ទីក្រុងតៃប៉ិ៖ រហូតមកដល់ពេលនេះ ក្រុងប៉េកាំង នៅតែបន្ដបញ្ជូនយន្ដហោះយោធា និង នាវាចម្បាំង ទៅធ្វើសកម្មភាព នៅជុំវិញដែនកោះតៃវ៉ាន់ ទើបក្រុងតៃប៉ិ បានបញ្ជូនកងទ័ពអាកាស និង កងទ័ពជើងទឹក ព្រមទាំងប្រើប្រាស់ប្រព័ន្ធមីស៊ីល បាញ់ពីលើដីទៅអាកាស តាមឃ្លាំមើល មិនឲ្យរំលោភចូលមកលើដែនដីរបស់ខ្លួន។
សារព័ត៌មាន The Sentinel បានចេញផ្សាយ កាលពីព្រឹក ថ្ងៃពុធ ទី២៣ ខែវិច្ឆិកា ថា ក្រសួងការពារជាតិតៃវ៉ាន់ (MND) បានអះអាង ថា យន្ដហោះយោធា ចំនួន៣គ្រឿង និង នាវាចម្បាំងចំនួន៤គ្រឿងរបស់កងទ័ពជើងចិន បានធ្វើសកម្មភាព នៅជុំវិញដែនកោះរបស់ខ្លួន ចន្លោះពីវេលាម៉ោង៦ព្រឹក ថ្ងៃអង្គារ រហូតដល់ម៉ោង៦ព្រឹក ថ្ងៃពុធ។
មន្ដ្រីក្រសួងការពារជាតិតៃវ៉ាន់ បានបញ្ជាក់ ថា យន្ដហោះចម្បាំង ប្រភេទ Shenyan J-16 របស់ចិន ចំនួន២គ្រឿង ហោះយកការណ៍ នៅជ្រុងនិរតី នៃតំបន់កំណត់ការពារដែនអាកាសរបស់តៃវ៉ាន់ (ADIZ) ខណៈឧទ្ធម្ភាគចក្រចម្បាំងប្រឆាំងនឹងនាវាមុជទឹករបស់ពួកគេ ប្រភេទ Ka-28 ហោះ នៅជ្រុងអាគ្នេយ៍ នៃ ADIZ របស់តៃវ៉ាន់។ ស្ថិតក្នុងស្ថានការណ៍បែបនេះ តៃវ៉ាន់ បានបញ្ជូនយន្ដហោះចម្បាំង និង នាវាមុជទឹកជាច្រើនគ្រឿង ព្រមទាំងប្រើប្រាស់ប្រព័ន្ធមីស៊ីលបាញ់ពីលើដីទៅអាកាស តាមឃ្លាំមើលសកម្មភាពយោធារបស់ចិន។
រហូតមកដល់ខែនេះ ក្រុងប៉េកាំង បានបញ្ជូនយន្ដហោះយោធា ចំនួន៣៩៨គ្រឿង និង នាវាចម្បាំង ចំនួន៧៤គ្រឿង ធ្វើសកម្មភាព នៅជុំវិញកោះតៃវ៉ាន់។ ចាប់តាំងពីខែកញ្ញា ឆ្នាំ២០២០ រហូតមកដល់ពេលនេះ ចិន បានបង្កើនការប្រើប្រាស់តំបន់យុទ្ធសាស្ត្រពណ៌ប្រផេះ ដោយបញ្ជូនយន្តហោះ ទៅកាន់តំបន់ ADIZ របស់តៃវ៉ាន់ ជាប្រចាំ។
តំបន់យុទ្ធសាស្ត្រពណ៌ប្រផេះ ត្រូវបានកំណត់ថា ជា«កិច្ចខិតខំប្រឹងប្រែងមួយ ឬច្រើន សម្រាប់ការរារាំង និង ធានាស្ថិរភាព ដោយការព្យាយាមសម្រេចបាននូវគោលដៅសន្តិសុខ ដែលមិនងាកទៅរកការប្រើប្រាស់កម្លាំងដោយផ្ទាល់ និង កម្លាំងដ៏ច្រើន៕