សង្ឃយន្តចេះសម្តែងធម៌ទេសនា បានយ៉ាងក្បោះក្បាយនៅឯអារាមមួយកន្លែងក្នុងប្រទេសជប៉ុន ក្នុងគោលបំណងដើម្បីបង្កើនចំណាប់អារម្មណ៍សាធារណជន លើការបង្រៀនធម៌ក្នុងព្រះពុទ្ធសាសនា។
ស្របពេលដែលវត្តអារាមនៅក្នុងប្រទេសជប៉ុន សង្ឃឹមថា សង្ឃយន្តនឹងអាចផ្លាស់ប្តូរមុខមាត់ព្រះពុទ្ធសាសនាបាននោះ ក្រុមអ្នករិះគន់មួយចំនួនបែរជាចាត់ទុកសង្ឃយន្តនេះ ប្រៀបបាននឹងសត្វចម្លែក Frankensteinទៅវិញ។
សង្ឃយន្ត Kannon ដែលដើរដោយប្រព័ន្ធ Android បានផ្អែកលើមេត្ដាករុណាធម៌ ផ្ដល់ឱវាទព្រះធម៌ នៅអារាមកូដៃជិអាយុកាល៤០០ឆ្នាំ ស្ថិតក្នុងទីក្រុងក្យូតូ ។
ព្រះសង្ឃយន្តប៉ុនមនុស្សនេះ ចាប់ផ្ដើមផ្ដល់សេវាកម្មកាលពីដើមឆ្នាំ និងអាចធ្វើចលនាម្រាមដៃជើង ដៃ និងព្រះកេស។ ប៉ុន្ដែមានតែបរិវេណដៃ មុខ និងស្មាប៉ុណ្ណោះ ដែលស្រោបស៊ីលីកូនជំនួសស្បែកមនុស្ស។
ព្រះសង្ឃយន្តដែលត្រូវបានអភិវឌ្ឍន៍ឡើងដោយអារាមកូដៃជិ និងលោក Hiroshi Ishiguro ដែលជាផលិតករមនុស្សយន្តមកពីសាកលវិទ្យាល័យអូសាកានោះ ត្រូវការថវិកា១លានដុល្លារ ដើម្បីអាចអភិវឌ្ឍន៍វាឡើង ហើយព្រះសង្ឃយន្តនេះ អាចប្រណម្យសំពះ និងផ្ដល់ពុទ្ធឱវាទក្នុងសំឡេងដ៏ស្រទន់ ។
ព្រះតេជគុណ ធេនស៊ុ ហ្គូតុ ព្រះសង្ឃយន្តនេះ នឹងមិនសុគត ហើយបន្ដធ្វើបច្ចុប្បន្នភាព និងអភិវឌ្ឍរូបរាងរហូត។ ជាមួយបច្ចេកវិទ្យា AI យើងសង្ឃឹមថា វាអាចជួយមនុស្សដោះស្រាយបញ្ហាស្មុគស្មាញបំផុត។ វាក៏កំពុងផ្លាស់ប្ដូរព្រះពុទ្ធសាសនាផងដែរ។
ព្រះតជគុណ បានមានសង្ឃដីកាបន្តថា ព្រះសង្ឃយន្តនេះ នឹងបង្រៀនយើងពីវិធីរម្ងាប់ទុក្ខ ហើយព្រះសង្ឃយន្ដអាចជួយអ្នកត្រូវការជំនួយពីឱវាទព្រះផងដែរ។
ទោះបីជាយ៉ាងណាក៏ដោយ បស្ចិមប្រទេសមិនពេញចិត្ដចំពោះ សង្ឃយន្តនេះនោះទេ ដែលអាចទាក់ទាញទេសចរមកអារាមនេះទេ។
ប៉ុន្តែពលរដ្ឋជប៉ុនមិនចេះតែវាយតម្លៃប្រឆាំងនឹងសង្ឃយន្តហោះទេ ខណៈពួកគេលើកយករូបភាពក្នុងសៀវភៅ ដែលមនុស្សយន្តក៏ជាមិត្ដសម្លាញ់ជាមួយមនុស្សផងដែរ។
គួររំឭកថា នេះមិនមែនជាលើកដំបូងនោះទេ ដែលជប៉ុនផលិតសង្ឃយន្ត ហើយសង្ឃយន្ត ត្រូវបានផលិតផងដែរ សម្រាប់ជំនួសតួនាទីព្រះសង្ឃក្នុងពិធីបុណ្យសព។
សង្ឃយន្តឈ្មោះ Pepper Robot ដែលបង្កើតឡើងដោយក្រុមហ៊ុន SoftBank Group នេះមានកម្ពស់ ១,២២ ម៉ែត្រ មានអវយវៈអាចធ្វើចលនាបាន មានភាពឆ្លាតវៃមានទឹកមុខញញឹម ញញែម និងរួសរាយរាក់ទាក់។ សង្ឃយន្តនេះ ត្រូវបានផលិតឡើងដើម្បីឱ្យវាមានមុខងារជំនួស ព្រះសង្ឃពុទ្ធសាសនាក្នុងពិធីបុណ្យសពក្នុងគោលបំណងកាត់បន្ថយការចំណាយ ពីព្រោះព្រះសង្ឃ យកសេវាថ្លៃសម្រាប់បុណ្យសពក្នុងប្រទេសជប៉ុន៕
