ប្រធានាធិបតីសហរដ្ឋអាមេរិក លោកដូណាល់ ត្រាំ បាននិយាយថា អ៊ីរ៉ង់ ទំនងជាត្រូវអង្គុយចុះនៅឲ្យស្ងៀម ក្រោយពួកគេបាញ់មីស៊ីលមកលើមូលដ្ឋានកងទ័ពអាកាសសហរដ្ឋអាមេរិកនៅក្នុងប្រទេសអ៊ីរ៉ាក់។អំឡុងសុន្ទរកថាតាមកញ្ចក់ទូរទស្សន៍ចេញពីសេតវិមាន លោកត្រាំ បានអះអាងថា គ្មានអាយុជីវិតទាហានអាមេរិក ឬអ៊ីរ៉ាក់ណាម្នាក់ បាត់បង់នោះឡើយ នៅក្នុងការវាយប្រហារទាំងនេះ ហើយមូលដ្ឋានទ័ពអាកាសពួកគេ រងការខូចខាតក្នុងទំហំតិចតួចបំផុតតែប៉ុណ្ណោះ។គួរឲ្យដឹងថា មូលដ្ឋានកងទ័ពអាកាសអ៊ីរ៉ាប៊ីល និងអាល់ អាសាដ បានរងការវាយប្រហារដោយមីស៊ីលកាលពីព្រឹកថ្ងៃពុធ ម៉ោងក្នុងស្រុក។
អ៊ីរ៉ង់ បាននិយាយថា ការវាយប្រហារនេះ គឺដើម្បីសងសឹកក្រោយការសម្លាប់មេបញ្ជាការយោធាជាន់ខ្ពស់អ៊ីរ៉ង់ គឺលោក កាសេម សូឡេម៉ានី កាលពីសប្តាហ៍មុន។ការវាយប្រហារដោយយានដ្រូនសហរដ្ឋអាមេរិក មានគោលដៅមកលើលោកកាសេម នៅក្នុងរដ្ឋធានីបាដាដ ប្រទេសអ៊ីរ៉ាក់ បានក្លាយជាការឡើងកម្តៅភាពតានតឹងយ៉ាងខ្លាំង ដែលអាចក្លាយជាសង្គ្រាម ស្របពេលដែលមានទំនាក់ទំនងដ៏អាក្រក់រួចទៅហើយរវាងអ៊ីរ៉ង់ និងសហរដ្ឋអាមេរិក។មេដឹកនាំកំពូលអ៊ីរ៉ង់ លោក អាលី ខាមេណេ បាចាប់ទុកការវាយប្រហារដោយមីស៊ីលនេះ ថាជាការទះកំប្លៀងសហរដ្ឋអាមេរិក និងបានអំពាវនាវឲ្យបញ្ចប់វត្តមានទាហានសហរដ្ឋអាមេរិកនៅក្នុងតំបន់មជ្ឈិមបូព៌ា។កាលពីល្ងាចថ្ងៃពុធ យ៉ាងហោចរ៉ុក្កែត២គ្រាប់បានធ្លាក់នៅក្នុងតំបន់សុវត្ថិភាពបៃតង ដែលជាតំបន់ដែលមានការយាមកាមយ៉ាងតឹងរឹងនៅក្នុងទីក្រុងបាដាដ និងជាកន្លែងដែលស្ថានទូតសហរដ្ឋអាមេរិកស្ថិតនៅ។ គ្មានសេចក្តីរាយការណ៍ពីគ្រោះថ្នាក់ ឬផលខូចខាតនោះទេ។ការវាយប្រហាររបស់សហរដ្ឋអាមេរិកមកលើលោកសូឡេម៉ានី បានសម្លាប់សមាជិកក្រុមជីវពលអ៊ីរ៉ាក់គាំទ្រអ៊ីរ៉ង់ផងដែរ ដែលពួកគេបានអះអាងថា ពួកគេនឹងសងសឹកដូចគ្នា។
ទោះបីជាយ៉ាងណាក៏ដោយ អនុប្រធានាធិបតីសហរដ្ឋអាមេរិក លោកម៉ៃ ផេន បាននិយាយប្រាប់ CBS Newsថា របាយការណ៍ចារកិច្ចបានបង្ហាញថា អ៊ីរ៉ង់ បានសុំឲ្យក្រុមសម្ព័ន្ធមិត្តជីវពលរបស់ខ្លួន មិនចាំបាច់វាយប្រហារមកលើសហរដ្ឋអាមេរិកនោះទេ។លោក ផេន បាននិយាយថា យើងទទួលបានព័ត៌មានចារកិច្ចជាច្រើនបង្ហាញថា អ៊ីរ៉ង់ បានផ្ញើសារទៅកាន់ក្រុមជីវពលទាំងអស់នោះ ឲ្យដកចេញគោលដៅវាយប្រហារមកលើអាមេរិក ឬជនស៊ីវិល ៕
