រដ្ឋធានីអាបូចា (Abuja)៖ បណ្ដាមេដឹកនាំសហគមន៍សេដ្ឋកិច្ចរដ្ឋអាហ្វ្រិកខាងលិច ហៅកាត់ ECOWAS (អេកូវ៉ាស) កំពុងតែបង្កើននូវការគំរាមកំហែងកាន់តែខ្លាំងឡើង ប្រឆាំងនឹងមេដឹកនាំរដ្ឋប្រហារយោធា នៅក្នុប្រទេសនីហ្សេ ដោយរាប់បញ្ចូលទាំងការប្រើប្រាស់កម្លាំងយោធា សម្រាប់ស្ដារលទ្ធិប្រជាធិបតេយ្យ នៅក្នុងប្រទេសនេះឡើងវិញ។
សារព័ត៌មាន Aljazeera បានចេញផ្សាយ កាលពីថ្ងៃព្រហស្បតិ៍ ទី១០ ខែសីហា ថា បណ្ដាប្រមុខរដ្ឋ នៃសហគមន៍សេដ្ឋកិច្ចរដ្ឋអាហ្វ្រិកខាងលិច បានបញ្ជាក់ ថា ជម្រើសជាចំហ នឹងត្រូវប្រើប្រាស់ ដោយរាប់បញ្ចូលទាំងកម្លាំងយោធា នៅតែមាន ដើម្បីស្តារសណ្តាប់ធ្នាប់ឡើងវិញ ស្របតាមច្បាប់រដ្ឋធម្មនុញ្ញរបស់ប្រទេសនីហ្សេ ក្រោយអំពើរដ្ឋប្រហារយោធា កាលពីថ្ងៃទី២៦ ខែកក្កដា ឆ្នាំ២០២៣។ បណ្ដាមេដឹកនាំរបស់ប្លុកអាហ្វ្រិកខាងលិចមួយនេះ ក៏បានបញ្ជាឱ្យធ្វើឱ្យកម្លាំងទាហានរបស់ខ្លួន ត្រៀមខ្លួនចូលអន្ដរាមន៍។
ប្លុកប្រទេសអាហ្វ្រិកខាងលិចទាំងនេះ កំពុងតែដាក់កម្លាំងកងទ័ពឲ្យប្រចាំការ ដើម្បីធ្វើអន្ដរាគមន៍ ដែលនឹងអាចកើតឡើង នៅក្នុងប្រទេសនីហ្សេ ព្រោះពួកគេចង់ស្ដារលទ្ធិប្រជាធិបតេយ្យឡើងវិញ។ ការធ្វើអត្ថាធិប្បាយរបស់បណ្ដាមេដឹកនាំទាំងនេះ បានកើតឡើង ស្របពេលសហគមន៍សេដ្ឋកិច្ចរដ្ឋអាហ្វ្រិកខាងលិច (Economic Community of West African States) ហៅកាត់ ECOWAS) ដែលមានសមាជិកចំនួន១៥ប្រទេស បានជួបប្រជុំ នៅរដ្ឋធានីអាប៊ូចា (Abuja) ប្រទេសនីហ្សេរីយ៉ា កាលពីថ្ងៃព្រហស្បតិ៍ (ទី១០ ខែសីហា)។ កិច្ចប្រជុំកំពូលបន្ទាន់នេះ បានពិភាក្សាគ្នា អំពីការឆ្លើយតប ប្រឆាំងនឹងអំពើរដ្ឋប្រហារយោធា កាលពីទី២៦ ខែកក្កដា នៅក្នុងប្រទេសនីហ្សេ ក្រោយពេលមេដឹកនាំរដ្ឋប្រហារ បានប្រឆាំងនឹងការគំរាមប្រើប្រាស់កម្លាំងទ័ពកាលពីមុនរបស់ប្លុកអាហ្វ្រិកខាងលិចមួយនេះ សម្រាប់ការស្តារលទ្ធិប្រជាធិបតេយ្យឡើងវិញ។
នៅក្នុងសុន្ទរកថាបិទកិច្ចប្រជុំបន្ទាន់នោះ ប្លុកអាហ្វ្រិកខាងលិចមួយនេះ បានសន្យាដាក់ទណ្ឌកម្ម ប្រឆាំងនឹងពួកយោធា នៅក្នុងប្រទេសនីហ្សេ ហើយដាក់បម្រាមដល់ការធ្វើដំណើរ ប្រឆាំងនឹងអ្នករារាំង ដល់ការវិលត្រឡប់ទៅកាន់អំណាចរបស់ប្រធានាធិបតីជាប់ឆ្នោតតាមលទ្ធិប្រជាធិបតេយ្យ លោក ម៉ូហាមេដ បាហ្ស៊ូម (Mohamed Bazoum)។
