រដ្ឋធានីមូស្គូ៖ យន្ដហោះទម្លាក់គ្រាប់បែករបស់រុស្ស៊ី មួយគ្រឿង កំពុងតែហោះហ្វឹកហ្វឺន ក៏ជួបនឹងគ្រោះថ្នាក់ដ៏អាក្រក់ ធ្លាក់នៅលើតំបន់លំនៅឋាន កណ្ដាលទីក្រុងយេយស្ក៍ (Yeysk) នាភាគខាងត្បូង ប្រទេសរុស្ស៊ី ជិតព្រំដែនអ៊ុយក្រែន ដោយបានបង្កឲ្យមានអណ្ដាតភ្លើងឆាបឆេះអគារយ៉ាងសន្ធោសន្ធៅឡើង បណ្ដាលឲ្យមនុស្ស យ៉ាងតិច៤នាក់បាត់បង់ជីវិត និង ២៥នាក់ផ្សេងទៀត បានរងរបួស។
សារព័ត៌មាន Hunter Valley News បានចេញផ្សាយ កាលពីព្រឹក ថ្ងៃអង្គារ ទី១៨ ខែតុលា ថា បើតាមសេចក្ដីរាយការណ៍ជាច្រើន បានឲ្យដឹង ថា ការធ្លាក់យន្ដហោះយោធារបស់កងទ័ពរុស្ស៊ី បានបណ្ដាលឲ្យតំបន់អគារលំនៅឋាន រងនូវគ្រោះអគ្គិភ័យ ហើយត្រូវបានហៅទៅកាន់ក្រុមសង្គ្រោះបន្ទាន់ មកជួយអន្ដរាគមន៍។
អាជ្ញាធរក្នុងតំបន់ បានបញ្ជាក់ នៅលើបណ្ដាញសង្គមតេឡេក្រាម ថា មនុស្សយ៉ាងតិច៤នាក់ បានបាត់បង់ជីវិត នៅក្នុងហេតុការណ៍ធ្លាក់យន្ដហោះ នៅជិតព្រំដែនជាមួយនឹងប្រទេសអ៊ុយក្រែន។ ចំណែកមនុស្ស២៥នាក់ផ្សេងទៀត បានរងរបួស ហើយត្រូវបានបញ្ជូនទៅកាន់មន្ទីរពេទ្យ។
ក្រសួងការពារជាតិរុស្ស៊ី បានបញ្ជាក់ ថា យន្ដហោះទម្លាក់គ្រាប់បែករបស់កងទ័ពរុស្ស៊ី មួយគ្រឿង ប្រភេទ Su-34 កំពុងតែហោះហ្វឹកហ្វឺន កាលពីល្ងាច ថ្ងៃចន្ទ ស្រាប់តែម៉ាស៊ីនមួយរបស់យន្ដហោះ មានភ្លើងឆាបឆេះឡើង។ ស្ថិតក្នុងហេតុការណ៍ប្រកបដោយគ្រោះថ្នាក់បែបនេះ អាកាសយានិក នៅក្នុងយន្ដហោះនោះ ក៏បានចុតឆត្រលោតចេញ មុនពេលវាធ្លាក់។
បើតាមវីដេអូ បានឃើញជាក់ស្តែង បង្ហាញពីអ្នកស្រុក ព្យាយាមជួយអ្នកបើកយន្តហោះម្នាក់ដែលដេក នៅលើដីក្បែរនោះ ដោយមានទាំងឆត្រយោង នៅពីក្រោយខ្នងរបស់គាត់ ថែមទៀតផង។
ក្រសួងការពារជាតិរុស្ស៊ី បានបញ្ជាក់ នៅក្នុងសេចក្តីថ្លែងការណ៍មួយ ថា «យោងតាមរបាយការណ៍ ពីអ្នកបើកយន្តហោះ ដែលបានលោត ចេញពីយន្តហោះ អះអាង ថា មូលហេតុ នៃការធ្លាក់យន្ដហោះនេះ មកពីមានភ្លើងឆេះម៉ាស៊ីនមួយ នៅក្នុងអំឡុងពេលហោះហ្វឹកហ្វឺន។ ចំណែកចំណុចដែលយន្ដហោះ Su-34 នោះធ្លាក់ ជាទីធ្លាប្លុកលំនៅឋានរបស់ប្រជាពលរដ្ឋ ហើយប្រេងឥន្ធនៈរបស់យន្ដហោះ ក៏បានបង្កឲ្យមានភ្លើងឆាបឆេះឡើង»។
អ្នកឆ្លើយឆ្លងព័ត៌មាន នៅក្នុងតំបន់ម្នាក់ ស្ថិតក្នុងទីក្រុង Yeysk បានប្រាប់ដល់បណ្ដាញទូរទស្សន៍ Rossiya 24 គ្រប់គ្រងដោយរដ្ឋរុស្ស៊ី ថា ប្លុកអគារចំនួន២ បានរងនូវគ្រោះអគ្គិភ័យ។ ចំណែកកុមារ នៅក្នុងសាលាជិតនោះ ត្រូវបានជម្លៀសចេញ ដោយសុវត្ថិភាព។
ជាមួយគ្នានេះ វិមានក្រឹមឡាំងរបស់ប្រធានាធិបតីរុស្ស៊ី បានបញ្ជាឲ្យអាជ្ញាធរជាតិ និង តំបន់ ត្រូវតែផ្ដល់ជំនួយចាំបាច់ ជួយដល់ជនរងគ្រោះ ពីគ្រោះអគ្គិភ័យ នៅកណ្ដាលទីក្រុង Yeysk ហើយក្រុមមន្ដ្រីជាន់ខ្ពស់រដ្ឋាភិបាល ក៏ត្រូវបញ្ជូនទៅជួយសម្របសម្រួល ដល់មជ្ឈមណ្ឌលឆ្លើយតបនឹងវិបត្ដិនេះផងដែរ។
គណៈកម្មាធិការស៊ើបអង្កេតរុស្ស៊ី បានបញ្ជាក់ ថា ខ្លួននឹងបើកការស៊ើបអង្កេត លើករណីព្រហ្មទណ្ឌ និង បានបញ្ជូនក្រុមស៊ើបអង្កេត ទៅកាន់កន្លែងធ្លាក់យន្ដហោះនោះ ដោយមិនបានផ្ដល់ហេតុផលណាមួយនោះឡើយ។
ទីក្រុង Yeysk នៅឈមនឹងដែនដីកាន់កាប់ ដោយរុស្ស៊ី ស្ថិតនៅភាគខាងត្បូង ប្រទេសអ៊ុយក្រែន ដែលខណ្ឌ ដោយសមុទ្រអាហ្សូវ (Azov)។ ទីក្រុងនោះ ត្រូវបានប្រើប្រាស់ ជាមូលដ្ឋានហ្វឹកហ្វឺនដ៏ធំ សម្រាប់កងទ័ពអាកាសរបស់ទាហានជើងទឹករុស្ស៊ី៕