នាវាផ្ទុកយន្ដហោះ USS Theodore Roosevelt របស់អាមេរិក មាននាវិកចំនួន៣នាក់ត្រូវបានធ្វើតេស្ដរកឃើញមានផ្ទុកវីរុសរលាកផ្លូវដង្ហើមប្រភេទថ្មី ឬវីរុសកូរ៉ូណា (កូវីដ-១៩)។
លោក មីឆែល ហ្គីលដេ (Michael Gilday) ប្រធានប្រតិបត្ដិការ នៃកងនាវាអាមេរិក បានបញ្ជាក់ថា រហូតមកដល់ពេលនេះ នាវាផ្ទុកយន្ដហោះអាមេរិក មិនទាន់មានគម្រោងចេញទៅបំពេញបេសកកម្មនៅឡើយ។ ដោយឡែកនាវិកចំនួន៣នាក់ នៅលើនាវាផ្ទុកយន្ដហោះ USS Theodore Roosevelt ដែលធ្វើតេស្ដវិជ្ជមាន នៃកូវីដ-១៩នោះ នឹងត្រូវបាននាំចេញពីនាវា រួចហើយបញ្ជូនពួកគាត់ព្យាបាល នៅក្នុងមន្ទីរពេទ្យរបស់ក្រសួងការពារជាតិអាមេរិក។
លោក ថូម៉ាស់ មូដលី (Thomas Modly) មេបញ្ជាការរងកងនាវាចម្បាំងអាមេរិក បានថ្លែងថា នាវាផ្ទុកយន្ដហោះ USS Theodore Roosevelt ដែលនាវិកមានផ្ទុកវីរុសកូវីដ-១៩ បានធ្វើនាវារចរណ៍ នៅលើដែនសមុទ្រ នៃទ្វីបអាស៊ី។ ប៉ុន្ដែកាលពី១៥ថ្ងៃមុន នាវាផ្ទុកយន្ដហោះនេះបាននាវាចរណ៍ទៅកាន់ប្រទេសវៀតណាម ផងដែរ។
ប្រភពព័ត៌មាន បានឲ្យដឹងថា កន្លងមក កងទ័ពអាមេរិកបានរកឃើញមានឆ្លងវីរុសកូវីដ-១៩ ចំនួន១៣៣។ ប៉ុន្ដែកងទ័ពត្រូវធ្វើតេស្ដរកឃើញវិជ្ជមាន នៃកូវីដ-១៩នោះ នឹងត្រូវបញ្ជូនទៅព្យាបាល នៅក្នុងមន្ទីរពេទ្យរបស់ក្រសួងការពារជាតិអាមេរិក។
សូមជម្រាបថា រហូតមកដល់វេលាម៉ោង៥ព្រឹក ថ្ងៃទី២៦ ខែមីនា ឆ្នាំ២០២០ (ម៉ោងនៅកម្ពុជា) អាមេរិកមានអ្នកឆ្លងវីរុសកូវីដ-១៩ បានបន្ដកើនឡើងដល់ ៦៤៧៦៥នាក់ (ឆ្លងថ្មី ចំនួន៩៩០៩នាក់)។ ក្នុងចំណោមអ្នកជំងឺទាំងនោះស្លាប់៩១០នាក់ និងព្យាបាលជាសះស្បើយចំនួន៣៩៣នាក់៕