នៅថ្ងៃទី២៤ ខែកញ្ញា ឆ្នាំ២០១៩ ប្រធានសភា លោកស្រី Nancy Pelosi បានផ្តើមឲ្យមានការស៊ើបអង្កេតករណីចោទប្រកាន់មកលើលោក Donald Trumpថាបានបំពានអំណាចរបស់ខ្លួន ក្នុងនាមជាប្រធានាធិបតីកាន់អំណាចរបស់សហរដ្ឋអាមេរិក ពាក់ព័ន្ធនឹងការជជែកគ្នាតាមទូរស័ព្ទរបស់លោកកាលពីថ្ងៃទី២៥ ខែកក្កដា ជាមួយនឹងប្រធានាធិបតីអ៊ុយក្រែនលោកVolodymyr Zelensky ដើម្បីដាក់ដាក់សំពាធមកលើរដ្ឋាភិបាលអ៊ុយក្រែនឲ្យបើកការស៊ើបអង្កេតមកលើករណីរបស់គូប្រជែងបោះឆ្នោតឆ្នាំ២០២០ មកពីគណបក្សប្រជាធិបតេយ្យ គឺលោក Joe Baidenនិងកូនប្រុស Joe Hunterរបស់លោក បើពុំដូច្នោះទេ លោក Trumpនឹងផ្អឹបចោលជំនួយយោធានដល់អ៊ុយក្រែនចំនួន៤០០លានដុល្លារ ដែលជំនួយមួយនេះ ត្រូវបានច្រានចោលទៅហើយដោយសេតវិមាន។
លោក Joe Baiden បានរងការចោទប្រកាន់ថា ធ្លាប់បានគំរាមដល់រដ្ឋាភិបាលអ៊ុយក្រែនដូចគ្នា ឲ្យដកចេញតំណែងរដ្ឋអាជ្ញាកំពូលមួយរូប កាលពីអំឡុងឆ្នាំ២០១៦ ពេលដែលរូបលោកនៅជាអនុប្រធានាធិបតីក្រោមរដ្ឋបាលរបស់លោក Barack Obama រឿងពាក់ព័ន្ធនឹងក្តីក្តាំងកូនប្រុស Hunterរបស់លោកដែលជាប្រធានក្រុមហ៊ុនប្រេងដ៏ធំមួយនៅទីនោះ បើពុំដូច្នោះទេលោកនឹងផ្អឹបចោលជំនួយដូចគ្នាទៅដល់អ៊ុយក្រែន ប៉ុន្តែករណីមួយនេះ គេរកឃើញថា លោក Joe Baidenគ្មានទោសកំហុសនោះទេ។
នៅថ្ងៃទី៣១ ខែតុលា ឆ្នាំ២០១៩ សភាបានបោះឆ្នោត២៣២-១៩៦សំឡេង ដើម្បីបង្កើតនិតិវិធីនៃការចោទប្រកាន់មកលើលោក Trumpក៏ដូចជាបើកសវនាកាសាធារណៈ ។ សភា បានធ្វើការកោះហៅលោក Trumpនិងមន្ត្រីក្រោមឱវាទរបស់លោកឲ្យឡើងមុខសភា ដើម្បីសាកសួរជុំវិញករណីរបស់លោក តែលោក Trumpមិនបានចូលរួមនោះឡើយ ហើយមន្ត្រីរបស់លោកក៏មិនបានសហការណ៍នោះដែរ សូម្បីតែខ្សែអាត់សំឡេងនៃការជជែកគ្នារយៈពេលជាង១ម៉ោងរវាងលោក Trump និងប្រធានាធិបតីអ៊ុយក្រែន ក៏ត្រូវបានលប់ចោលចេញពីប្រព័ន្ធកុំព្យូទ័រក្នុងសេតវិមានដែរ។
ជាការឆ្លើយតបនឹងករណីចោទប្រកាន់មករូបលោកនេះ លោកត្រាំ Trumpបានអះអាងថា លោកគ្មានទោសកំហុសអ្វីទាំងអស់ ហើយវាគ្រាន់តែជា “ការប្រម៉ាញ់របស់មេធ្មប់”ប៉ុណ្ណោះ ហើយលោកថែមទាំងបានជះកំហឹងខ្លាំងៗមកលោកស្រី Nancy Pelosiដោយចោទប្រកាន់ថា វាគឺជាយុទ្ធនាការធ្វើឲ្យអាប់ឱនកេរ្តិ៍ឈ្មោះរបស់លោកដើម្បីចំណេញរឿងនយោបាយមុនការបោះឆ្នោតសម្រាប់អាណត្តិទី២របស់លោក នៅចុងឆ្នាំ២០២០ខាងមុខ ហើយលោកបានបញ្ជាក់ថា ទង្វើរបែបនេះ រឹតតែជំរុញឲ្យលោកឈ្នះឆ្នោតថែមមួយកម្រិតទៀតប៉ុណ្ណោះ។
