ចាប់តាំងពីការផ្ទុះឡើង នៃវីរុសកូវីដ-១៩ កាលពីអំឡុងខែធ្នូ ឆ្នាំ២០១៩ នៅទីក្រុងវូហាន ខេត្ដហ៊ូប៉ី នាភាគ កណ្ដាល នៃប្រទេសចិន រហូតមកដល់វេលាម៉ោង៥ព្រឹក ថ្ងៃទី២៨ ខែមីនា ឆ្នាំ២០២០ (ម៉ោងនៅកម្ពុជា) នៅលើពិភពលោក មានអ្នកឆ្លងកើនឡើងដល់៥៩១ ០៨៦នាក់ ក្នុងនោះស្លាប់២៦៩៧៧នាក់ និងព្យាបាលជាសះស្បើយ១៣២ ៤៩០នាក់។
ប្រទេសចិនជាទីផ្ទុះឡើង នៃវីរុសដ៏កាចសាហាវនេះ មានអ្នកឆ្លងជាង៨១៣៤០នាក់ ហើយក្នុងចំណោមអ្នកជំងឺទាំងនោះ ស្លាប់៣២៩២នាក់ និងជាសះស្បើយ ជាង៧៤៥៨៨នាក់។ ប៉ុន្ដែរហូតមកដល់ពេលនេះ ចិនបានគ្រប់គ្រងស្ថានការណ៍ជាបណ្ដោះអាសន្នស្ទើរទាំងស្រុង។
ផ្ទុយទៅវិញ បណ្ដាប្រទេសនៅអឺរ៉ុបក៏កំពុងតែវឹកវរនឹងការរាតត្បាត នៃវីរុសកូវីដ-១៩នេះ ហើយអ៊ីតាលីក្លាយជាប្រទេសរងគ្រោះខ្លាំងជាងគេបំផុត នៅតំបន់អឺរ៉ុប និងឈរលំដាប់លេខ២ នៃចំនួនអ្នកឆ្លងវីរុសច្រើនជាងគេនៅលើពិភពលោក បន្ទាប់ពីប្រទេសអាមេរិក។ អ៊ីតាលីមានអ្នកឆ្លងវីរុសកូវីដ-កើនឡើង រហូតដល់ ៨៦៤៩៨នាក់ ដោយឆ្លងថ្មីចំនួន៥៩០៩នាក់។ ក្នុងចំណោមអ្នកជំងឺជាងទាំងនោះ គឺព្យាបាលបានជាសះស្បើយជាង១ម៉ឺននាក់ និងស្លាប់៩១៣៤នាក់។
បើយោងតាមរបាយការណ៍ បានឲ្យដឹងថា ក្នុងមួយថ្ងៃៗ ចំនួនអ្នកស្លាប់កើនឡើងរាប់នាក់នេះ។ នេះជាតួលេខមួយគួរឲ្យភ័យខ្លាច និងព្រួយបារម្ភបំផុត។
ដោយឡែកប្រទេសមហាអំណាចយោធា និងសេដ្ឋកិច្ចលេខ១របស់ពិភពលោកវិញ (អាមេរិក) ក៏បានឈរក្នុងលំដាប់លេខ១ នៃចំនួនអ្នកឆ្លងវីរុសដ៏កាចសាហាវច្រើនជាងគេ នៅលើពិភពលោក។ អាមេរិកមានអ្នកឆ្លងវីរុសនេះ កើនឡើងជាង១សែននាក់។ ក្នុងចំណោមអ្នកជំងឺទាំងនោះ គឺស្លាប់១៥៥៧នាក់ និងព្យាបាលជាសះស្បើយចំនួន២៤៦៥នាក់។
ដោយសារតែអាមេរិកបានដឹងច្បាស់ថា វីរុសដ៏កាចសាហាវនេះកំពុងតែរាតត្បាត នៅលើទឹកដីរបស់ខ្លួននោះ ទើបប្រធានាធិបតីអាមេរិក លោក ដូណាល់ ត្រាំ បានស្វះស្វែងរកកញ្ចប់លុយ រហូតដល់១០០០ពាន់លានដុល្លារអាមេរិក សម្រាប់ធ្វើសង្រ្គាមប្រឆាំងនឹងវីរុសដ៏កាចសាហាវនេះ៕