លោក Nguyen Phu Trong ដែលជាប្រធានាធិបតី និងជាអគ្គលេខាធិការបក្សកុម្មុយនិស្តវៀតណាម បាននិយាយថា ការដាក់ទោសធ្ងន់ៗលើមន្ត្រីជាន់ខ្ពស់ទាំងឡាយណា ដែលប្រព្រឹត្តអំពើពុករលួយ គឺជារឿងដែលត្រូវធ្វើចំបូងគេបង្អស់ ព្រោះថាអ្នកដែលប្រព្រឹត្តិអំពើពុករលួយភាគច្រើនគឺជាមន្ត្រីដែល មានអំណាចបុណ្យស័ក្តិ ។
កាលពីពេលកន្លងទៅនេះថ្មីៗនេះ អតីតរដ្ឋមន្ត្រីក្រសួងព័ត៌មានវៀតណាម ចន្លោះឆ្នាំ២០១១ ដល់២០១៦ លោក ង្វៀន បាក សង (Nguyễn Bắc Son) ក៏ជាសមាជិកសំខាន់និងដ៏មានឥទ្ធិពលមួយរូប ក្នុងគណៈកម្មការកណ្តាលរបស់មជ្ឈិមបក្សកុម្មុយនិស្តវៀតណាម។ លោកអតីតរដ្ឋមន្ត្រីក្រសួងព័ត៌មាន ត្រូវសមត្ថកិច្ចចាប់ឃុំខ្លួនកាលពីខែកុម្ភៈឆ្នាំទៅមិញ ហើយត្រូវអយ្យការរដ្ឋអាជ្ញាវៀតណាម ស្នើសុំតុលាការផ្តន្ទាទោសប្រហារជីវិតតែម្តង។ ក៏ប៉ុន្តែ ក្រោយការចរចាគ្នានិងការសម្រុះសម្រួលផ្តល់សំណងជូនរដ្ឋវិញ ក្នុងរង្វង់ទឹកប្រាក់រាប់លានដុល្លាររួចមក នៅទីបំផុត សាលាជម្រះក្តីក្រុងហាណូយ ក៏បានសម្រេចផ្តន្ទាទោសឧក្រិដ្ឋ ត្រឹមជាប់ពន្ធនាគារអស់មួយជីវិត នៅថ្ងៃទី២៨ធ្នូនេះ ជុំវិញបទល្មើសពុករលួយ។
គួរបញ្ជាក់ដែរថា ប្រទេសវៀតណាមបានអនុម័តបទបញ្ញត្តិថ្មីមួយដែលចែងលម្អិតអំពីការហាមឃាត់ប្រឆាំងនឹងការប្រព្រឹត្តអំពើពុករលួយ ចាប់តាំងពីអាកប្បកិរិយារបស់មន្ត្រីរដ្ឋាភិបាល និងការសូកប៉ាន់តាមការផ្ដល់ជូនកន្ត្រកផ្លែឈើជាដើម។
អនុក្រឹត្យលេខ59/2019/ND-CP តម្រូវឲ្យមន្ត្រីរដ្ឋការទាំងអស់រាយការណ៍អំពីអំណោយគ្រប់បែបយ៉ាងរួមទាំងអំណោយតូចតាច និងអំពីទំនាក់ទំនងរបស់ពួកគេជាមួយអ្នកផ្ដល់អំណោយ ក៏ដូចជាតម្រូវឲ្យមន្ត្រីរដ្ឋការសាធារណៈបដិសេធទទួល «អំណោយមិនសមរម្យ» ដែលជាពាក្យមិនទាន់ត្រូវបានគេឲ្យនិយមន័យនៅឡើយទេ តែវាសំដៅទៅលើការសូកប៉ាន់៕