រហូតមកដល់ពេលនេះ ប្រទេសប្រហែលជាង៦០បានឆ្លងនូវវីរុសកូរ៉ូណា ហើយប្រទេសខ្លះ មានទាំងថ្នាក់ដឹកនាំជាន់ខ្ពស់ផងដែរ ហើយសូម្បីតែកងទ័ពរបស់ប្រទេសកូរ៉េខាងត្បូង ក៏មានឆ្លងវីរុសនេះដែរ។
ក្រសួងការពារជាតិកូរ៉េខាងត្បូង បានប្រកាសថា បើគិតត្រឹមថ្ងៃទី៣ ខែមីនា- ឆ្នាំ២០២០នេះ កងទ័ពរបស់ប្រទេសកូរ៉េខាងត្បូង ចំនួន៣១នាក់បានឆ្លងវីរុកូរ៉ូណា ឬកូវីដ-១៩។ អ្នកឆ្លងទាំងនោះ មានបុគ្គលិកស៊ីវិលចំនួន៣នាក់ ដែលបម្រើការងារក្នុងវិស័យយោធា ដូច្នេះធ្វើឲ្យមានអ្នកឆ្លងកើនឡើង ចំនួន៣១នាក់។
ប្រភពព័ត៌មានដដែល បានបញ្ជាក់ថា កងទ័ពដែលឆ្លងជំងឺរលាកផ្លូវដង្ហើមនោះ កងទ័ពអាកាសម្នាក់ និងជើងទឹកវាយឡើងគោកម្នាក់ នៅទីក្រុង Gyeongsang ។ ក្នុងងចំណោមកងទ័ពទាំង៣១នាក់ ដែលឆ្លងវីរុសកូរ៉ូណានោះ រួមមាន កងទ័ពជើងគោកចំនួន១៧នាក់ កងទ័ពអាកាសចំនួន១១នាក់ កងទ័ជើងទឹកវាយឡើងគោកចំនួន២នាក់ និងកងទ័ពជើងទឹកម្នាក់។
ប្រភពព័ត៌មានដដែល បានបន្ដថា រហូតមកដល់ពេលនេះ កងទ័ពកូរ៉េខាងត្បូង ចំនួន៧៤១០នាក់ ត្រូវបានកាត់ផ្តាច់ឲ្យនៅដាច់ដោយឡែក ដើម្បីតាមដានពីការឆ្លងមេរោគផ្លូវដង្ហើមប្រភេទថ្មីនេះ។
សូមជម្រាបថា បើគិតត្រឹមថ្ងៃទី៣ ខែមីនា ឆ្នាំ២០២០ កូរ៉េខាងត្បូង មានអ្នកឆ្លងវីរុសកូរ៉ូណា រហូតដល់ទៅ៤៨១២នាក់ ក្នុងចំណោមនោះ ៧៥ភាគរយ ស្ថិតក្នុងទីក្រុង Daegu ។ ប៉ុន្ដែបើគិតនៅលើពិភពោលទាំងមូល ជំងឺនេះបានសម្លាប់មនុស្សជាង៣ពាន់នាក់ និងមានអ្នកឆ្លងជាង៨ម៉ឺននាក់។ រីឯប្រទេសអ៊ឺរ៉ងមានទាំងមន្រ្ដីរដ្ឋាភិបាល ក៏បានស្លាប់ដោយសារជំងឺនេះដែរ៕
