រាជធានីបាងកក៖ ក្រោយពេលសមាជិកសភាទាំង២របស់ប្រទេសថៃ បានបោះឆ្នោតគាំទ្រតិចជាងសំឡេងប្រឆាំង និង អនុបវាត រហូតមិនអាចមានសំឡេងគ្រប់គ្រាន់ សម្រាប់ការឡើងកាន់កាប់តំណែងនាយករដ្ឋមន្ដ្រី រួចមក ឥឡូវនេះ មេដឹកនាំគណបក្សឆ្ពោះទៅមុខ កំពុងតែមានគោលបំណងបន្ថយនូវរបៀបវារៈកំណែទម្រង់របស់គណបក្ស។
សារព័ត៌មានរបស់សិង្ហបុរី CNA បានចេញផ្សាយ នៅរសៀល ថ្ងៃអង្គារ ទី១៨ ខែកក្កដា ថា លោក ភីថា លីមចារឿនរ៉ាត (Pita Limjaroenrat) បេក្ខជននាយករដ្ឋមន្ត្រីថៃ បានបញ្ជាក់ នៅថ្ងៃអង្គារ (ទី១៨ ខែកក្កដា) ថា គាត់មានសុច្ឆន្ទៈបន្ថយមហិច្ឆតា លើកំណែទម្រង់របស់គណបក្សឆ្ពោះទៅមុខ (Move Forward) ហៅកាត់ MFP ប្រសិនបើគាត់ក្លាយជាមេដឹកនាំប្រទេស។ ប៉ុន្តែគាត់នៅតែប្តេជ្ញាចិត្ត ថា គាត់នឹងមិនរាថយ ចំពោះផែនការធ្វើវិសោធនកម្ម លើមាត្រា ១១២ ពាក់ព័ន្ធនឹងច្បាប់ប្រមាថព្រះមហាក្សត្រ។
នៅក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters នៅមុនថ្ងៃបោះឆ្នោតជុំទី២របស់គាត់ សម្រាប់ការកាន់កាប់តំណែងនាយករដ្ឋមន្ដ្រី នៅថ្ងៃពុធ ទី៩ ខែកក្កដា នោះ លោក ភីថា មេដឹកនាំគណបក្ស MFP ដែលបានដឹកនាំគណបក្សរបស់គាត់ ឱ្យទទួលជ័យជម្នះ នៅក្នុងការបោះឆ្នោតសកល កាលពីខែឧសភា ឆ្នាំ២០២៣ បានពណ៌នា អំពីកិច្ចខិតខំប្រឹងប្រែងរបស់ពួកយោធា បានរារាំងគាត់ ដល់ការបំបែកកំណត់ត្រា។ គាត់បានអះអាង ថា ប្រទេសថៃ បានឈានចូលយុគសម័យថ្មី ជាមួយនឹងការញុះញង់ជាសាធារណៈ ត្រូវតែផ្លាស់ប្តូរ។
លោក ភីថា វ័យ៤២ឆ្នាំ គ្រោងនឹងប្រកួតប្រជែងនូវការបោះឆ្នោតសភាជុំទី២របស់គាត់ សម្រាប់តំណែងនាយករដ្ឋមន្ត្រី នៅថ្ងៃពុធ ក្រោយពេលគាត់បានរងនូវបរាជ័យ កាលពីថ្ងៃទី១៣ ខែកក្កដា ដោយសារតែសមាជិកព្រឹទ្ធសភា ត្រូវបានតែងតាំង ដោយពួកយោធាអភិរក្សនិយម បានរារាំងគាត់។ បើទោះជាមានអ្វីកើតឡើង នៅថ្ងៃស្អែក ហើយមានការរីកចម្រើន នៅក្នុងសង្គម គណបក្សរបស់គាត់ គេត្រូវតែទាមទារអ្វីដែលថ្មី។
គណបក្សឆ្ពោះទៅមុខ បានទទួលការគាំទ្រច្រើន ពីយុវជន សម្រាប់របៀបវារៈកំណែទម្រង់របស់គណបក្ស ហើយបានឈ្នះដ៏គួរឱ្យភ្ញាក់ផ្អើល នៅក្នុងការបោះឆ្នោតសកល កាលពីថ្ងៃទី១៤ ខែឧសភា ដោយបានផ្តួលគូប្រជែងពួកអភិរក្សនិយម។ នេះជាអ្វីដែលត្រូវបានគេមើលឃើញ ថា សកម្មភាពបែបនេះ ជាការបដិសេធយ៉ាងខ្លាំងបំផុត សម្រាប់រដ្ឋាភិបាល គ្រប់គ្រងប្រទេសថៃ អស់រយៈពេលជិតមួយទសវត្សរ៍ ក្រោមការដឹកនាំ ឬ គាំទ្រដោយពួកយោធារាជានិយម៕
