ថៅកែលក់គ្រឿងបន្លាស់រថយន្ដ២នាក់ប្ដីប្រពន្ធ បានធ្វើបាបនារីជាជនជាតិឡាវម្នាក់ ប្រៀបបីដូចទាសី អស់រយ:ពេល៨ឆ្នាំ ទើបបែកការដឹងដល់អាជ្ញាធរថៃ និងប៉ូលិស ចុះទៅចាប់ខ្លួន កាលពីថ្ងៃទី២៨ ខែកុម្ភ: ឆ្នាំ២០២០ នៅក្នុងហាងរបស់ពូកគេ ស្ថិតក្នុងតំបន់អូមណយ (Om Noi) ស្រុកក្រាធុម បែន (Kratum Baen) ខេត្ដសមុទ្រសាខន ប្រទេសថៃ។
មន្រ្ដីប្រឆាំងការជួញដូរមនុស្ស និងប៉ូលិសក្នុងតំបន់ បានឲ្យដឹងថា ជនសង័្សយ ដែលត្រូវ ចាប់ ខ្លួន ឈ្មោះ សុចិន វីភូស៊ីតធីគុល (Suchin Wiphusitthikul) អាយុ៦០ឆ្នាំ និងប្រពន្ធរបស់គាត់ឈ្មោះ ជីរ៉ាវ៉ឌី វីភូស៊ីទធីគុល (Jirawadee Wiphusitthikul) ។ រីឯនារីរងគ្រោះ អាយុ២១ឆ្នាំ ជនជាតិឡាវ។
ប៉ូលិសថៃ បានបញ្ជាក់ថា ជនសង័្សយទាំង២នាក់ប្ដីប្រពន្ធខាងលើនេះ ត្រូវបានប៉ូលិសចាប់ខ្លួន ក្រោមការចោទប្រកាន់ពីបទ «ឃុំឃាំងបុគ្គលិកដោយខុសច្បាប់ និងធ្វើទារុណកម្មនាងដូចជាទាសី អស់រយ:ពេល៨ឆ្នាំ»។ ជនសង័្សយទាំង២នាក់ប្តីប្រពន្ធនេះ ក៏អាចនឹងត្រូវចោទប្រកាន់ពីបទជួញដូរមនុស្សដោយប្រមូលប្រាក់ចំណេញពីមនុស្សម្នាក់ទៀត តាមរយៈការកេងប្រវ័ញ្ច និងបង្ខំឱ្យជួលពលករចំណាកស្រុកដែលមិនបានចុះឈ្មោះ និងការដកហូតសិទ្ធិសេរីភាពរបស់កម្មករ។
លោកវរសេនីយ៍ Apisan Chaiyarat អនុប្រធានប៉ូលិសប្រឆាំងការជួញដូរមនុស្ស បានឲ្យដឹងថា ការចាប់ខ្លួនជនសង័្សយខាងលើនេះ ក្រោយពេលប៉ូលិសទទួលបានព័ត៌មានពីករណីធ្វើអាជីវកម្មលើកម្លាំងពលកម្មរបស់កម្មការិនីជនជាតិឡាវម្នាក់ អស់រយ:ពេលជាច្រើនឆ្នាំ។ ប៉ុន្ដែបើតាមការសាកសួរទៅលើជនរងគ្រោះខាងលើ គឺនាងបានមកធ្វើការឲ្យថៅកែខាងលើ ចាប់តាំងពីនាង មានអាយុ១៣ឆ្នាំមកម៉្លេះ។
លោកវរសេនីយ៍ បានឲ្យដឹងតាមសម្ដីរបស់ជនរងគ្រោះថា ថៅកែខាងលើ ធ្លាប់ឃុំឃាំងនាងនៅក្នុងបន្ទប់ និងមិនឲ្យប្រាក់ឈ្នួលដល់នាង ដោយធ្វើបាបនាងដូចជាទាសី។ នារីរងគ្រោះក៏បានចោទប្រកាន់ថៅកែរបស់នាង ពីការធ្វើទារុណកម្មមកលើរូបនាងយ៉ាងខ្លាំង ដូចជា ការរំលោភបំពាន វាយនាងនឹងអម្បោស ឬខ្សែភ្លើងជាដើម។
នារីរងគ្រោះ បានប្រាប់ប៉ូលិសថា ដោយសាររងនូវការធ្វើទារុណកម្មខ្លាំងពេក មានថ្ងៃមួយ នាងបានលួចរត់ចេញពីក្នុងហាងរបស់ថៅកែរបស់នាង តែត្រូវគេចាប់បាន ហើយនាំត្រឡប់មកហាងវិញ។ បន្ទាប់មកថៅកែរបស់នាងបានប្រាប់អ្នកជិតខាងថា នាងកើតជំងឺសរសៃប្រសាទ ហើយមានពេលខ្លះ ថៅកែរបស់នាងបានលើកជើងធាក់ចំមុខនាង ក៏មាន ហើយបើថៅកែរបស់នាងទៅដើរលេង គឺទុកតែមីឲ្យនាងហូបតែប៉ុណ្ណោះ។
ទោះជាយ៉ាងណា ថៅកែទាំង២នាក់ប្ដីប្រពន្ធនោះ បានបដិសេធរាល់ការចោទប្រកាន់របស់អ្នកបម្រើរបស់ពួកគេ។ ប៉ុន្ដែករណីនេះ ប៉ូលិសក៏កំពុងតែស៊ើបអង្កេតបន្ដទៀត៕
