែប្រែ​ឡើងវិញ​នូវ​ទុនបម្រុង​សិទ្ធិ​ពិសេស (SDR) របស់​ពួកគេ មាន​ទំហំ​ទឹកប្រាក់ ១០០​ពាន់​លាន​ដុល្លារ​សហរដ្ឋអាមេរិក​។​

IMF កាលពី​ខែសីហា ឆ្នាំ​២០២១ បាន​បង្កើត និង ចេញ​ទ្រព្យសកម្ម SDR ចំនួន ៦៥០​ពាន់​លាន​ដុល្លារ​សហរដ្ឋអាមេរិក ដល់​ប្រទេស​ជា​សមាជិក ដើម្បី​ជួយ​ឱ្យ​ប្រទេស​ទាំងនោះ ងើបឡើង​ផុត ពី​ជំងឺ​រាតត្បាត បង្កឡើង ដោយ​កូ​វីដ​-១៩​។ ប៉ុន្តែ​ប្រទេស​ក្រីក្រ កំពុងតែ​ទាមទារ​ថវិកា​បន្ថែមទៀត ដោយសារតែ​អតិផរណា​កើនឡើង​ខ្ពស់ និង វិបត្តិ​បំណុល​កំពុងតែ​កើនឡើង​។​

​លិខិត​របស់​ក្រុម​អង្គការ ទាំង​១៤០​នោះ បានបញ្ជាក់ ថា ប្រទេស​ទាំងនោះ ត្រូវការ​ថវិកា​បន្ថែម​ទៀត ចាប់តាំងពី​ពួកគេ​កំពុងតែ​តស៊ូ​ជាមួយ​ជំងឺ​រាតត្បាត កូ​វីដ​-១៩​ដែល​កំពុង​បន្ត​កើនឡើង​, ការឡើង​ថ្លៃ​តម្លៃ​ម្ហូបអាហារ និង ថាមពល ដោយសារ​សង្គ្រាម នៅក្នុង​អ៊ុយ​ក្រែ​ន​, គ្រោះមហន្តរាយ​អាកាសធាតុ និង កម្រិត​បំណុល​កើនឡើង​ខ្ពស់​។ ប្រទេស​ចំនួន​៤២ បាន​ប្ដូរ SDR របស់​ពួកគេ ទៅជា​រូបិយប័ណ្ណ​សុទ្ធ មានតម្លៃ​១៦​ពាន់​លាន​ដុល្លារ​សហរដ្ឋអាមេរិក​។ ចំណែក​ប្រទេស ចំនួន​៦៩​ផ្សេងទៀត បាន​ប្រើប្រាស់ SDR មានតម្លៃ​៨០​ពាន់​លាន​ដុល្លារ​សហរដ្ឋ​អាម​រិ​ក ជា​ថវិកា​របស់​ពួកគេ ឬ សម្រាប់​គោលបំណង​សារពើពន្ធ​ផ្សេងៗ​ទៀត​៕​