ស្របគ្នានេះ ប្រធានប្លុកអេកូវ៉ាស លោក ប៉ូឡា ទីនូប៊ូ (Bola Tinubu) ប្រធានាធិបតីនីហ្សេរីយ៉ា បានបញ្ជាក់ នៅចុងបញ្ចប់កិច្ចប្រជុំកំពូលរបស់ ECOWAS ថា «មិនមានជម្រើសណាមួយ ត្រូវដកចេញពីលើតុនោះឡើយ ដោយរាប់ទាំងការប្រើប្រាស់កម្លាំងយោធា ហើយវាជាជម្រើសចុងក្រោយបង្អស់ផងដែរ។ យើងនៅតែប្រកាន់ខ្ជាប់ ចំពោះការប្តេជ្ញាចិត្តរបស់យើង នៅក្នុងការគាំទ្រប្រទេសនីហ្សេ ធ្វើដំណើរឆ្ពោះទៅរកស្ថិរភាព តាមបែបប្រជាធិបតេយ្យ ប្រកបដោយសន្តិភាព។ ខ្ញុំសង្ឃឹម ថា តាមរយៈកិច្ចខិតខំប្រឹងប្រែងរួមរបស់យើង យើងនឹងអាចនាំមកនូវដំណោះស្រាយ ដោយសន្តិវិធី ព្រោះវាជាផែនទីបង្ហាញផ្លូវ ឆ្ពោះទៅរកការស្តារឡើងវិញ សម្រាប់ស្ថិរភាព និង លទ្ធិប្រជាធិបតេយ្យ នៅក្នុងប្រទេសនីហ្សេ។ អ្វីៗទាំងអស់ នៅមិនទាន់បាត់បង់ ឬ ខូចខាតនៅឡើយ»។
ក្រោយការផ្តួលរំលំរដ្ឋាភិបាលជាប់ឆ្នោតតាមបែបប្រជាធិបតេយ្យ នៅក្នុងប្រទេសនីហ្សេ កាលពីថ្ងៃទី២៦ ខែកក្កដា នោះមក ក្រុមមេដឹកនាំធ្វើរដ្ឋប្រហារ បានបដិសេធប្រគល់អំណាច និង ដោះលែងលោកប្រធានាធិបតី បាហ្ស៊ូម (Bazoum) ដែលត្រូវបានពួកគេ ចាប់ឃុំខ្លួន ដោយមិនអើពើនឹងឱសានវាទរបស់បណ្ដាមេដឹកនាំ ECOWAS ដោយបានកំណត់ នៅត្រឹមថ្ងៃទី៦ ខែសីហា ដើម្បីប្រគល់អំណាចជូនទៅលើលោកប្រធានាធិបតី បាហ្ស៊ូម វិញ។
កិច្ចប្រជុំបន្ទាន់របស់ប្លុកអាហ្វ្រិកខាងលិច នៅរដ្ឋធានីអាប៊ូចា ប្រទេសនីហ្សេរីយ៉ា បានកើតឡើង ត្រឹមតែប៉ុន្មានម៉ោងប៉ុណ្ណោះ ក្រោយពេលមេដឹកនាំរដ្ឋប្រហាររបស់ប្រទេសនីហ្សេ បានតែងតាំងរដ្ឋាភិបាលបណ្តោះអាសន្នថ្មីមួយ។ ជាមួយគ្នានេះ លោក ម៉ាហាម៉ាណេ រូហ្វៃ ឡាវអ៊ួលី (Mahamane Roufai Laouali) ក៏ត្រូវបានពួកយោធាតែងតាំង ជាអគ្គលេខាធិការ នៃរដ្ឋាភិបាលថ្មីរបស់ពួកគេ» ដោយថែមទាំងបានដាក់ឈ្មោះរដ្ឋមន្ត្រី ចំនួន២១នាក់ ហើយក៏មិនបានបញ្ជាក់បន្ថែម អំពីផែនការរបស់រដ្ឋាភិបាលរបស់ពួកគេ នោះឡើយ៕