នៅថ្ងៃទី១៨ ខែធ្នូ សភា បានបោះឆ្នោតម្តងទៀត២៣០-១៩៨លំឡេង ដើម្បីចោទប្រកាន់លោក Trumpលើ២ករណី ទី១ពាក់ព័ន្ធនឹងការបំពានអំណាច ហើយទី២ពាក់ព័ន្ធនឹងការរារាំងសភា។
ដោយផ្អែកលើច្បាប់រដ្ឋធម្មនុញ្ញសហរដ្ឋអាមេរិកដែលបានបង្កើតឡើងកាលពីឆ្នាំ១៧៨៧ នៅពេលដែលប្រធានាធិបតីត្រូវបានគេរកឃើញថាមានទោសក្បត់ជាតិ ពុករលួយស៊ីសំណូកសូកប៉ាន់ ឬបទឧក្រិដ្ឋផ្សេងទៀត នោះសភាមានសិទ្ធិក្នុងការចាប់ផ្តើមនិតិវិធីនៃការចោទប្រកាន់ពីបទបំពានអំណាច ដើម្បីទម្លាក់តំណែងប្រធានាធិបតី តែសភាគ្មានសិទ្ធិក្នុងការចោទប្រកាន់នោះទេ ពោលគឺមានតែព្រឹទ្ធសភាមួយគត់ ដែលអាចចោទប្រកាន់ប្រធានាធិបតីបំពានអំណាចបាន។ ក្នុងករណីដែលព្រឹទ្ធសភា ធ្វើការចោទប្រកាន់ទម្លាក់តំណែងប្រធានាធិបតីរួចហើយ នោះតំណែងប្រធានាធិបតីនឹងធ្លាក់ទៅលើអនុប្រធានាធិបតី សម្រាប់អាណត្តិដែលនៅសេសសល់។
ជាក់ស្តែងសម្រាប់ករណីរបស់លោកត្រាំ គឺដូចគ្នា សភាគ្រាន់តែជាអ្នកបង្គាប់បញ្ជាចាត់ចែងសំណុំរឿងបញ្ជូនទៅកាន់ព្រឹទ្ធសភាប៉ុណ្ណោះ ដើម្បីទម្លាក់តំណែងប្រធានាធិបតីរបស់លោកត្រាំ ដែលករណីនេះ ព្រឹទ្ធសភា ទំនងជាបើកសវនាការនៅខែមករាឆ្នាំ២០២០ខាងមុខ តែគេមិនរំពឹងថា នឹងអាចទម្លាក់តំណែងលោក Trumpបានឡើយ ដោយសារតែនៅក្នុងព្រឹទ្ធសភា គណបក្សសាធារណរដ្ឋគ្រប់គ្រងសំឡេងភាគច្រើន៥៣សំឡេងនៅក្នុងចំណោម១០០សំឡេង ខណៈដែលគណបក្សប្រជាធិបតេយ្យមានតែ៤៥សំឡេងប៉ុណ្ណោះ ក្នុងនោះ២សំឡេងឯករាជ្យ ដែលនេះមានន័យថា ចង់ទម្លាក់តំណែងលោក Trumpលុះត្រាតែមានរដ្ឋប្រហារបក្ស។
បើសិនជាលោក Trump ត្រូវបានព្រឹទ្ធសភាចោទប្រកាន់ពិតមែននោះ លោកនឹងក្លាយជាប្រធានាធិបតីលើកទី៣ហើយក្នុងប្រវត្តិសាស្ត្រសហរដ្ឋអាមេរិក ដែលត្រូវបានគេចោទប្រកាន់ បន្ទាប់ពីលោក Andrew Johnsonកាលពីឆ្នាំ១៨៦៨ និងលោក Bill Clintonកាលពីឆ្នាំ១៩៩៨ ប៉ុន្តែប្រធានាធិបតី ២នាក់នេះ មិនត្រូវបានទម្លាក់ចេញពីតំណែងប្រធានាធិបតីនោះឡើយ ដោយសារតែព្រឹទ្ធសភា បានបោះឆ្នោតប្រឆាំងករណីចោទប្រកាន់៕